Փաստ ինֆո

Կառավարություն ունենք, նիստեր է անում, գաղտնի ռեժիմից բացի՝ մեկ-մեկ էլ հրապարակային հարցեր է քննարկում։ Օրինակ, իմանում ենք, որ դեռ օգոստոսին, այսինքն, պատերազմից առաջ Տավուշի մարզի Ներքին Կարմիրաղբյուր գյուղում նոր պուրակ կառուցելու հարց է դրվել։ Բայց ամիսներն անցել են, իսկ պուրակի հետքը չի երևում։

Պատկան մարմինը գործը սկսել է, հողային աշխատանքներն արել, բայց պարզվել է՝ շարունակել հնարավոր չէ, քանի որ սեփականատիրոջ հետ կապված խնդիրներ կան, դատական գործընթացներ են ընթանում։

Վարչապետի պաշտոնը զբաղեցնող անձը զայրանում է՝ ո՞նց կարող էր նման խնդիր լինել, եթե՝ «գնացել ենք, մարդկանց խոստացել ենք, ֆինանսավորումը տվել ենք, նախագիծը հաստատել, տեղում նայել ենք, համաձայնությունը ձեռք ենք բերել»․․․

Հետաքրքիր է, չէ՞։ Մի կողմից այս դրվագը իսկական ապտակ է իշխանության թիվ 1 պատասխանատուի երեսին, քանի որ մենք գործ ունենք սեփականության հետ, որը դատական կարգով վիճարկվում է։ Այսինքն, կա սեփականատեր, որն իր սեփականության տերն է և համայնքային իշխանության հետ այս առումով պայքարի մեջ է ։

Միաժամանակ, ունենք կապիտուլյանտ վարչապետ, որը հայ-ադրբեջանական գաղտնի հուշագիր ստորագրելով՝ Սյունիքի մարզի Շուռնուխ գյուղի մեկ տասնյակից ավելի բնակիչների տները՝ այսինքն, մարդկանց տասնամյակների ստեղծածը, հողով, այգիներով, ամեն ինչով հանդերձ՝ օրինական, սեփականության վկայականների առկայության պայմաններում, անհասկանալի և հետխորհրդային շրջանում մերժված և անօգտագործելի քարտեզներով, բացարձակ ապօրինաբար, թշնամուն կաշառված ինչ-որ կազմակերպության սուտ ու սխալ GPS- կոչված համակարգի չափուձևով կատարված դիրքափոխության հետևանքով հանձնեց, ուղղակի նվիրեց թշնամուն։

«Ֆինանսավորումը տրված է, նախագիծը հաստատված, ամեն ինչ բանավոր խոսացված»՝ զարմանում ու զայրանում է ղեկավարը։ Ինչ-որ սեփականատեր է գտնվել, որ օրենքի շրջանակում դատ ու դատաստան է սկսել․․․Ի՜նչ հանդգնություն։

Եվ «տեղում կպարզենք, կզեկուցենք»՝ ոլորտային պատասխանատուի խոսքին՝ հնչում է վերադասի խիստ հանձնարարականը՝ «Պետք չէ պարզել և զեկուցել, պետք է գնալ, լուծել հարցը և զեկուցել, որ արված է ամեն ինչ»։

Այսինքն, հարցը լուծել ցանկացած պարագայում՝ թեկուզ ՝օրենքի շրջանցմա՞մբ։

Այս հանձնարարականը չի՞ ենթադրում արդյոք նաև ուժային լուծում՝ անհնազանդին «ասֆալտին փռելու, պատերին ծեփելու» հայտնի մեթոդով։

Աղբյուր` Փաստինֆո