Փաստ ինֆո

Առողջապահության նախարարությունը հերքում է իր իսկ հրապարակած տվյալները։ Մասնավորապես, նախարարությունից Aysor.am-ի հարցմանն ի պատասխան հայտնել էին, որ այս պահի դրությամբ 3577 դիակ անցել է դատաբժշկական փորձաքննություն և ևս 428 փորձանմուշ գտնվում է ԴՆԹ փորձաքննության փուլում: «Փաստինֆո»-ն տեղեկությունը ստուգելու համար կապ էր հաստատել նախարարության հետ, որին ի պատասխան վստահեցրել էին, որ 3577-ն արդեն հաստատված թիվն է, իսկ 428-ը այդ թվի մեջ չի մտնում։ Այսինքն՝ 3577 զոհի տվյալ արդեն նույնականացվել է, իսկ 428-ի փորձաքննությունը դեռ ընթացքի մեջ է։ Այս տվյալների հետեւում է, որ առնվազն 4005 զոհի մարմին այս պահին արդեն ենթարկվել է փորձաքննության, որից 428-ի ինքնությունը դեռ չի պարզվել։

Մեր հրապարակած հոդվածում հիշեցրել էինք փոխվարչապետ Տիգրան Ավինյանը հունվարի 20-ին Աժ ամբիոնից հնչեցրած հայտարարությունը՝ թե զոհերի թիվը չի անցնի 4000-ը, մինչդեռ, փետրվարի 18-ի դրությամբ, այդ թիվն արդեն իսկ անցել է։

Նյութի թողարկումից մոտ մեկ ժամ անց նախարարությունից մանրամասնեցին, որ տեղեկատվությունը ճշտել են և պարզել, թե սխալ մեկնաբանություն է եղել, այսինքն՝ ընդհանուր առմամբ 3577 դիակի փորձանմուշ արդեն իրականացվել է, դրանցից 428-ը դեռ փորձաքննության փուլում են։

Ավելին՝ նշեցին, թե տվյալները փետրվարի 13-ի դրությամբ են՝ այսպիսով` պնդելով թե զոհերի թիվը այս պահի դրությամբ 3577 է։

Հարցին՝ այսօրվա դրությամբ քանի փորձաքննություն է կատարվել, նկատի ունենալով, որ առողջապահության նախարար Ավանեսյանն այսօր հայտարարել է, թե օրական արդեն արվում է մինչեւ 30 փորձանմուշի նույնականացում, նախարարությունից խնդրեցին գրավոր հարցում ուղարկել, որովհետև տվյալներն իրենց ՊՆ-ից են հայտնում։

Հունվարի 1-ի դրությամբ դատաբժշկական փորձաքննության է ենթարկվել 3330 մարմին. ԱՆ

 Նկատենք, որ նախկինում եւս Առողջապահության նախարարությունը հրապարակել է փորձաքննության ենթարկված մարմինների վերաբերյալ թվային տվյալները՝ այդ թվում «Փաստինֆո»-ի բանավոր հարցումներին ի պատասխան։

Ի դեպ, նշենք, որ դատաբժշկական փորձաքննություններ իրականացնող գիտագործնական կենտրոնը գործում է հենց առողջապահության նախարարության ենթակայության ներքո։ Այդուհանդերձ, «Փաստինֆո»-ն փորձեց ՊՆ-ից ճշտել, թե արդյոք կարող են հայտնել փորձաքննությունների մասին թվային տվյալները։ Ի պատասխան՝ ՀՀ ՊՆ ներկայացուցիչը ևս փաստեց՝ փորձաքննությունների թվային տվյալները միայն Առողջապահության նախարարությունն է տիրապետում ։

Փաստացի՝ նախարարությունն «ահաբեկվել է», որ դեռեւս փետրվարի 13-ի դրությամբ փորձաքննության տվյալներն արդեն իսկ գերազանցում է զոհերի թվի մասին փոխվարչապետի կանխատեսված թիվը եւ փորձում են այն սրբագրել։

Ի դեպ, նշենք, որ փետրվարի 13-ից հետո ԱՀ ՆԳՆ ԱԻՊԾ-ն նոր աճյուններ է հայտնաբերել ռազմական գործողությունների տարածքում, բացի այդ՝ 106 մարմին հայկական կողմին է փոխանցել հենց Ադրբեջանը։

Բացի այդ՝ ՌԴ պաշտպանության նախարարությունը հայտարարել է, որ անհետ կորածների խնդրով 2392 մարդ է դիմել ռուս խաղաղապահներին։ Նրանց ճակատագրի մասին, սակայն մինչև օրս տեղեկություններ չկան։

Աղբյուր` Փաստինֆո