Փաստ ինֆո

Ներքին Կարմիրաղբյուրում որոշակի խնդիրներ առաջացան գույքի գրանցման հետ կապված և մինչ օրս հնարավոր չի եղել գույքերը գրանցել համայնքի հաշվեկշռում, որպեսզի կարողանանք այնտեղ աշխատանքները սկսել։ Կառավարության նիստի ժամանակ այս մասին ասաց ՀՀ քաղաքաշինության կոմիտեի նախագահ Արմեն Ղուլարյանը՝ անդրադառնալով Տավուշի մարզի սահմանամերձ բնակավայրերում նախորդ տարի մեկնարկած աշխատանքներին։

ՀՀ վարչապետ Նիկոլ Փաշինյանը հետաքրքրվեց, թե ինչու հնարավոր չի եղել․ «Ի վերջո լուծվելու՞ է այդ հարցը, թե չէ։ Այսքան ժամանակ ինչի՞ չի լուծվել»,-ասաց վարչապետը։

Արմեն Ղուլարյանն ասաց, որ դա իրենց դաշտում չէ, և համայնքը պետք է լուծեր այդ հարցերը։

Վարչապետը նկատեց՝ մարդկանց խոստացել են, ֆինանսավորումը տվել են, նախագիծը հաստատել, բայց պարզվում է՝ մինչև հիմա աշխատանքները չեն սկսվել։ Արմեն Ղուլարյանն ասաց, որ հողային աշխատանքները սկսել են, սակայն աշխատանքներն այժմ դադարել են։

ՀՀ տարածքային կառավարման և ենթակառուցվածքների նախարար Սուրեն Պապիկյանը վստահեցրեց՝ հետամուտ կլինի և կճշտի, իսկ վարչապետը բարկացավ․ «Բայց տենց չի լինի։ Մենք ե՞րբ ենք այնտեղ եղել, օգոստոս-սեպտեմբեր ամիսներին, մարդկանց հետ ասել-խոսել ենք ու պարզվում է, որ մինչև հիմա գրանցման հարց կա՞»։

«Կպարզեմ, կզեկուցեմ»,-ասաց նախարարը, իսկ վարչապետը նկատեց․ «Պետք չէ պարզել ու զեկուցել, պետք է գնալ, լուծել հարցը և զեկուցել, որ արված է ամեն ինչ»։

Աղբյուր` Փաստինֆո