Փաստ ինֆո

Զավեշտալի հայտարարություն է, եթե նման փաստ ունեն, թող ներկայացնեն: Արմեն Գրիգորյանը երևի շփոթում է իր ղեկավար կապիտուլյանտին՝ հաղթած ղեկավարի հետ: Այս մասին «Փաստինֆո»-ի հետ զրույցում ասաց ՀՀԿ խոսնակ, ԱԺ նախկին փոխնախագահ Էդուարդ Շարմազանովը՝ անդրադառնալով ԱԱԽ քարտուղար Արմեն Գրիգորյանի հայտարարությանը՝ թե Ապրիլյան պատերազմը կանգնել է հայկական կողմի խոստումների պատճառով.

«Այդ մարդը բազմաթիվ այդպիսի խոստումներ տալով, ստեղծելով այդպիսի բեռ Հայաստանի համար՝ լքում է պաշտոնը և հետո գալիս ու հայտարարում է՝ ես պատրաստ էի ստորագրելու, պատրաստ էի ինչ-որ քայլերի, մինչդեռ ես հստակ ասեմ՝ իր տված խոստումների, իր ստեղծած փակուղու պատճառով մենք կանգնել էինք լուրջ խնդիրների առաջ»,-հայտարարել էր Արմեն Գրիգորյանը:

Մեզ հետ զրույցում Էդուարդ Շարմազանովը այս հայտարարությունը որակեց անհիմն։

«Դա կատարյալ հիմարություն էր: Հայտնի փաստ է, որ Ադրբեջանն է ձախողել Ապրիլյան ռազմական գործողությունները, Ադրբեջանն է դիմել ռուսական կողմին, որպեսզի պատերազմը կանգնեցվի, քանի որ Ադրբեջանը չի կարողացել հասնել ռազմական և դիվանագիտական իր նպատակներին: Արմեն Գրիգորյանը, երևի, շփոթում է իր ղեկավարին կապիտուլյանտին՝ հաղթած ղեկավարի հետ: Եթե Ադրբեջանին խոստում էին տվել, ինչպես ապրիլյան պատերազմից հետո Վիեննայի և Սանկտ Պետերբուրգի բանակցային գործընթացներն ի հայտ եկան, որը ձեռնտու էր Հայաստանին, այլ ոչ՝ Ադրբեջանին»:

Գործիչը հիշեցրեց, որ Ապրիլյան պատերազմից հետո Ալիևը կառավարությունում բողոքում էր, որ իրեն ճնշում են ճանաչել Արցախի անկախությունը.

«Միջազգային հանրությունը միահամուռ քննադատեց և դատապարտեց Ադրբեջանի գործողությունները»,-ասաց Շարմազանովը՝ ավելացնելով, որ Ադրբեջանը մշտապես փորձել է բոլորին համոզել, որ Արցախն է հարձակվել Ադրբեջանի վրա, բայց չի հաջողվել միջազգային հանրությանը համոզել.

«Արցախի հարցով ի՞նչի շուրջ մենք բանակցել ենք, բարձրաձայնել ենք: Ավելին՝պատերազմից հետո Ադրբեջանը ջանք ու եռանդ չէր խնայում, որ ստորագրվի նոր զինադադար , հայկական կողմը, նախագահ Սարգսյանի ղեկավարությամբ, պնդեց, որ նոր զինադադար լինի և ուժի մեջ մնա 1994թ-ի եռակողմ զինադադարը, որը ստորագրվել էր նաև Արցախի ՊԲ հրամանատարության կողմից: Հողատու կապիլտուլյանտները, որոնք 5000 զոհի պաճառ են դարձել, փչացրել են հարաբերությունները մեր դաշնակիցների հետ, թուրքին են հանձնել Շուշին, Հադրութը»,-ասաց ՀՀԿ խոսնակը:

ԱԱԽ քարտուղար Արմեն Գրիգորյանի հայտարարությունը որակելով սուտ՝ Էդ. Շարմազանովը կոչ արեց պարտությունը չբարդել ուրիշների վրա.

«Խոսում է մի քաղաքական ուժի ներկայացուցիչ, որի ղեկավարը խորհրդարանում Ալիևին կառուցողական էր անվանում,այստեղ մեկնաբանելու բան չկա, դա լկտի սուտ է, թող իրենք իրենց կապիտուլյացիան որևէ մեկի վրա չփաթաթեն: Սերժ Սարգսյանն այն եզակի առաջնորդն է, որ և՛ 90-ականներին է հաղթել Ալիևի հորը, և՛ 2016թ-ին հաղթել է Ալիևին: Մենք երբեք հողատուի նման պառլամենտում չենք հայտարարել, որ Ալիևը կառուցողական է, կամ այնպիսի լուծում պետք է լինի, որ ձեռնտու լինի Ադրբեջանի ժողովրդին: Թուրքի առջև ծնկի եկած, Ալիևի և Էրդողանի շահերի սպասարկու իշխանությունը պետք է ձայնը կտրի»,-ասաց քաղաքական գործիչը:

Անդրադառնալով «Լուսավոր Հայաստան» խմբակցության ղեկավար Էդմոն Մարուքյանի հայտարարությանը՝ թե չի հավատում, որ Ադրբեջանն է խնդրել դադարեցնել Ապրիլյան պատերազմը.Շարմազանովն արձագանքեց.

«Ինձ չի հետաքրքրում ով է հավատում, ով՝ ոչ: Իր խնդիրն է՝ Մարուքյանը հավատում էր Փաշինյանի հավաստիացումներին, որ Արցախյան բանակցություններում հակահայկական գործողություններ տեղի չեն ունենում , բայց հետո տեսանք՝ ինչ եղավ»:

Դառնալով արտահերթ խորհրդարանական ընտրությունների հեռանկարին՝ ՀՀԿ խոսնակը կարծում է, որ Նիկոլ Փաշինյանի օրոք կազմակերպված արտահերթ ընտրությունները կեղծ օրակարգ է, իսկ ընդդիմության և ազգային ուժերի միակ օրակարգը պետք է լինի՝ օրինական ճանապարհով պարտադրել Փաշինյանին հեռացում:

«Հանրապետականը» մանդատի կռիվ չի անում, ռևանշի չի ձգտում: «Հանրապետականի» խնդիրն է օր առաջ ազատվել այս ազգային աղետից»,-ասաց Շարմազանովը:

Հարցին՝ թե ընտրություններին մասնակցելու դեպքում ՀՀԿ-ն կունենա բավարար զանգված, Շարմազանովը պատասխանեց.

«2018թ-ին հողատուի կազմակերպած այլանդակ ատելության մթնոլորտում «Հանրապետականը» շուրջ 60 հազար ձայն է հավաքել: Մենք ապացուցել ենք, որ ամենասկզբունքային, գաղափարական և ամենաընդդիմադիր քաղաքական ուժերից է, որն ունի բոլոր հնարավորությունները պաշտպանելու ազգային շահը, այս պահին այս ազգային աղետից ազատվելն է՝օրինական ճանապարհով»,-ասաց ԱԺ նախկին փոխնախագահը:

Մեր խնդրանքով զրուցակիցն անդրադարձավ նաև իմքայլական պատգամավորների հայտարարությանը, որ նախկին 10 տարիները եղել են հակաղարաբաղյան, քանի որ այդ ժամանակ Արցախում որևէ ներդրում չի եղել.

«Ես քաղաքական կապիտուլյանտների հիմար հայտարարություններին գնահատական տալու ցանկություն չունեմ , հատկապես, որ իրենք են համարում որ իրենց մի մասը հողատուի ուսապարկերն են կամ սելֆիի ձողը, ես ուսապարկերին և սելֆիի ձողերին պատասխանելու կարիք չունեմ, պարզապես հանրության համար կարող եմ պաշտոնական տվյալներ ասել, որ միայն «Հայաստան» համահայկական հիմնադրամի միջոցով 100 մլն դոլարի ներդրում է արվել Արցախում, կառուցվել է Վարդենիս-Սոթք-Քարվաճառ ավտոճանապարհը»,-ասաց Էդուարդ Շարմազանովը:

Աղբյուր` Փաստինֆո