Փաստ ինֆո

Հայաստանում փետրվարի 16-ի դրությամբ կատարվել է 687. 715 թեստավորում, որից ընդամենը 103.155-ն են եղել հայկական արտադրության։ Այս մասին «Փաստինֆո»-ի գրավոր հարցմանն ի պատասխան հայտնել են ԱՆ-ից։ 

Դեռևս 2020-ի մարտի 31-ին Տիգրան Ավինյանը հայտարարեց, որ Հայաստանում գիտական մակարդակով քննարկվում է կորոնավիրուսի ախտորոշման տեղական թեստերի արտադրության հարցը, իսկ մայիսի 20-ին թեստի առաջին օրինակն օգտագործվեց, սեպտեմբերից էլ սկսվեց հայկական թեստերի կանոնավոր օգտագործումը։

Հայաստանում կորոնավիրուսի թեստերի արտադրությամբ զբաղվել է Մոլեկուլային կենսաբանության ինստիտուտը: Կառավարությունը 550 հազար դոլար էր հատկացրել արտադրության համար, իսկ անհրաժեշտ նյութերը գիտնականները ստացել էին դեռ մայիսին: Աշխատանքներն իրականացնելուց հետո արդեն թեստերի որոշակի քանակ փոխանցել էին Առողջապահության նախարարության Հիվանդությունների վերահսկման և կանխարգելման կենտրոն՝ փորձարկման:

Հունիսի 12-ին խորհրդարանում 2019 թվականի պետական բյուջեի կատարման հաշվետվության քննարկման ժամանակ առողջապահության նախկին նախարար Արսեն Թորոսյանը հայտնել էր, թե կորոնավիրուսի թեստերի տեղական արտադրությունը թույլ կտա զգալիորեն կրճատել պետության ծախսերն այդ ուղղությամբ: Ըստ նրա՝ Չինաստանից ձեռք բերվող ՊՇՌ - թեստերի դեպքում կորոնավիրուսի մեկ թեստի արժեքը կազմում է շուրջ 30 դոլար: Հաշվի առնելով, որ այդ օրերին Հայաստանում իրականացվում էր COVID-19 - ի շուրջ 1000 թեստ՝ օրական , ապա մեկ օրվա հաշվարկով ծախսերը հասնում են 30 հազար դոլարի, իսկ ամսական կտրվածքով՝ 1 մլն դոլարի: Թորոսյանը հույս էր հայտնել, որ հայրենական թեստերի արտադրությունը թույլ կտա զգալիորեն նվազեցնել այդ ծախսերը:

«Փաստինֆո»-ն գրավոր հարցում էր ուղարկել նախարարություն՝ պարզելու, թե մինչ օրս հայկական արտադրության քանիս թեստ է օգտագործվել ՝ անվճար կատարվող թեստավորման արդյունքում։ Եւ ընդհանրապես՝ պետպատվերի շրջանակներում քանի թեստ է կատարվել մինչ օրս Հայաստանում։

Նախարարությունը երկու հարցին միասին տվել է մեկ պատասխան «Առողջապահության նախարարությունն ստացել է հայկական արտադրության 103.155 թեստ և բոլորը սպառվել են»։

Նկատենք, որ Հայաստանում շատ մեծ տոկոս է կազմում վճարովի հիմունքներով թեստավորումը. Քաղաքացիները հաճախ իրենք են գնում վճարովի լաբորատորիաներ՝ թեստավորման՝ ջերմություն կամ ինքնազգացողության վատթարացում նկատելու դեպքում։ Իսկ թեստերի գները տարբեր են՝ 12.000-20.000 դրամ։ Նկատի ունենալով, որ մեր այն հարցին, թե պետպատվերի շրջանակներում քանի թեստ է իրականացվել՝ Առողջապահության նախարարությունը տրամադրել է 103.155 թիվը, ապա այս պատասխանից հետեւում է, որ շուրջ 580 հազար թեստը Հայաստանում իրականացվել է վճարովի հիմունքներով եւ պետությունն ուղղակի փող է աշխատել՝ քաղաքացիներին վաճառելով թեստերը։

Աղբյուր` Փաստինֆո