Փաստ ինֆո

Արցախյան պատերազմի ժամանակ Լաչինը վերցրինք, որովհետև առանց Լաչինչ Արցախը պահել հնարավոր չէր, հետո՝ Քարվաճառը վերցրինք, որովհետև եթե Քարվաճառը մեր ձեռքում չլիներ, Մարտակերտը չէինք կարող վերցնել և պահել։ Մենք առաջ էինք գնում, բայց հասկանում էինք, թե մոդելը որն է, ինչ ենք ուզում։ Այս մասին լրագրողների հետ զրույցում ասաց «Հայրենիքի փրկության շարժման» միասնական թեկնածու Վազգեն Մանուկյանը՝ անդրադառնալով ՀՀ երրորդ նախագահ Սերժ Սարգսյանի հարցազրույցին։

«Մենք ուզում էինք, որ Արցախն ունենա անկախություն և ինչ-որ ճանապարհով կամ շրջանով միացված լինի Հայաստանին, բանակցություններում հենց այդ հարցն էր քննարկվում։ Ամենաբարդ հարցն անկախության հարցն էր, Ադրբեջանը ոչ մի կերպ չէր ընդունում անկախության հարցը և Ալիևին կարելի էր հասկանալ, որովհետև, եթե այդպիսի բան աներ՝ ժողովուրդն իրեն կգզեր»,- նշեց նա՝ հավելելով, որ հենց այդ պատճառով էլ վերջին ժամանակահատվածում հարցը դրվում էր անորոշ ժամանակով հետաձգելը։
Ըստ Մանուկյանի՝ այդ ճանապարհին լուծումներ կային և ափսոս, որ այդ ճանապարհով չեն գնացել՝ քարուքանդ անելով ամբողջ բանակցային գործընթացը։

Մանուկյանը հնարավոր է համարում փոփոխություններ՝ բանակցային գործընթացում, քանի որ Ղարաբաղյան հակամարտության այդ կարգավորման հարցը երեք հզոր պետությունների ներկայացուցիչներով և համաշխարհային կարծիքով բաղկացած էր երկու հարցից՝ Ադրբեջանի տարածքների ամբողջականությունից և ինքնորոշման իրավունքից, ամբողջ խնդիրը երկու հակադիր սկզբունքների ձևավորման հարցն է։

«Երբ մենք հաղթեցինք պատերազմում, Ադրբեջանը չընկճվեց, չասաց, որ իրենց ձեռքից արդեն ամեն ինչ վերցրել են, ամեն ինչ կորած է, շարունակեց բանակցությունները և պատերազմի միջոցով լուծեց հարցը ինչ որ չափով, բայց հարցը լուծված չէ, Արցախի ինքնորոշման հարցը գոյություն ունի և պատահական չէ, որ հայտարարության մեջ հատուկ նշվում է, որ Արցախը միանում է Հայաստանին ինչ որ ճանապարհով, այսինքն՝ Արցախը չեն մտցնում Ադրբեջանի մեջ, խաղաղապահ զորքեր են տեղակայում»,- նշեց նա։

Աղբյուր` Փաստինֆո