Փաստ ինֆո

ՀՀԿ անդամ, ԱԺ նախկին պատգամավոր Վահրամ Բաղդասարյանի խափանման միջոցը վերացնելու հարցը դատավոր Մնացական Մարտիրոսյանը չի քննի։ 

Ինչպես արդեն տեղեկացրել ենք՝ Վահրամ Բաղդասարյանի նկատմամբ որպես խափանման միջոց չհեռանալու մասին ստորագրությունն ընտրելու որոշման դեմ բողոք է ներկայացվել դատարան։ Պաշտպանական կողմը գտնում է, որ Բաղդասարյանի նկատմամբ առհասարակ որևէ խափանման միջոց կիրառելու անհրաժեշտություն չկա։

Բողոքի գործով դատական նիստի օր էր նշանակվել երեկ, սակայն նախագահող դատավոր Մնացական Մարտիրոսյանը սեփական նախաձեռնությամբ ինքնաբացարկ է հայտնել։

«Դատավորն ինքնաբացարկ հայտնեց՝ իր նախաձեռնությամբ, քանի որ իմ վստահորդի հետ անձնական հարաբերություն են ունեցել և, թեև ինքն ասել է, որ անաչառ է և դա իրեն չի կաշկանդում, սակայն հետագայում որևէ մեկի մոտ կասկած չհարուցելու համար, ինքնաբացարկի միջնորդություն ներկայացրեց։ Կողմերին նաև առաջարկեց՝ իր բացակայությամբ քննարկել ՝ ընդունել անվստահությունը, թե ոչ»,- այս մասին «Փաստինֆո»-ի հետ զրույցում ասաց փաստաբան Ռուբեն Հակոբյանը՝ նշելով, որ ինքը դեմ չի եղել, որ շարունակեր դատավորը, սակայն մեղադրանքի կողմից հանդես եկող դատախազները գտան, որ պետք է այլ դատավոր քննի։

Հիշեցնենք, որ Արցախի հողերի մեծ մասը Ադրբեջանին հանձնելու Փաշինյանի որոշման դեմ Երեւանում սկսված բողոքի ակցիաներին զուգահեռ իշխանություններն անցել են զանգվածային քաղաքական հետապնդումների՝ հարուցվել են քրեական գործեր՝ բողոքի ակցիաներ կազմակերպելու, ապա նաեւ՝ Փաշինյանի ենթադրյալ սպանությունը նախապատրաստելու հատկանիշներով։ Մի քանի տասնյակ ընդդիմադիր եւ հասարակական գործիչ ձերբակալվել է, որոնցից մի մասին նաեւ մեղադրանքներ են առաջադրվել՝ օրենքի խախտմամբ հավաքներ կազմակերպելու և անցկացնելու, իսկ Արթուր Վանեցյանին, Վահրամ Բաղդասարյանին և Աշոտ Ավագյանին, նույն ջոկատի լեգենդար հրամանատար Աշոտ Մինասյանին՝ նաեւ իշխանության յուրացման, Փաշինյանի ենթադրյալ սպանության նախապատրաստման, ապօրինի զենք զինամթերք պահելու համար։ Նրանց կալանավորելու միջնորդություններ է ներկայացվել դատարաններ, որոնք մերժվել են։

Դատախազությունը բողոքարկել է դատական ակտերը՝ պահանջելով կալանավորել վերջիններիս, ինչը ևս մերժվել է։ Վարույթն իրականացնող մարմինը Բաղդասարյանի նկատմամբ որպես խափանման միջոց է կիրառել ստորագրությունը՝ չհեռանալու մասին։

Հեղինակ՝ Իզաբել Սահակյան

Աղբյուր` Փաստինֆո