Փաստ ինֆո

«Հայոց Ցեղասպանության ճանաչման խնդիրը դրված է Հայաստանի Անկախության հռչակագրում, հետևաբար և´ իրավական, և´քաղաքական առումներով, Հայաստանի որևէ իշխանություն չի կարող գնալ մի այնպիսի քայլի, որը կստվերի Անկախության հռչակագրով հաստատված դրույթները: Բացի այդ, Հայոց Ցեղասպանության միջազգային ճանաչումը ոչ միայն հայկական քաղաքականության անկյունաքարային կետերից մեկն է, ինչպես նաև՝ Հայաստանի արտաքին քաղաքական առաջնահերթություն, այլև համաշխարհային ստանդարտներով՝ անվտանգության և արդարության հաստատման պրոցես: Ցեղասպանության խնդիրը Հայաստանը դիտարկել և դիտարկում է, ոչ միայն համահայկական, այլև համամարդկային տեսանկյունից, որովհետև դրա ճանաչումը մի կարևոր քայլ կլինի, որը կկանխարգելի այլ ազգերին՝ նման ճակատագրի չարժանանալու հեռանկարը», - «Փաստինֆո»-ի հետ զրույցում ասել է ասում է ԵՊՀ Արևելագիտության ֆակուլտետի դեկան, թուրքագետ Ռուբեն Մելքոնյանը։

Նկատենք, որ փորձագիտական դաշտը մտահոգություններ է հայտնում, թե օրվա իշխանությունները նախապատրաստվում են մարտ ամսին՝ արդեն թշնամի Թուրքիայի հետ կնքվելիք հերթական գաղտնի և, թերևս, աննախադեպ ստորացուցիչ փաստաթղթի ստորագրմանը, որտեղ կարող է արծարծվել Թուրքիայի կոկորդին մնացած Հայկական հարցի չեղարկման և Հայոց Ցեղասպանության միջազգային ճանաչման գործընթացի խնդիրը եւ «Փաստինֆո»-ի հետ զրույցում թուրքագետ Ռուբեն Մելքոնյանը եւս չբացառեց դրա հավանականությունը.

«Կոնկրետ այս իշխանություններ պարագայում որևէ բացասական անակնկալ, այլևս չեմ բացառում, հետևաբար, չի կարելի բացառել այնպիսի քայլեր, որոնք, ուղղակիորեն, կարող են հարված հասցնել մեր պետականության հիմնաքարային հարցերին, մեր անվտանգությանն ու ազգային արժանապատվությանը: Գոնե, վերջին մի քանի ամիսների ընթացքում, մենք այդպիսի բազմաթիվ իրավիճակների ականատես եղանք, որոնք արվեցին՝ ի հաշիվ մեր ազգային և պետական արժանապատվության»։

Հարցին առավել սթափ և աշխարհաքաղաքական շահերի տեսանկյունից մոտենալու պարագայում՝ Ռուբեն Մելքոնյանը նկատում է՝ Թուրքիայի համար սա, թերևս, ամենահարմար պահն է՝ Հայաստանից պոկելու բոլոր այն զիջումները, որին տասնամյակներ շարունակ ձգտել է, բայց չի ստացել. «Ճակատագրի հեգնանքով, Հայաստանում իշխանությունն այսօր գտնվում է մի խմբի ձեռքում, որը ոչ միայն ապաշնորհ է կառավարման հարցերում, այլև տգետ է պատմական փաստերի ու պատմական փորձառության և դրանից բխող հետևանքների գիտակցման պարագայում: Այնպես որ, սառը քաղաքական հաշվարկը ցանկացած թշնամի երկրի, այդ թվում նաև Թուրքիային, կդրդեր նմանօրինակ իշխանության հետ տարատեսակ գործարքների գնալ»:

Հնարավոր է արդյո՞ք մի գեղեցիկ օր տեղեկանանք, որ հայաստանյան ներկայիս իշխանությունները, ինչպես նոյեմբերի 10-ին, բոլորից գաղտնի ստորագրեցին Արցախի տարածքների 75 տոկոսի հանձնման համաձայնագիրը, նույն կերպ՝ Թուրքիայի հետ միասին, չեղարկեն նաև Հայկական հարցի և Հայոց Ցեղասպանության միջազգային ճանաչման գործընթացը և, թե ի՞նչ քայլեր պետք է ձեռնարկվեն նման իրավիճակում: Ռուբեն Մելքոնյանը նման վարկածի գոյությունը չի բացառում.

«Ես չեմ բացառում այդ սցենարը, որ օրվա իշխանությունները Թուրքիայի հետ միասին կարող են, բառացիորեն, այնպիսի համաձայնության գալ, որը կստվերի մեր ազգային կարևոր նպատակներն, այդ թվում նաև՝ Հայկական հարցի և Հայոց Ցեղասպանության ճանաչման գործընթացը: Ո՞րը պետք է լինի հասարակության արձագանքը նման իրավիճակում՝ ամենակտրուկ և բացասական վերաբերմունքը, սակայն, ցավոք, մենք տեսնում ենք, որ մեր հասարակության զգոնությունը թուլացել է, եթե չասեմ, որ այն գտնվում է զրոյական կետի վրա և դեռ սիստեմատիկ կերպով այդ զգոնությունը թուլացնելուն միտված քայլեր են արվում են: Այդ մասին են վկայում Ազգային Ժողովում բարձրաստիճան այս կամ այն պաշտոնյաների ելույթները, նրանց կողմից պատմական քաղաքների աղավաղված տեղանունների կիրառությունները և այլն:

Չմոռանանք նաև Հայոց Ցեղասպանության հարցի վերաբերյալ այս իշխանության և իշխանությանը մերձ կանգնած որոշ անձանց հետևողական քայլերը, որոնք արվել են վերջին շրջանում: Այնպես որ, հնչեցված հարցի առնչությամբ պատասխանս մեկն է՝ այսքանից հետո հասարակությունը պետք է ընդվզի ու մերժի այսօրինակ որոշումները, սակայն, ցավոք, այսօրվա հասարակության մեջ մի շերտ է ձևավորվել, որը չի կարողանում գիտակցել մեր անվտանգությանը սպառնացող խիստ վտանգավոր մարտահրավերների իրական հետևանքները»,- ամփոփելով զրույցն ասել է ԵՊՀ Արևելագիտության ֆակուլտետի դեկան, թուրքագետ Ռուբեն Մելքոնյանը:

Հեղինակ՝ Նվարդ Մանվելյան

Աղբյուր` Փաստինֆո