Փաստ ինֆո

Հանրության արձագանքները մեզ հուշում են, որ փետրվարի 20-ին բավականին բազմամարդ հանրահավաք է լինելու։ Այս մասին Ազատության հրապարակում լրագրողների հետ զրույցում ասաց Հայրենիքի փրկության շարժման համակարգող, ՀՅԴ Հայաստանի ԳՍ ներկայացուցիչ Իշխան Սաղաթելյանը:

«Փաստինֆո»-ի հարցին՝ թե ինչով է փետրվարի 20-ի հանրահավաքը լինելու ակորդային՝ նկատի ունենալով, որ նման որակումներ եղել են նաեւ նախորդ հանրահավաքների վերաբերյալ ՝ Սաղաթելյանն ասաց՝ «Դա որ ասեմ, հետաքրքրությունը կկորի, այդ օրը կտեսնեք»: Ըստ նրա՝ շարժման լիդերները ևս ներկա են լինելու հանրահավաքին:

ՀՅԴ ԳՄ ներկայացուցիչը հաստատեց, որ նախօրեին «Հայրենիքի փրկության շարժման» 6 լիդերները հանդիպել են՝ տեղեկացնելով, որ հանդիպմանը քննարկվել են Հայրենիքի փրկության շարժման, ինչպես նաև փետրվարի 20-ի հանրահավաքի վերաբերյալ մի շարք հարցեր.

«Բնական հանդիպումներ են, որ պարբերաբար տեղի են ունենում տարբեր ձևաչափերով»,- ասաց նա եւ ավելացրեց. «Մեր ամբողջ նպատակը գործոց իշխանության հեռացումն է ։ Հանրահավաքներն ինքնանպատակ չեն, մեր գլխավոր նպատակն այս իշխանություններին րոպե առաջ հեռացնելն է, և մեր բոլոր գործողությունները՝ այդ թվում նաև փետրվարի 20-ի հանրահավաքն ու դրանից հետո տեղի ունեցող գործողությունները բխելու են այդ նպատակից»։

Դառնալով քաղաքացիների հետ այս օրերին, այդ թվում Ազատության հրապարակում տեղի ունեցող հանդիպումներին՝ Ի. Սաղաթելյանը նշել է , որ դրանց ընթացքում քաղաքացիներն իրենց տարբեր առաջարկներ են ներկայացնում, որոնք արձանագրվում են, քննարկվում՝ իրականացնելու համար։ «Քաղաքացիները պահանջում են րոպե առաջ հեռացնել այս իշխանություններին։ Երբ իշխանական պատգամավորներից մի քանիսն ասում են՝ իրենց պահանջում են մնալ իշխանության, առաջարկում եմ գալ, շփվել ժողովրդի հետ և տեսնել՝ իրենց մասին ինչ են ասում մեր քաղաքացիները»,-ասաց նա։

Ինչ վերաբերում է իշխանության հայտարարությանը, թե վերջինիս հրաժարականի հանրային պահանջ չկա, Սաղաթելյանն ասաց․ «Հանրային պահանջի հարցումն իրենք արել են կա՛մ իրենց խմբակցության ներսում, կա՛մ Ադրբեջանի խորհրդարանում: Ես առաջարկում եմ, որ Նիկոլ Փաշինյանը փաստի, որ 850,000 ընտրող ունի, կտեսնենք՝ քանի ընտրող ունի։ Երբ ասում է՝ հասարակական պահանջ չկա, դրանով վիրավորում է մեր ժողովրդին, հասարակությանը։ Չի կարող հայ մարդը հանդուրժել այն իշխանությանը, որը մեր պետությունը կանգնեցրեց աղետի եզրին։ Հասարակական պահանջ կա, և այս իշխանությունը պետք է հեռանա»։

Անդրադառնալով իմքայլական պատգամավորների հայտարարություններին՝ թե նախկին 10 տարիները եղել են հակաղարաբաղյան, քանի որ այդ ընթացքում Արցախում որևէ ներդրում չի եղել, Սաղաթելյանն արձագանքեց․ ««Իմքայլականները» չեն կարող իրենց դավաճանությունը, անգործությունն անընդհատ փորձել փաթաթել նախկինների, սրա-նրա վրա։ Իրենք են ամբողջապես պատասխանատու մեր երկրում ստեղծված այս իրավիճակի համար»,-ասաց նա։

Աղբյուր` Փաստինֆո