Փաստ ինֆո

«Պետականության և պետության գահավիժման պրոցեսը պետք է կասեցնել, որին հասնելու համար ժողովուրդը իշխանություններին պետք է հեռացնի։ Հաջորդ քայլերը նույն չափ  պատասխանատու են լինելու, որպեսզի կարողանանք շտկել իրավիճակը՝ «փոսից» դուրս գալու համար»,- այս մասին Ազատության հրապարակում հայտնեց ՀՀ նախկին վարչապետ Խոսրով Հարությունյանը։

Վերջինիս պնդմամբ, իրենց պայքարը աթոռակռիվին վերագրելը,  սխալ է։ Նիկոլ Փաշինյանը ևս, շարժումը հանրության մոտ ներկայացնում է որպես աթոռակռիվ, սակայն Հարությունյանի պնդմամբ՝ իրենք ապակուսակցական են, ոչ թե ապաքաղաքական։

«Մեզանում կուսակցությունը և պետություն հասկացությունները սկսել են հոմանիշներ դիտել։ Եթե պետությունը կուսակցությունն է կամ իշխանություն է, այսինքն՝ եթե մենք իշխանության մեջ չենք, ապա  պետությունից դու՞րս ենք։ Իհարկե ոչ։ Ուզում եմ, որ քաղաքացիները գիտակցեն, որ պետությունը միայն ոչ միայն իշխանությունն է։ Եթե դուք հիասթափվել եք Պողոս Պողոսյանից, կամ կուսակցությունից, չի նշանակում, որ պետք է կորցնեք հավատքը պետության նկատմամբ»։

Անդրադառնալով Կապան համայնքի Ագարակ գյուղից մեկ կմ հեռավորության վրա թշնամու անկանոն կրակոցներին, Հարությունյանը նշեց, որ հետո կրակոցներն այլևս անկանոն չեն լինի։

«Դուք կարծում եք, որ եթե այսօր օդ են կրակում, վաղը ի՞նչ ուղղությամբ պետք է կրակեն։ Խոսքը գնում է Սյունիքը իրականում լուրջ սպառնալիքների տակ թողնելու մասին, ինչը սարսափելի վտանգավոր է»,-եզրափակեց Խոսրով Հարությունյանը։

Աղբյուր` Փաստինֆո