Փաստ ինֆո

ՀՀ նախկին ղեկավարների այս հարցազրույցների շարքն ավելի շատ ինքնապաշտպանական բնույթ է կրում, քան որևէ փաստարկ կարող են իրենց մեջ ներառել։ Խորհրդարանում լրագրողների հետ զրույցի ժամանակ այս մասին ասաց ԱԺ «Իմ քայլը» խմբակցության պատգամավոր Արփի Դավոյանը։ 

Դիտարկմանը, որ իրենց թիմը մերժեց ՀՀ երրորդ նախագահ Սերժ Սարգսյանին, սակայն վերջինս անցնում է քրեական գործով, բայց չկա օրինական ուժի մեջ մտած վճիռ, Արփի Դավոյանն ասաց․ «Նախ Սերժ Սարգսյանին չի մերժել մեր թիմը, Սերժ Սարգսյանին մերժել է ՀՀ ժողովուրդը։ Եթե միայն մեր թիմի մերժելով լիներ, իրադարձությունների նման ընթացք և հանգուցալուծում չէր լինի։ Այսինքն այն, ինչ տեղի է ունեցել երեք տարի առաջ, տեղի ունեցել ոչ թե մեր թիմի կամքով, այլ դա եղել է տարիներ շարունակ Սերժ Սարգսյանի վարած քաղաքականության արդյունքը։ Կլինեն դատավճիռներ և ոչ միայն Սերժ Սարգսյանի վերաբերյալ։ Այն, ինչ մենք ասել ենք, հետևողական գնում ենք այդ ճանապարհով։ Գուցե ճշմարտության ճանապարհը դանդաղ է, սակայն դա չի նշանակում, որ այն ինչ ասել ենք, իրականություն չի դառնալու»,-ասաց պատգամավորը։

Վերջինս նշեց, որ ՀՀ նախկին ղեկավարներն իրականում ասելիք չունեն, և այն, ինչ այսօր տեղի է ունենում, տարիներ շարունակ իրենց վարած քաղաքականության արդյունքն է։

Դիտարկմանը, որ ՀՀ վարչապետ Նիկոլ Փաշինյանն ասում էր՝ բանակցությունները սկսել է իր կետից, այնինչ տեսնում ենք այն, ինչ եղավ, պատգամավորն ասաց․ «Ես կարծում եմ՝ վարչապետը բավականին հստակ ասել է իր փաստարկները։ Դա նախկինների վարած քաղաքականության արդյունքն է, սակայն այն, ինչ ասել է ՀՀ վարչապետ Նիկոլ Փաշինյանը բանակցությունների վերաբերյալ, ասել է այն, ինչ եղել է։ Չեմ պատրաստվում մեկնաբանել վարչապետի ասածը, որովհետև վարչապետն արդեն ասել է այն, ինչ իրականում կա»,-նշեց Արփի Դավոյանը։

Աղբյուր` Փաստինֆո