Փաստ ինֆո

Ադրբեջանը մտել է պատերազմական նոր փուլ, որը կոչվում է հոգեբանական պատերազմ, ամեն ձևով փորձում են վախի մթնոլորտ առաջացնել, փորձում են ճնշել, բայց այդ ամենը չի ազդում սյունեցիների վրա և սյունեցիների մոտ խուճապ չկա: Այս մասին «Փաստինֆո»-ի հետ զրույցում ասաց «Լուսավոր Հայաստան» խմբակցության սյունեցի պատգամավոր Սրբուհի Գրիգորյանը:

Հիշեցնենք, որ ՄԻՊ Արման Թաթոյանը այսօր հերթական զեկույցը հրապարակեց առ այն, որ Ադրբեջանցիները Սյունիքի գյուղերի անմիջական հարևանությամբ կրակում են ինչպես փոքր, այնպես էլ խոշոր տրամաչափի զինատեսակներից: Այս տեղեկությունը «Փաստինֆո»-ի հետ զրույցում հաստատել է նաեւ Սյունիքի մարզի Ագարակի համայնքապետը՝ նշելով, որ ադրբեջանցիներն այս օրերին իրենց դիրքերն ավելի են մոտեցրել գյուղին։

Սրբուհի Գրիգորյանը մեզ հետ զրույցում ընդգծեց, որ իշխանությունը պետք է օր առաջ այս խնդիրները լուծի։

«Շատ մոտ է գյուղատնտեսական շրջանը, շուտով հովիվները անասուններին հանելու են դաշտ, իսկ Սյունիքը հիմնականում անասնապահական շրջաններով է հայտնի, ուստի մենք բազմաթիվ խնդիրներ ենք ունենալու: Իշխանությունը հապաղում է: Ես անձամբ անվտանգության հետ կապված հարցերը բարձրաձայնել եմ Փաշինյանի մոտ,ով խուսանավելով, մեղքը ուրիշների վրա բարդելով պատասխաններ է տվել, այսպես չենք կարող որևէ լավ տեղ գնալ »,-ասաց ԼՀԿ խմբակցության պատգամավորը:

Սրբուհի Գրիգորյանը նկատեց, որ այս խնդիրները պետք է լուծվեին նախապես, և մինչև տարածքներ հանձնելը պետք էր Ադրբեջանից երաշխիքներ ստանալ, որ առաջիկա 10 տարվա ընթացքում ռազմական որևէ գործողություն Ադրբեջանը չի իրականացնելու.

«Ասում են՝ դեմարկացիա, դելիմիտացիա չի արվել, և GPS-ով արված խայտառակ գծանշումները ժամանակավոր են, առայժմ պարզաբանումներ մեզ էլ չեն տալիս: Անվտանգության խնդիրը հիմա շատ լուրջ է, ոչ միայն Սյունիքում, նաև ամբողջ հանրապետությունում, որովհետև մենք գիտենք՝ տեխնոլոգիաները շատ արագ զարգանում են, ռազմական տեխնիկան շատ արագ փոխվում է և կատարելագործվում, հեռահար զենքերի դարաշրջան է դառնում»,-ասաց սյունեցի պատգամավորը:

Զրուցակիցը նաև նշեց, որ իշխանությունը անվտանգության հարցերով հանձնաժողով է ստեղծել, նիստեր է անում, բայց, պատգամավորի հավաստմամբ, այդ նիստերը ցածր մակարդակով են, իսկ անվտանգության խնդիրները պետք է լուծվեն ավելի բարձր մակարդակով՝ Հայաստանի և Ադրբեջանի միջև հստակ պայմանավորվածություններով.

«Որևէ հանձնաժողով չի կարող այդ խնդիրները լուծել, անգամ եթե գնան դիրքեր, տեղեկություններ հավաքեն, դա կարող է միայն օգնել իշխանությանը, որ խնդիրները բարձրաձայնեն, այդ խնդիրների հիմնական լուծումը պետք է ավելի բարձր մակարդակով իրականացվի՝ Հայաստանի և Ադրբեջանի ղեկավարների միջոցով, գուցե նաև Ռուսաստանի միջնորդությունն օգտագործեն, որպեսզի ավելի հստակ լինի՝ որևէ կրակոց չի լինելու: Այն դեպքերը, երբ ադրբեջանցիները հարբած վիճակում կրակոցներ էին արձակում, ևս պետք է բացառվի: Կարծում եմ՝ հարբած չեն եղել, երբ մի քանի օր առաջ էին եկել և միջպետական ճանապարհն էին փակել, հետո մերոնք դիմել էին խաղաղապահներին, նոր բացել էին ճանապարհները»,-ասաց Սրբուհի Գրիգորյանը:

Պատգամավորը հայտնեց, որ այս խնդիրների մասին «Լուսավոր Հայաստան» խմբակցությունը բազմիցս բարձրաձայնել է և դիմել իշխանությանը.

«Այս մասին ես խոսել եմ նոյեմբերի 9-ի փաստաթուղթը ստորագրելու հաջորդ օրվանից, մնում էր իշխանությունը լսեր և ինչ-որ քայլեր ձեռնարկեին, որոնք չեմ տեսնում մինչ այսօր: Փառք Աստծո, լուրջ միջադեպեր չկան, բայց ամեն դեպքում խնդիրներ կան, 80 -ականներին, երբ Հայաստանի և Ադրբեջանի միջև լարվածություն առաջացավ, այդ ճանապարհից մենք ունեցանք առևանգման դեպքեր: Եթե Աստված չանի վաղը հանկարծ հարաբերությունների սրում տեղի ունենա, այդ ճանապարհներով երթևեկելը կդառնա ավելի վտանգավոր , քան այս անորոշ վիճակում»,-ասաց ԼՀԿ պատգամավորը:

Պատգամավորը նկատում է, որ իշխանությունը շատ սոցիալական խնդիրներ փորձում է լուծել, տներ է կառուցում Շուռնուխում և դրամական աջակցություն է ցույց տալիս, բայց բնակիչների հիմնական խնդիրը անվտանգության խնդիրն է. «Նրանք տուն ունեցել են՝ ի՞նչ եղավ այդ տների հետ, վաղը ի՞նչ կարող է լինել այդ տների հետ, սա է խնդիրը» ,-ասաց պատգամավորը:

Պատգամավորը կարծում է, որ հակառակորդի արձակած անկանոն կրակոցները հոգեբանական պատերազմի տարրեր են, փորձում են ահաբեկել բնակիչներին:

«Ես ինքս կրակոցների ականատես չեմ եղել, բայց խոսել եմ քաղաքացիների հետ, սյունեցիները չեն վախենում և խուճապ Սյունիքում դժվար կարողանան առաջացնել»,-ասաց Սրբուհի Գրիգորյանը:

Անդրադառնալով Հայաստանի և Ադրբեջանի միջև առկա երրորդ համաձայնագրի առկայության վերաբերյալ համացանցում շրջանառվող լուրերին՝ պատգամավորն ասաց, որ բանավոր և գրավոր շատ հարցադրումներ են բարձրացրել այս առիթով, սակայն, որպես ընդդիմադիր ֆրակցիայի ներկայացուցիչ, ամբողջ ինֆորմացիայի չեն կարող տիրապետել.

«Այս փաստաթղթի իսկությունը պրն Ավինյանը ո՛չ հերքեց, ո՛չ հաստատեց: Մենք կփորձենք հասկանալ, դա ճիշտ է եղել, թե՝ ոչ: Ամեն դեպքում ԱԺ-ում Սիսակ Գաբրիելյանը փորձեց հերքել, բայց դա պետք է հերքեն ամենաբարձր մակարդակով: Գրություններ ենք ուղարկել, պետք է սպասենք պատասխաններին»,-ասաց պատգամավորը

Պատգամավորը նաև ընդգծեց, որ հակառակորդի հետ սահմանները ավելի շատ են մոտենում Հայաստանին.

«Կարելի է ցանկացած պահի ապահով տեղով նոր ճանապարհ  գտնել, բայց դա խնդրի լուծում չի: Սահմանները մոտենում են, մենք գիտենք մեր աշխարհագրական դիրքը, գիտենք ՝ ովքեր են մեր հարևանները, նրանց նպատակները, մենք նաև գիտենք որ պատերազմը չի ավարտվել, չգիտենք՝ թե հաջորդ պատերազմը, երբ կլինի, հետևաբար, սահմանները անընդհատ մոտեցնել Հայաստանին շատ կոպիտ և անթույլատրելի սխալ է, որը հետագայում կարող է ողբերգական հետևանքներ ունենալ»,-մեզ հետ զրույցում ասաց Սրբուհի Գրիգորյանը:

Աղբյուր` Փաստինֆո