Փաստ ինֆո

Երևանի ընդհանուր իրավասության դատարանում՝ դատավոր Հարություն Մանուկյանի նախագահությամբ, այսօր քննվել է ՀՔԾ և դատախազության անգործության դեմ ՀՀ փաստաբանների պալատի նախագահ Արա Զոհրաբյանի և մյուս փաստաբանների ներկայացրած բողոքը, սակայն դատական նիստը հետաձգվել է՝ փաստական հանգամանքներին ծանոթանալու անհրաժեշտության նպատակով։

«Փաստինֆո» -ի հաղորդմամբ՝ Արա Զոհրաբյանը ներկայացրել է բողոքը՝ հիմնավորելով, որ ներկայացված հանցագործության մասին հաղորդումը չէր կարող կցվել Մովսես Հակոբյանի հայտարարությունների հիման վրա հարուցված քրեական գործին, իսկ դատախազության և ՀՔԾ ներկայացուցիչները ներկայացրին իրենց առարկությունները՝ բողոքի վերաբերյալ։

Մասնավորապես՝ ՀՔԾ մինչդատական վարույթի նկատմամբ հսկողության վարչության ավագ դատախազ Արմեն Մուրադյանը նշեց, թե հաղորդման մեջ նշված հանգամանքների վերաբերյալ արդեն իսկ ՀՔԾ-ում կա հարուցված քրեական գործ, ՀՀ քրեական դատավարության օրենսգրքով ղեկավարվելով՝ հաղորդումն ուղարկվել է ՀՔԾ՝ հաղորդումը քրեական գործին կցելու և համատեղ քննություն իրականացնելու համար։ Ըստ Մուրադյանի՝ հակառակ դեպքում կստացվեր իրավական անորոշություն՝ նկատի ունենալով, որ արդեն իսկ նշված փաստական հանգամանքների վերաբերյալ առկա է քրեական գործ։

Դատախազության և ՀՔԾ առարկություններից հետո Արա Զոհրաբյանն արձագանքեց՝ նշելով, որ քրեական գործի նախաքննության ընթացքում նույն անձի կողմից այլ հանցագործություն կատարելու մասին տվյալներ ձեռքբերելու դեպքում կարող է նոր քրեական գործ չհարուցվել, սակայն այդ սկզբունքը կարող է գործել, եթե կան փաստեր՝ կոնկրետ անձի վերաբերյալ, ինչն այս դեպքում չկա։ Զոհրաբյանի խոսքով՝ եթե իրենք հայտարարեն, որ Նիկոլ Փաշինյանը որպես մեղադրյալ է ներգրավված Մովսես Հակոբյանի հայտարարությունների գործով, ապա այդ սկզբունքը կարող է գործել, մինչդեռ՝ այս դեպքում այդ նորմը գործել չի կարող։

Բողոքի վերաբերյալ կողմերի դիրքորոշումներին ծանոթանալուց հետո դատարանն անհրաժեշտություն գտավ գործի փաստական հանգամանքներին ծանոթանալու՝ հաշվի առնելով, որ ներկայացված հանցագործության մասին հաղորդմանը և որոշումներին ծանոթ չէ։
Հաջորդ դատական նիստը նշանակվել է փետրվարի 26-ին ժամը՝ 14։00-ին։

Հիշեցնենք, որ 2020 թվականի դեկտեմբերի 22-ին ավելի քան հարյուր փաստաբան, հաղորդում են ներկայացրել ՀՀ գլխավոր դատախազին, խնդրելով հարուցել քրեական գործ ՀՀ քրեական օրենսգրքի 299-րդ հոդվածով (պետական դավաճանությունը) նախատեսված հանցավոր արարքի կատարման փաստի կապակցությամբ։ Հաղորդումը վերաբերում էր մինչև պատերազմը, պատերազմի ընթացքում և պատերազմից հետո տեղի ունեցած այն իրադարձություններին, որոնք առերևույթ վկայում են պետական դավաճանության հնարավորության մասին։

Դատախազությունը ներկայացված հաղորդումն ուղարկել է ՀՔԾ, որտեղ այն կցվել է արդեն հարուցված քրեական գործին, մինչդեռ՝ փաստաբանները գտնում են, որ վարույթն իրականացնող մարմինը պարտավոր էր որոշում կայացնել՝ քրեական գործ հարուցելու կամ քրեական գործի հարուցումը մերժելու մասին։

Ըստ փաստաբանների՝ դատախազությունը և ՀՔԾ-ն անգործություն են ցուցաբերել, ինչի դեմ բողոք է ներկայացվել։

Հեղինակ՝ Իզաբել Սահակյան

Աղբյուր` Փաստինֆո