Փաստ ինֆո

«Փետրվարի 20-ին այնքան մեծ հանրահավաք կլինի, որ ոստիկանական ուժերը չեն հերիքի ուժ կիրառելու համար»,- այս մասին Ազատության հրապարակում քաղաքացիների հետ հանդիպմանն ասաց Հայրենիքի փրկության շարժման վարչապետի թեկնածու Վազգեն Մանուկյանը։ Քաղաքացիները մտավախություն հայտնեցին, որ գուցե սպասվող մեծ հավաքին ոստիկանները ուժեր կկիրառեն՝ այլ հավաքների պես։

Իսկ հարցին, արդյոք պառակտումներ կան շարժան մասնակիցների մեջ, Մանուկյանը վստահեցրեց՝ բոլորն էլ միասնական են։
«Ես մարդկանց հավաքեցի, որովհետև սարսափելի դեպք էր տեղի ունեցել։ Պարզվել էր որ կա գաղտնի մի պայմանագիր, ըստ որի մենք տալիս ենք մեր ճանապարհները, հողերը։ Դրան պետք էր արագ արձագանք տալ։ Շարժումը ինքը մեծ մեքենա է, մինչև խոդի գցես, ժամանակը անցնում է, դրա համար ես մյուսներին տեղյակ պահելով նախաձեռնությունը լքեցի»։

Անդրադառնալով ընտրությունների թեմային, Մանուկյանը նշեց, որ հիմա դրա մասին խոսելն արդեն անիմաստ է, չնայած շարժմանը հարող ուժերը առանձին են խոսում ընտրություններին մասնակցելու մասին։

«Ընտրություն չկա, ի՞նչ ընտրություններին մասնակցեն։ Հարցը իմաստալից էր այն ժամանակ, երբ Փաշինյանը հայտարարեց, որ ընտրություն չի լինելու։ Դրա մասին խոսելն անհեթեթություն է»։

Վազգեն Մանուկյանը բացառում է, որ ընտրություններին կմասնակցի, որովհետև իշխանությունը կորցրել է ընտրություն անցկացնելու լեգիտիմությունը, համոզված է, որ այդ պարագայում դրանք կեղծվելու են։

Քաղաքացիներից մեկի հետ զրույցի ժամանակ Մանուկյանը վստահեցրեց, որ ժողովուրդն արժանի է իշխանություն ունենալու, բայց իշխանությունը արժանի չէ այսպիսի ժողովուրդ ունենալու։

Քաղաքացիները մտահոգ էին, ուզում էին իմանալ պատճառը, թե ինչո՞ւ այսօր փողոցները առաջվա պես մարդաշատ չեն, մարդիկ ինչու չեն միանում հանրահավաքների։ Մանուկյանը վստահեցրեց՝ նորմալ է, որ այսօր մեծամասնությունը հանրահավաքի չի իջնում։

«Երբեք չի հավաքվի ամբողջ ժողովուրդը, սակայն  կարող է տանը լինել ու համաձայն լինել հավաքի մասնակիցների պահանջներին»։

Մանուկյանը՝ դիմելով ժողովրդին նշեց, որ  ցանկացած պահի, երբ խոսքի ազատությունից զրկում են , պետք է իմանալ, որ երկրին վտանգ է սպառնում։ Օրինակ՝ պատերազմի ժամանակ տուգանում էին լրատվամիջոցների ներկայացուցիչներին։

Հիշեցնենք, որ Հայրենիքի փրկության շարժման վարչապետի թեկնածու Վազգեն Մանուկյանը Ազատության հրապարակում է՝ հանդիպում է քաղաքացիների հետ և քննարկում Շարժման գործունեության հետ կապված հարցեր: Ավելի Վաղ Մանուկյանը հայտարարել էր, որ Ազատության հրապարակը դարձնում է մեծ շտաբը: Ինքն ամեն օր՝ գոնե երկու ժամ (5-ից 7-ը) կլինի հրապարակում, իր գործընկերների հետ։ 

Աղբյուր` Փաստինֆո