Փաստ ինֆո

«Քանի այս կառավարությունը կա, մենք ամեն առավոտ նոր իրողության առջև ենք կանգնելու։ Առաջիկայում սրիկաների կառավարությունը նոր փաստաթղթեր է ստորագրելու թշնամի երկրի հետ»,-այս մասին Ազատության հրապարակում հայտնեց ՀՅԴ ԳՄ անդամ Իշխան Սաղաթելյանը, լրագրողներին տեղեկացրեց, որ Դավիթ Բեկ համայնքի հետ կապված լուրջ մտահոգություններ ունեն ինչպես ժամանակին եղավ Շուռնուխի, Որոտանի դեպքում։ Ժամանակին հայտնել են, որ Կուբաթլուի ու Զանգելանի դիրքերը հանձնվելու են, սակայն շատերը չէին հավատում, այսօր դա փաստ է։

«Բանավոր պայմանավորվածությամբ հանձնված դիրքերը, պարզվեց, օրինականացրել են ինչ-որ փաստաթղթով»,- հայտարարեց Սաղաթելյանը ու հավելեց՝ կառավարությունը առնչություն չունի ՀՀ-ի և ՀՀ քաղաքացու հետ, սպասարկում է այլ երկրի շահերը։

Իր տրամադրության տակ փաստաթուղթ չկա, բայց տեղեկություններ ունի, որ հիմա քննարկվում են մի քանի հարցեր՝ կրկին տարածքների զիջման մասին։ Իշխան Սաղաթելյանը հույս հայտնեց, որ իր տեղեկություններն իրականություն չեն դառնա։ Իշխանությունները պատրաստ են քայլ առ քայլ տարբեր հատվածներ զիջել հայրենիքից և դա պետք է կանխել։

Սաղաթելյանը ևս անդրադարձավ Ագարակում հնչող կրակոցներին, որին ՊՆ-ն արձագանքել էր, թե դրանք միայն օդ են արձակվել։

«ՊՆ-ն որտե՞ղ էր, որ համայքնի ղեկավարներն էին բանակցում թուրք զինվորականների հետ։ ՊՆ-ն մեծ անելիք ունի այս ուղղությամբ։ Կոչ եմ անում ՊՆ-ին՝ գտնվել իրենց տեղում, դերում և դիրքում և ազդեցություն ունենալ քաղաքական այն որոշումների վրա, որը մեզ զիջումներ է պարտադրում»։

Սաղաթելյանը կոչ արեց հանրությանը դուրս գալ փողոց ու չարիքի կառավարությունը հեռացնել միասին։ 

Աղբյուր` Փաստինֆո