Փաստ ինֆո

«Օրվա իշխանությունները ժողովրդի թիկունքում, ժողովրդից գաղտնի, պայմանավորվածություններ են ձեռք բերում թշնամի երկրի ղեկավարի հետ,այսպիսով, սպասարկելով ոչ թե մեր պետության և ժողովրդի շահը, այլ փաստացի՝ թշնամու առաջ քաշած օրակարգը: Լավ հասկանալով այս ամենի անդառնալի հետևանքները, նրանք փորձում են դա, ամեն կերպ, գաղտնի պահել և թաքցնել,- «Փաստինֆո»-ի հետ զրույցում ասել է քաղաքագետ Հրանտ Մելիք – Շահնազարյանը։ Ըստ նրա՝ դրա վկայությունն է նաեւ օրեր առաջ հայտնի դարձած եռակողմ հուշագրի առկայությունը, որ կնքված է եղել Հայաստանի – Ռուսաստանի և Ադրբեջանի միջև, որով էլ, փաստորեն, իրականացվել և իրականացվում են Սյունիքի մարզում տեղի ունեցող անհասկանալի տարածքային զիջումները, և այս ամենն արվում է մի ողջ պետության և ժողովրդի թիկունքում, բոլորից գաղտնի:

«Պետք է նշեմ, որ իշխանությունների այս գործելաոճը չի փոխվելու: Ավելին, ապագայում մենք թշնամու հետ կնքած նոր և ավելի անհավանական թվացող դավաճանական գործարքների ականատեսն ենք լինելու»,- ասել է նա։

Խոսելով աննախադեպ այս իրողության նկատմամբ հայաստանյան լայն հասարակության առերեւույթ անտարբեր վերաբերմունքի մասին՝ քաղաքագետը նկատում է՝ գործ ունենք հետպատերազմական շրջանին բնորոշ հոգեբանական խորը ճգնաժամի հետ. «Մենք մեզ համար կենսական նշանակության տարածքներ ենք կորցրել, կորցրել ենք մեր հայրենիքի մի զգալի հատվածը, կորցրել ենք նաև մեր անվտանգության երաշխիքներն ու պետություն ունենալու հնարավորությունը: Այսպիսի իրավիճակում ժողովրդի դրսևորած անտարբեր վերաբերմունքը խոսում է հոգեբանական խորը ճգնաժամի մասին: Բացի այդ, արդեն իսկ պարզ է դառնում, որ, տևական ժամանակ ոտնահարելով մեր ժողովրդի և ազգային արժեհամակարգը, Հայաստանի ներսում գործող գործակալական ցանցը, ժողովրդին տարիներ շարունակ պատրաստել է այս պարտությանը: Վերջին հուժկու հարվածն էլ, կարծես, ամբողջովին կոտրեց մեր ժողովրդի դիմադրողականությունը, որը, թերևս, ամենացավալի իրողությունն է»:

Անդրադառնալով լուրերին, թե օրվա իշխանությունները նախապատրաստվում են մարտ ամսին՝ արդեն թշնամի Թուրքիայի հետ կնքվելիք հերթական գաղտնի և, թերևս, աննախադեպ ստորացուցիչ փաստաթղթի ստորագրմանը, քաղաքագետ Հրանտ Մելիք – Շահնազարյանը նկատում է՝ բացառված չէ, որ այս իշխանությունը Թուրքիայի հետ, արդեն իսկ, պայմանավորվածություն կամ գաղտնի հուշագիր է ստորագրել, որը կարող է առնչվել Հայկական հարցի չեզոքացման խնդրի հետ. «Իմանալով այս տարածաշրջանում Թուրքիայի շահի և ռազմաքաղաքական ներկայության հեռահար նպատակների մասին, պարզ է, որ թուրքական կողմը շահագրգռված է լինելու այդ ներկայությունը սահմանափակող բոլոր գործոնների չեզոքացմանն ուղղված գործողություններով: Հետևաբար, չեմ բացառում, որ մարտին ստորագրվելիք առաջիկա հուշագրի վերաբերյալ շրջանառվող լուրերը կարող են կապ ունենալ, առաջին հերթին՝ Հայկական հարցի չեզոքացման խնդրի հետ, որի մասին մենք կիմանանք մարտ ամսին, երբ այդ հուշագիրն արդեն ստորագրված կլինի»:

Դառնալով Սյունիքի մարզում ընթացող զարգացումներին, որի վերաբերյալ մարզ կատարած այցից հետո, մտահոգիչ որոշակի տեղեկություններ է հաղորդում նախկին վարչապետ Հրանտ Բագրատյանը, քաղաքագետը նկատում է՝ այս ամենը խոսում է այն մասին, որ դավաճանական իշխանությունը շարունակում է անարգելք իրականացնել իր առջև դրված խնդիրները. «Հրանտ Բագրատյանն իր հնչեցրած խիստ մտահոգիչ բարձրաձայնումները հիմնավորում է հստակ ամրագրված փաստաթղթերով: Դա այն իրողությունն է, որին ինքն անձամբ է ականատես եղել Սյունիք կատարած այցի ընթացքում: Մարդն անցնում է Հայաստանի Հանրապետության տարածքում գտնվող հայկական ճանապարհով, որտեղ իրեն տեղեկացնում են, որ տվյալ տարածքն, այլևս Ադրբեջանի վերահսկողության տակ է: Սա նշանակում է, որ դավաճանները շարունակում են կատարել իրենց սև գործը, այն է՝ մաս – մաս հանձնել հայրենիքը, ինչն էլ ստիպում է, որ հայ ժողովուրդը րոպե առաջ ուշքի գա և կասեցնի այս աղետալի ողբերգությունը»,- ամփոփելով զրույցն, ասում է քաղաքագետ Հրանտ Մելիք - Շահնազարյանը:

Հեղինակ՝ Նվարդ Մանվելյան

Աղբյուր` Փաստինֆո