Փաստ ինֆո

ԱԺ պատգամավորներ Սերգեյ Բագրատյանը և Տիգրան Ուրիխանյանը առաջարկում են հնարավորություն տալ խմբակցությունից դուրս եկած պատգամավորներին առանձին պատգամավորական խումբ ստեղծել եւ նրանց ընձեռել այն նույն իրավունքները, որոնք ունեն խմբակցության պատգամավորները։ 

«Փաստինֆո»-ի հետ զրույցում նախագծի համահեղինակ, «Ալյանս» կուսակցության նախագահ Տիգրան Ուրիխանյանն ասաց, որ խմբակցությունից դուրս եկած պատգամավորների հետ խորհրդակցությունների արդյունքում է առաջացել նախագիծը.

«Խորհրդակցությունների, քննարկումների, միասնական օրենսդրական նախաձեռնությունների և այլ թեմաների շուրջ քննարկումները բխեցրեցին նրան, որ տրամաբանական կարող է լինել՝ ստեղծել ինչ-որ ձևաչափ՝ հնարավորություն տալով խմբակցություններում չներկայացված պատգամավորների համար ընդհանուր հարթակով հանդես գալ: Ինչու մենք ընտրեցինք պատգամավորական խումբ ձևաչափը, այլ ոչ՝ խմբակցություն, որովհետև Սահմանադրությունը ԱԺ մարմիններ ձևավորելու հնարավորությունը տվել է միայն ԱԺ-ի ձևավորման պահին: Մենք քննարկում էինք անկախ պատգամավորներին խմբակցություն ստեղծելու հնարավորություն տալու տարբերակը, բայց քանի որ կա այդպիսի հակասություն, որոշվեց պատգամավորական խումբ տարբերակը, որպեսզի լինի հարթակ և խորհրդակցենք, քննարկենք տարբեր հարցեր: Վերջապես անկախ պատգամավորներն ունեն մեկ ընդհանրություն, դա անկախությունն է և նշանակում է, որ դա նախադրյալ է՝ ինչ-որ բան քննարկելու համար»,-ասաց պատգամավորը:

Ուրիխանյանն ընդգծեց, որ խորհրդարանում այս պահին կա 6 անկախ պատգամավոր, ինչն արդեն իսկ լուրջ թիվ է.

«Մենք ունեցել ենք խորհրդարաններ, որտեղ ավելի փոքրաթիվ խմբակցություններ են եղել: Այն պատգամավորներին, որոնք ունեն պոտենցիալ՝ օրենսդրական աշխատանքով, վերահսկողությամբ, լսումներ կազմակերպելու, դիվանագիտական աշխատանք իրականացնելու համար, ինչու հնարավորություն չտալ այդ պոտենցիալը կիրառել՝ հանուն ՀՀ-ի, հանուն խորհրդարանի և քաղաքացու շահի միայն այն պատճառով, որ կա ԱԺ կանոնակարգ օրենքում մի հակասություն դա ճիշտ չէ»,-ասաց Ուրիխանյանը:

Պատգամավորն ընդգծեց, որ պատգամավորների խումբր կարող է ոչ ֆորմալ խմբակցության տեսք ունենալ.
«Եթե մարդիկ ունեն միատիպ դիրքորոշում, ապա ոչինչ չի խանգարի միասնաբար գործելու: Անկախ պատգամավորներից շատերի հետ կա երկխոսություն, դա արտահայտվում է քվեարկություններով»,-ասաց Ուրիխանյանը:

Պատգամավորը նշեց, որ նախաձեռնել են նաև «ՀՀ ԱԺ պատգամավորի գործունեության երաշխիքների մասին» օրենքում փոփոխություն կատարելու նախագիծ, որով առաջարկում են անկախ պատգամավորներին ընձեռել որոշ հնարավորություններ՝ օրինակ՝ լսումներ իրականացնել, պատվիրակություններ ձևավորել և որոշ վերահսկողական գործառույթներ, որոնք խմբակցություններն ունեն, իսկ անկախ պատգամավորները՝ չունեն:

«ԱԺ կանոնակարգ օրենքում էլ, «ՀՀ ԱԺ պատգամավորի գործունեության երաշխիքների մասին» օրենքում էլ կան դրույթներ, որտեղ գրված է՝ պատգամավորն իրավունք ունի, օրինակ, ընդգրկված լինել որևէ հանձնաժողովում, սա համարվում է նաև պարտականություն, բայց դա կարող է անել միայն խմբակցությունը, եթե խմբակցությունը որոշում է, որ պատգամավորը չպետք է լինի այսինչ հանձնաժողովի անդամ, ապա պատգամավորը զրկվում է այդ իրավունքից»,-ասաց Ուրիխանյանը:

Աղբյուր` Փաստինֆո