Փաստ ինֆո

ՀՀ արդարադատության նախարարության անձնական տվյալների պաշտպանության գործակալության պետ Գևորգ Հայրապետյանը փաստում է՝ վիճակագրական տվյալների հրապարակումը անձնական տվյալ չի կարող համարվել։ 

«Փաստինֆո»-ի հարցին, թե արդյոք վիճակագրական տվյալների հրապարակումը իրենից ենթադրո՞ւմ է անձնական տվյալների մասին օրենքի խախտում, մասնավորապես՝ անհետ կորած, մահացած, կամ գերեվարված անձանց թիվը հրապարակելով խախտվո՞ւմ է «Անձնական տվյալների մասին» ՀՀ օրենքը, մասնագետը մանրամասնեց՝ անձնական տվյալը մարդուն նույնականացնող տեղեկությունն է: Սա նշանակում է, որ ցանկացած տվյալ, որը չի կարող թույլ տալ մարդուն նույնականացնել ուղղակի կամ անուղղակի, ապա դա անձնական տվյալ չէ ու երբ խոսք է գնում այնպիսի վիճակագրական տվյալների կամ այնպիսի տեղեկությունների մասին, որոնք թույլ չեն տալիս ոչ մի կերպ մարդուն նույնականացնել, հետևաբար դա անձնական տվյալ չէ։

«Ամեն դեպքում պետք է նկատի ունենալ, որ իրավաչափության վերաբերյալ հարցը գործակալությունը լուծում է բացառապես պատշաճ քննություն, ստուգում իրականացնելուց հետո, ու ուղղակի չեմ կարող ասել այս կամ այն տվյալի հրապարակումը անձնական տվյալների մասին օրենքի խախտո՞ւմ է, թե ոչ, որովհետև այն բալանսավորվող իրավունք է»։

Իսկ ո՞ր հիմքով գերատեսչությունները կարող են մերժել վիճակագրական տվյալների տրամադրումն ու ո՞ր դեպքում, Հայրապետյանը նշեց.
«Մեր օրենսդրությամբ անձնական տվյալները, երբեմն, կարելի է մերժել, եթե չկա իրավական հիմք այդ տվյալների տրամադրման, եթե այդ տվյալները գաղտնիքի որևէ կարգավիճակ ունեն, որևէ ռեժիմի են ենթարկվում, այս դեպքում անձնական տվյալը տվյալի տեսակի անվանումն է, ոչ թե ռեժիմը»։

Հայրապետյանը հավելեց, որ օրինակ՝ անուն ազգանունները անձնական տվյալ է ու, եթե այն հայտնվի համացանցում, ապա մնալու է հավերժ։

Հիշեցնենք, որ ՀՀ ՊՆ-ին Փաստինֆո»-ն դիմել էր գրավոր հարցմամբ, որով ակնկալում էինք ստանալ պատասխաններ, թե քանի՞ նահատակված զինվորի վերաբերյալ ունեն տվյալներ, նրանցից քանի՞սն են ժամկետային զինծառայող, քանի՞սը պահեստազորային, քանի՞սը կամավոր։ Նույն տվյալներն ակնկալում էինք ստանալ նաեւ անհետ կորածների վերաբերյալ։ Փորձել ենք պարզել նաև, թե քանի՞ զինվորի ինքնություն չի պարզվել, թեև դիերը հայտնաբերվել են, սակայն ՊՆ-ից հարցմանը չեն պատասխանել, նշելով, որ դրանք անձնական տվյալների մասին օրենքի խախտում է։

«Հայտնում ենք, որ հիմք ընդունելով «Անձնական տվյալների մասին» ՀՀ օրենքի և «Տեղեկատվության ազատության մասին» ՀՀ օրենքի 8-րդ հոդվածի 1-ին մասի 2-րդ կետի պահանջները՝ տեղեկատվության տրամադրումը մերժվում է»,- գրված է ՊՆ-ի պատասխանում։

Նկատենք, որ «Փաստինֆո»-ն նույնականացնող որեւէ տվյալ չէր հայցել, այլ միայն վիճակագրություն, որի տրամադրումը, փաստորեն, մերժվել է օրենքի խախտմամբ։

Աղբյուր` Փաստինֆո