Փաստ ինֆո

Բազմաթիվ մտահոգիչ հայտարարություններին զուգահեռ երեկ ականատես եղանք, որ ևս երկու լուրջ խնդիր է առաջացել: Համացանցում հրապարակվել էր ինչ-որ հայտարարության տեքստ, որը վերաբերում էր Արցախին և Սյունիքին, որը պարզվում է կնքվել է դեռևս դեկտեմբեր ամսին: Մենք պահանջում ենք իշխանությունից պարզաբանում տալ՝ ինչի մասին է խոսքը, քանի որ հրապարակվել է միայն տեքստ և չկա ստորագրություն: Այս մասին խորհրդարանական ճեպազրույցների ժամանակ ասաց Լուսավոր Հայաստան խմբակցության պատգամավոր Տարոն Սիմոնյանը.

Պատգամավորն ընգծեց, որ եթե անգամ դա ստորագրված լինի գործադիր իշխանության ղեկավարի կամ որևէ ներկայացուցիչի կողմից, սա ոչ միայն հակապետական փաստաթուղթ է, այլ նաև իրավունքի կոպիտ խախտումներ է պարունակում և իրավական ուժ չունի.

«Այնտեղ կարգավորվում են հարաբերություններ, որոնք միջազգային պայմանագրային կարգավորման առարկա են , իսկ մեր սահմանադրութան և միջազգային պայմանագրերի ՀՀ օրենքի համաձայն նման փաստաթղթերը ուժ ստանալու համար պետք է Սահմանադրական դատարան և ԱԺ մտնեն, որտեղ վավերացվելուց հետո միայն կիրառական նշանակություն ունենան: Մինչդեռ փաստաթղթում նշված փաստերը վկայում են, որ մինչև դեկտեմբերի 18-ն արդեն կոնկրետ գործողությունն են կատարվել»,-ասաց պատգամավորը՝ հավելելով, որ այնտեղ նշված դրույթներն ուղղակիորեն ոչնչացնում են Արցախի հարցի ինքնորոշմանն ուղղված պետական քաղաքականությունը.

«Հաջորդ խնդիրը Մարտունի քաղաքի հետ է կապված, որն ուղղակիորեն հարվածում էր մեր ազգային ինքնությանը: Տեղեկություն տարածվեց, որ ադրբեջանաթուրքական կողմի պահանջով պետք է ապամոնտաժվի Նժդեհի արձանը: Այդ արձանը դեռ չի էլ բացվել, քանի որ դեռ շատ աշխատանքներ կան կատարվելու: Որևէ ազգ իրավունք չունի որոշել մեր մշակութային առանձնահատկությունների հետ կապված հարցերը: Յուրաքանչյուր ազգ ինքն որոշում՝ ինչ հերոսներ և մշակութային արժեքներ ունենա և ինչ գաղափարներ դավանի»,-ասաց Տարոն Սիմոնյանը:

Պատգամավորը տեղեկացրեց նաև, որ խոսել է Արցախի իշխանությունների հետ և նրանք այսօր հայտարարություն կանեն, որ այս հարցը տրամաբանական լուծում ստանալու է և հայ ազգի արժանապատվությունը չի խոչընդոտվելու:

Աղբյուր` Փաստինֆո