Փաստ ինֆո

ՀՀ երրորդ նախագահ Սերժ Սարգսյանն առաջիկայում կխոսի։ Այս մասին մամուլի ասուլիսում այսօր հայտարարել է ՀՀԿ խոսնակ Էդուարդ Շարմազանովը։

Ըստ նրա՝ նախատեսվում էր, որ Սերժ Սարգսյանը հրապարակային խոսքով պետք է հանդես գար շատ ավելի շուտ, պարզապես պատերազմը, այնուհետեւ անձնական ողբերգությունը, հետո էլ կորոնավիրուսային հիվանդությունը հետաձգեցին նրա հարցազրույցները:

«Այո, առաջիկայում պարոն նախագահը կխոսի հիմնականում արցախյան թեմայի վերաբերյալ, բայց չեմ բացառում, որ այդ հարցազրույցները պարբերական բնույթ կրեն, որովհետեւ ես կարծում եմ, որ մեր բոլոր երեք նախագահները, բոլոր վարչապետները, պաշտպանության բոլոր նախարարները, բոլոր այն մարդիկ, որոնք իրենց լուման են ներդրել անկախ Հայաստանի եւ հայկական Արցախի կայացման համար, չեն կարող եւ չպետք է անմասն մնան ազգային այս պայքարից: Դուք տեսնում եք, որ այս պայքարում ՀՀԿ-ն մի կողմ դրած իր կուսակցական շահը, զերծ մնալով վերմակն իր վրա քաշելուց, պայքարել ու պայքարելու է մինչեւ վերջ: Այդ ամենը մենք անում ենք մեր նախագահի գլխավորությամբ»,-ասաց Շարմազանովը:

Աղբյուր` Փաստինֆո