Փաստ ինֆո

Տիկին Կարինեն կիսաքանդ, մի քիչ ցուրտ տան դուռն ամեն օր բացում է, հույսով, որ շուտով անհետ կորած համարվող որդուն՝ Գարիկին նորից կտեսնի։ Գարիկ Գրիգորյանը գրեթե միշտ զինվորական հագուստով էր, բարդ ճակատագրով, բայց հայրենիքին միշտ օգնելու պատրաստակամությամբ։ Մայրը «Փաստինֆո»-ի հետ զրույցում վստահեցրեց՝ որդին ծնված էր բանակի համար։ 

Գարիկի հայրը 92 թվականից անհետ կորած է համարվում։ Որդին էլ այդ ժամանակ 13 տարեկան է եղել։ Հիմա, երբ Գնդի որդին՝ Գարիկն անհետ կորած է, նրա որդին ևս 13 տարեկան է, իսկ մեծ դուստրը շուտով զավակ է լույս աշխարհ բերելու։ Առանց հայր մեծացած Գարիկն այնքան հայրենասեր էր, որ անգամ ոչինչ չունենալով, փորձում էր արցախյան առաջին պատերազմից տուժած ընտանիքներին ու երեխաներին աջակցել, որ իրենք ոչինչի պակաս չունենային։ Հիմնել էր «Պահապան ազատամարտիկների միությունը» ու ինքն էլ նախագահում էր։

Սեպտեմբերի 27-ին՝ պատերազմի բոթը կրկին տակնուվրա արեց սպայի հոգին։ Անմիջապես գործի անցավ. ցուցակագրեց տղաներին, ջոկատ կազմեց ու մեկնեցին Ստեփանակերտ։ «Պահապան ազատամարտիկների միության» նախագահը ջոկատի տղաների հետ զինվորներին սնունդ, հագուստ ու անհրաժեշտ իրեր են հասցրել։

Պատերազմի մեկնարկից մեկ ամիս անց Գարիկի մայրը՝ Տիկին Կարինեն, չէր էլ պատկերացնում , որ վերջին անգամ է զրուցում որդու հետ։ Գարիկը զգում էր , որ մայրն անհանգիստ է , վատառողջ։ Վերջին անգամ մորը հորդորեց . «մամ քեզ լավ նայիր,հետևիր առողջությանդ»։

Հոկտեմբերի 28-ին Գարիկի հետ կապ հաստատել այլևս չհաջողվեց. այդ օրվանից Գարիկի մասին ոչ մի լուր չկա։ Նա անհետ կորած է համարվում։ Ընկերներից կցկտուր հավաքված տեղեկությունների պատառիկները իմի բերելով , սպայի մայրը մեզ պատմում է, որ նա վիրավորներին չի ցանկացել միայնակ թողնել, զինվորներից ոչ մեկին իր հետ չի տարել, գնացել է շրջափակման մեջ գտնվողներին օգնելու և չի վերադարձել։

Տիկին Կարինեն թակել է հնարավոր բոլոր դռները՝ ՊՆ-ից Կարմիր խաչ, հետո ԱԱԾ , սակայն ապարդյուն։ Ոչ ոք, ոչինչ չի պատասխանում։Նույնիսկ Արցախ են հասել, ՌԴ խաղաղապահների մոտ էլ են տվյալներ թողել, անգամ ԴՆԹ փորձանմուշ են հանձնել։ Գարիկի հետ ռազմաճակատ մեկնած բոլոր տղաները վերադարձել են։ Գարիկի անունը հիմա անգամ գերիների ցուցակում են փորձում գտնել։ Թե ի՞նչ ճակատագրի արժանացավ «Գնդի որդին» դեռևս հայտնի չէ։

Մանրամասները՝ տեսանյութում

Աղբյուր` Փաստինֆո