Փաստ ինֆո

Հերթական անգամ համոզվում ենք, որ մեր երկրում իրավունքի գերակայության մասին վաղուց արդեն խոսք լինել չի կարող, որովհետև ֆեյսբուքյան էջի հայտարարությամբ լրջագույն իրավունք է սահմանափակվում, ընդ որում՝ ոչ միայն լրատվամիջոցների, այլև՝ ՀՀ բոլոր քաղաքացիների՝ իմանալու ճշմարիտ տեղեկատվություն իրենց հուզող հարցերի վերաբերյալ։ Այն, որ Սյունիքի իրավիճակն այսօր քաղաքացիներին ամենաշատը հետաքրքրող հարցերից մեկն է, չեմ կարծում որևէ մեկի մոտ կասկած հարուցի։ Այս մասին «Փաստինֆո»-ի հետ զրույցում ասաց իրավապաշտպան Ռուբեն Մելիքյանը՝ անդրադառնալով ԱԱԾ հայտարարությանը, համաձայն որի՝ Սյունիքի մարզում խնդիրները լուսաբանելու համար պետք է ստանալ ԱԱԾ թույլտվությունը։

Հիշեցնենք, որ երեկ ԱԱԾ սահմանապահ զորքերը հայտարարել են, որ ՀՀ Սյունիքի մարզի սահմանային տարածքներում տարբեր թեմաներ լուսաբանելու համար լրագրողներին անհրաժեշտ է ունենալ ՀՀ ազգային անվտանգության մարմինների համաձայնությունը, որի համար պետք է նախապես գրավոր (այդ թվում՝ նաև էլեկտրոնային տարբերակով) դիմել ՀՀ ԱԱԾ:

Նման հայտարարությունը տարակուսանք է առաջացրել ոչ միայն լրագրողական համայնքում, այլև՝ հասարակական-քաղաքական և իրավաբանական շրջանում, ընդ որում՝ մտավախությունները կապված են նաև հնարավոր տարածքային կորուստների հետ, քանի որ լրագրողներին լռեցնելու միտում եղել է նաև պատերազմի օրերին։ Թեև ԱԱԾ-ն այսօր նոր հայտարարությամբ հանդես եկավ՝ նշելով, որ Սյունիքում լուսաբանման աշխատանքների մասին իրազեկումը ԶԼՄ-ների մասնագիտական գործունեությանը խոչընդոտելու նպատակ չունի, այդուհանդերձ, մասնագիտական հանրության մտավախությունները չեն փարատվել։

Իրավապաշտպան Ռուբեն Մելիքյանը «Փաստինֆո»-ի հետ զրույցում ասաց, որ ԱԱԾ հայտարարությունը որևէ իրավական հիմք չունի, որևէ իրավական հետևանք այն չի կարող առաջացնել, որովհետև խոսքի ազատությունը, մամուլի ազատությունը կարող է սահմանափակվել բացառապես իրավական ընթացակարգերով, օրենքի հիման վրա։ Բացի դա՝ բացակայում է որոշակիությունը և նշված չէ կոնկրետ որ տարածքների մասին է խոսքը, օգտագործված են ոչինչ չասող բառեր, որոնք չեն կարող որոշակիության թեկուզ ամենանվազագույն չափանիշներին համապատասխանել։

Դիտարկմանը, որ պատերազմի օրերին էլ խիստ գրաքննություն էր սահմանվել, սակայն պատերազմում պարտություն ենք կրել և այժմ, կարծես թե, կրկնվում է իրավիճակը՝ Մելիքյանն արձագանքեց՝ նշելով, որ հնարավոր է Սյունիքում ունենանք լուրջ փոփոխություններ՝ ազգային անվտանգությանը սպառնացող։ Ըստ նրա՝ պատերազմի օրերին մեր դաժան պարտության ազգային աղետի պատճառներից մեկն այն է, որ մամուլն արհեստականորեն լռեցված էր, իր գործառույթը չէր կարողանում իրականացնել, տուգանքներ էին կիրառվում և քաղաքացիներին հասու չդարձավ 44 օրերի ընթացքում իրերի իրական վիճակը։

«Բոլորիս կերակրում էին «արծրունական» իրականությամբ և մեկ վայրկյանում այդ ամենը փլուզվեց՝ նոյեմբերի 9-ի լույս 10-ի գիշերը։ Այդ իրավիճակը հիշեցնող երևույթ է սա, ճիշտ է, ավելի փոքր մասշտաբով և բացարձակապես դատապարտելի է»,- նշեց Մելիքյանը։
Հեղինակ՝ Իզաբել Սահակյան

Աղբյուր` Փաստինֆո