Փաստ ինֆո

ՊՆ նախկին նախարար Դավիթ Տոնոյանն էլ էր հաճախ գալիս ինձ հետ հանդիպումների, բայց ոչ այն որակի հանդիպումներ էին լինում, ինչպես այսօր իրականացնում է մեր այսօրվա նախարարը: Այս մասին ԱԺ-ում ճեպազրույցի ժամանակ ասաց «Իմ քայլը» խմբակցության պատգամավոր Անդրանիկ Քոչարյանը՝ ՊՆ նախարար Վաղարշակ Հարությունյանի հետ հանդիպումից հետո:

Ըստ նրա՝ նախարարի հետ հանդիպել են հետպատերազմյա շրջանում առաջացած խնդիրները լուծելու համար:

Անդրադառնալով նախկին վարչապետ Հրանտ Բագրատյանի հայտարարությանը, որ ստորագրվել է հայ-ադրբեջանական նոր հուշագիր՝ Քոչարյանը նշեց.

«Հրանտ Բագրատյանը շատ վտանգավոր հարցազրույցներ է տալիս՝ վտանգելով մեր երկրի անվտանգությունը: Դուք էլ շատ եք սիրում Հրանտ Բագրատյանին խոսեցնել: Ամեն մի խոսքն օգտագործվելու է մեր դեմ»,- ասել է Անդրանիկ Քոչարյանը որպես օրինակ մատնանշելով Հրանտ Բագրատյանի հայտարարությունն առ այն, որ Պաշտպանության բանակ գոյություն չի ունեցել։ «Նախկին վարչապետի բերանից հնչած նման վտանգավոր արտահայտությունը չեք էլ պատկերացնի, թե ինչ հետևանքներ կարող է ունենալ»,- նշել է նա:

Արձագանքելով իմքայլական պատգամավոր Անուշ Բեղլոյանի պնդմանը, թե 30 տարի Հայաստանը բանակ չի ունեցել, Քոչարյանը արձագանքեց. «Եթե մենք 30 տարի բանակ չենք ունեցել, ապա Արցախյան առաջին պատերազմը, երևի, Մարսից են եկել, հաղթել»:

Անդրադառնալով ԱԱԾ հայտարարությանը, որ լրագրողները Սյունիք լուսաբանման պետք է գնան ԱԱԾ-ի թույլտվությամբ, Քոչարյանն ասաց՝ այդպես է որոշվել, քանի որ լուսաբանման մեջ կան խնդիրներ, որոնք չպետք է վնասեն գաղտնիությանը առնչվող որևէ դրվագի:

Աղբյուր` Փաստինֆո