Փաստ ինֆո

Ստացվում է՝ Արցախի Հանրապետության անվտանգության երաշխավորը ՀՀ-ն չէ, դեռ ավելին, նույնիսկ Հայաստանի անվտանգության երաշխավորը ՀՀ-ն չէ՝ հաշվի առնելով տեղի ունեցող գործընթացները։ «Փաստինֆո»-ի հետ զրույցի ժամանակ այս մասին ասաց ռազմական փորձագետ Կարեն Հովհաննիսյանը՝ անդրադառնալով շրջանառվող լուրերին, որ ժամկետային զինծառայողներին այլևս Արցախ չեն ուղարկում։

Փորձագետը նշում է, որ մինչև այս լուրերի շրջանառությունն էլ արդեն հասկանալի էր, որ դժվար թե Հայաստանից զինծառայողներ մեկնեն Արցախ, որովհետև նախքան այս էլ Արցախից եկած զինվորներին չթույլատրվեց վերադառնալ․ «Այս առումով մեզ համար նորություն չկար այստեղ։ Կարծում եմ՝ նույնիսկ վտանգավորության մասին խոսելն արդեն անարդյունավետ է։ Ստացվում է՝ ԱՀ անվտանգության երաշխավորը Հայաստանը չէ։ Չենք կարող ինքնախաբեությամբ զբաղվել և ասել, որ այդքան էլ վտանգավոր չէ, նորմալ է, քանի որ սա վտանգավոր է մեր երկու հայկական պետությունների հետագա զարգացման համար»,-նշեց Կարեն Հովհաննիսյանը։

Հարցին՝ արդյոք ստացվում է, որ ԱՀ պաշտպանության բանակն իրապես կազմալուծման վտանգի առջև է կանգնած և Արցախի անվտանգությունը ապահովելու էին միայն ռուս խաղաղապահները, փորձագետը չկարողացավ ասել Արցախը կունենա բանակ, թե ոչ, քանի որ ոչ թե խոսակցություններն են հիմք, այլ պաշտոնական հաղորդագրությունները․

«Քանի դեռ չկա պաշտոնական հաղորդագրություն, չեմ կարող խոսակցությունները հիմք ընդունել։ Եթե գանք մի այնպիսի իրավիճակի, որ իսկապես Արցախը բանակ չունենա, նշանակում է՝ Արցախի բնակչությունն ուղիղ վտանգի տակ է հայտնվելու, որովհետև փորձը ցույց է տալիս, որ երբ բնակչությունը պաշտպանված չի եղել, թշնամին հարձակվել է։ ԱՀ-ն պետք է ունենա պաշտպանության բանակ և այստեղ երկրորդ կարծիք չպետք է լինի։ Կարծում եմ՝ ԱՀ և ՀՀ իշխանությունները չեն գնա այդ քայլին ու չեն կազմալուծի այն»,-ասաց փորձագետը։

Աղբյուր` Փաստինֆո