Փաստ ինֆո

Երբ Մինսկի խումբ կոչվող քաղաքական կառույցը կվերսկսի իր աշխատանքները և արցախյան հիմնահարցի լուծման շրջանակներում կգրավի իր ուրույն տեղը, դրանից հայկական կողմը միայն շահող դուրս կգա: Իսկապես, Թուրքիան և Ադրբեջանն անում են ամեն ինչ, որպեսզի դա տեղի չունենա,-«Փաստինֆո»-ի հետ զրույցում հայտարարել է ՀՀ նախկին փոխարտգործնախարար, ՀՀ արտակարգ և լիազոր դեսպան Արման Նավասարդյանը։ 

Նկատենք, որ վերջին շրջանում Հայաստանում մեծ ակտիվություն են ցուցաբերում ՀՀ-ում հավատարմագրված մի շարք դեսպաններ, հատկապես Ռուսաստանի Դաշնության դեսպան Սերգեյ Կոպիրկինը, ԱՄՆ դեսպան Լի Թրեյսը և Ֆրանսիայի Հանրապետության դեսպան Ջոնոթան Լաքոթը, որոնք հանդիպումներ են ունենում ինչպես Հայաստանում քաղաքական գործունեություն ծավալող ամենատարբեր գործիչների, ընդդիմության ներկայացուցիչների, այնպես նաև ՀՀ պաշտոնաթող նախագահների՝ մասնավորապես, առաջին նախագահ Լևոն Տեր-Պետրոսյանի հետ:

Ա.Նվասարդյանը դեսպանների ակտիվությունը բնական է համարում. «Եթե ես էլ լինեի այդ դեսպաններից որևէ մեկի տեղում, անպայմանորեն, կփորձեի հնարավորինս շատ հանդիպումներ և համապատասխան վերլուծություններ ձեռք բերել, այն ամենի վերաբերյալ, ինչ վերջին ժամանակներում կատարվում է երկրի ներքաղաքական կյանքում: Բնականաբար, ՀՀ-ում հավատարմագրված դեսպաններն այդ աշխատանքը պետք է կատարեն քաղաքական դաշտում որոշակի հեղինակություն և կշիռ վայելող գործիչների հետ հանդիպումների արդյունքում, որոնցից մեկն էլ ՀՀ առաջին նախագահ Լևոն Տեր–Պետրոսյանն է»։

Արման Նավասարդյանը նկատում է՝ դիվանագիտական աշխատանքը հիմնականում հիմնված է կոնֆիդենցիալ ինֆորմացիային տիրապետելու և դրա հիման վրա, համապատասխան վերլուծություններ կատարելու գործառույթի վրա, այնպես որ, դեսպանների մասնակցությամբ պարբերաբար կրկնվող հանդիպումների մեջ, ըստ վերջինիս, որևէ արտառոց երևույթ պետք չէ փնտրել. «Թերևս միակ հարցը, որ, հավանաբար, հետաքրքրում է ձեզ՝ ինչո՞ւ են այդ հանդիպումներն առավել հաճախակի բնույթ ստացել հատկապես վերջերս:

Դա, բնականաբար, կապված է այն դեպքերի հետ, որ կատարվեցին վերջին ամիսների ընթացքում մեր երկրում և որում դեռ գտնվում է Հայաստանը՝ պատերազմից հետո: Այլ կերպ ասած, դրանք այն խնդիրներն են, որոնց հետ այսօր բախվում է Հայաստանը: Այդ խնդիրների կոնտեքստում, բոլորովին վերջերս, ՀՀ-ում Ռուսաստանի Դաշնության դեսպան Սերգեյ Կոպիրկինը հայտարարեց, որ Վլադիմիր Պուտինն անձամբ է զբաղվում գերիների վերադարձի հարցով, բացի դրանից, ՌԴ նախագահը հարց էր բարձրացրել, առհասարակ, Արցախի խնդրի վերաբերյալ: Ամենայն հավանականությամբ, ՌԴ դեսպանի վերջին օրերի հիմնական քննարկման թեման, թերևս սա պետք է լինի:

Համենայն դեպս, մեր Արտաքին գործերի նախարարությունն այս ուղղությամբ ևս ակտիվ աշխատանքներ է կատարում, մասնավորապես նորանշանակ նախարարի գլխավորությամբ, ում ակտիվ ջանքերն այս ուղղությամբ, միայն ողջունելի են: Արցախի վերաբերյալ ամենակարևոր խնդիրներից մեկն, իհարկե, մնում են Մինսկի խմբի գործունեությանն առնչվող հարցերը, որի ուղղությամբ, նույնպես, Արա Այվազյանն ակտիվ ջանքեր է գործադրում»,- ասում է Արման Նավասարդյանը:

Արդյո՞ք անհանգստության առիթ չի կարող հանդիսանալ այն իրողությունը, որ վերջին շրջանում նկատելի ակտիվությամբ հանդես եկող դեսպանները հենց Մինսկի խմբի համանախագահող երկրների ներկայացուցիչներն են, այսինքն, ՀՀ-ում հավատարմագրված՝ Ռուսաստանի Դաշնության, ԱՄՆ-ի և Ֆրանսիայի Հանրապետության լիազոր դեսպանները, որոնք մեծ ակտիվությամբ և ինտենսիվությամբ տարատեսակ հանդիպումներ են անցկացնում հայաստանյան ներքաղաքական դաշտում: Եվ, եթե սրան գումարենք նաև թուրքական կողմից պարբերաբար հնչող այն ահազանգը, որով Թուրքիան ցանկություն է հայտնում փոխել համանախագահող երկրների ձևաչափը և Արցախի հարցում որոշիչ դեր ստանձնել Մինսկի խմբում, ապա արդյո՞ք դեսպանների մասնակցությամբ կուլիսային այս քննարկումներում չի՞ կարող քննարկվել արցախյան հիմնահարցում թուրքական կողմի ներգրավվածության հարցը, ինչն անընդունելի ձևաչափ է հանդիսանում հայկական կողմի համար: Արման Նավասարդյանը նկատում է՝ բարեբախտաբար, Մինսկի խմբում ներգրավված երեք պետություններն էլ համախմբված են միևնույն նպատակի շուրջ.

«Ամերիկան և Ռուսաստանը, Ռուսաստանն ու Ֆրանսիան և այս երեք պետությունները միասին վերցրած այն հազվագյուտ դեպքերից են, երբ Արցախի հարցում բոլորը միասին կոնսենսուսի մեջ են: Այն, որ մինչև հիմա տարբեր պատճառներով, օրինակ` ԱՄՆ-ն պասիվ էր, իր երկրի ներքաղաքական խնդիրներով պայմանավորված, սա դեռ ոչինչ չի նշանակում: Նորից եմ կրկնում՝ ՀՀ-ում հավատարմագրված դեսպանների վերջին շրջանի ակտիվությունը միայն դրական լույսի ներքո պետք է վերլուծել, միաժամանակ՝ ողջունելով այդ ակտիվությունը: Երբ Մինսկի խումբ կոչվող քաղաքական կառույցը կվերսկսի իր աշխատանքները և արցախյան հիմնահարցի լուծման շրջանակներում կգրավի իր ուրույն տեղը, դրանից հայկական կողմը միայն շահող դուրս կգա:

Իսկապես, Թուրքիան և Ադրբեջանն անում են ամեն ինչ, որպեսզի դա տեղի չունենա, ավելին՝ նրանք ամեն կերպ փորձում են հեռացնել այստեղից Ռուսաստանի Դաշնությանը՝ խաղաղապահ ուժերին հատկապես: Սա բացառապես մեկ նպատակ է հետապնդում՝ չեզոքացնելով Ռուսաստանի Դաշնությանը, տարածաշրջանում գերիշխող դեր ստանձնել: Այդ նպատակին է ձգտում, մասնավորապես Թուրքիան, որն, ի դեպ, շատ հեռուն գնացող նպատակներ ունի, այսպես ասած՝ վարդագույն երազանք, որն է՝ պանթյուրքիզմի ծրագրի իրականացումն ու իսլամիզմի տարածման վտանգը:

Դժբախտաբար, Թուրքիային հաջողվեց պատերազմի արդյունքում ոտք դնել այստեղ և սա հարցի մյուս կողմն է, որին մենք, անպայմանորեն, պետք է ուշադրություն դարձնենք: Այնուհանդերձ, վերադառնալով քննարկման բուն թեմային, նորից պետք է շեշտեմ՝ ՀՀ-ում հավատարմագրված դեսպանների վերջին շրջանի նկատելի ակտիվությունը միայն դրական դրսևորում ունի, որից հայկական կողմն Արցախի հարցում հնարավորինս շահավետ կերպով դուրս գալու հնարավորություններ պետք է գտնի»,- ամփոփելով զրույցն, ասում է ՀՀ նախկին փոխարտգործնախարար, ՀՀ արտակարգ և լիազոր դեսպան Արման Նավասարդյանը:

Հեղինակ՝ Նվարդ Մանվելյան

Աղբյուր` Փաստինֆո