Փաստ ինֆո

Կորոնավիրուսի համավարակով պայմանավորված՝ կտրուկ աճել են թմրանյութերի ներմուծման դեպքերը փոստային առաքման միջոցով, իսկ թմրամիջոցի ներմուծումը ցամաքային սահմանով՝ նվազել է։ Այս մասին ասուլիսին ասել է ՊԵԿ մաքսանենգության դեմ պայքարի վարչության պետ Վարդան Վարդանյանը։ 

Նշված վիճակագրությունը պամանավորված է նրանով, որ 2020թ փետրվարի վերջից ուղևորների և հետիոտների համար հայ-իրանական սահմանը փակվել է, մինչդեռ՝ կորոնավիրուսի համավարակի հետ կապված սահմանափակումները չեն տարածվում փոստային առաքանիների վրա։

2020թ հայտնաբերվել և ապօրինի շրջանառությունից դուրս է բերվել 6.1 կգ մետանֆետամին, 5.2 կգ ափիոն, 3.1 կգ մարիխուանա, 2.9 կգ կետամին, 1.6 կգ հերոին, «Էլէզդե» տեսակի թմրանյութի պարունակությամբ 1300 հատ բլոտեր, ՄԴՄԱ թմրանյութի պարունակությամբ 591.5 դեղահաբ, 83 հատ հաշիշի յուղի պարունակությամբ էլեկտրոնային սիգարետներ և մուշտուկներ։

Անդրադառնալով վարչական իրավախախտումներին՝ Վարդանյանը նշեց, որ 2020թ ընթացքում 130 դեպքով սկսվել է վարչական վարույթ, մինչդեռ՝ 2019թ ունեցել ենք 53 գործ։

«Հայտնաբերվել է մաքսային հսկողությունից թաքցման, չհայտարարագրման կամ ոչ ճշգրիտ հայտարարագրման եղանակով ՀՀ ապօրինի ներմուծված 121 հատ բջջային հեռախոս, շուրջ 1 կգ ոսկյա զարդեր, շուրջ 72 կգ թմրանյութ և հոգեմետ նյութ չպարունակող դեղամիջոցներ, սննդամթերք, հագուստ, ավտոմեքենաների պահեստամասեր և այլ ապրանքներ»,- նշեց Վարդանյանը։

ՊԵԿ պաշտոնյայի դիտարկմամբ՝ 2020թ կրկնակի աճել է ՀՀ ներմուծված տրանսպորտային միջոցների հետ կապված իրավախախտումներով հարուցված վարչական վարույթների քանակը, ունեցել ենք 55 դեպք, մինչդեռ՝ 2019թ ունեցել ենք 22 դեպք։

Աղբյուր` Փաստինֆո