Փաստ ինֆո

«102-րդ ռազմաբազայի ակտիվացման վերաբերյալ խոսակցություններն ուղիղ կապ ունեն այս օրերին Կարսում տեղի ունեցող թուրք – ադրբեջանական «Ձմեռ 2021» պլանային զորավարժությունների անցկացման հետ: Ամեն ինչ օրինաչափ է՝ թուրք – ադրբեջանական զորավարժությունների թիրախը Հայաստանի Հանրապետությունն է, այստեղ տեղակայված 102-րդ ռուսական ռազմաբազան, ինչպես նաև՝ Սյունիքը: Թուրքիան համարում է, որ արցախյան վերջին պատերազմով ինքը վերջնականապես չի լուծել իր առջև դրված խնդիրը, այն է՝ Արցախի և Սյունիքի վերջնական զավթումը, այնպես որ՝ թուրք – ադրբեջանական տանդեմն, անպայման, հարվածելու է Սյունիքին, սա՝ անխուսափելի է, մնում է հասկանալ, թե դա երբ կարող է տեղի ունենալ»,- ասում է ռազմական փորձագետ Դավիթ Ջամալյանը, «Փաստինֆո»-ի հետ զրույցում անդրադառնալով Գյումրիում տեղակայված 102-րդ ռուսական ռազմաբազայի ակտիվացման վերաբերյալ շրջանառվող տեղեկություններին:

Վերջինս ընդգծում է՝ Կարսում տեղի ունեցող զորավարժություններով, Թուրքիան, ըստ էության, ուժի ցուցադրմամբ է զբաղված, որն ուղղված է Հայաստանին և իր բնական ռազմավարական դաշնակցին՝ Ռուսաստանի Դաշնությանը. «Բնական է, որ նման իրավիճակում հակառակորդ կողմը, այսինքն` մենք նույնպես պետք է համապատասխան քայլեր ձեռնարկենք: Մենք ասելով ես նկատի չունեմ Նիկոլ Փաշինյան կոչվածին և իր վարչախումբը, որ իրականում թուրք - ադրբեջանական տանդեմի գործընկերն է, ոչ թե հակառակորդը: Նկատի ունեմ Հայաստանի Հանրապետությունը, որպես պետականություն և այդ պետականության դաշնակցին՝ Ռուսաստանի Դաշնությանը, որի հետ կնքած ռազմական դաշինքը հստակ իրավապայմանագրային հիմքեր ունի և նման իրավիճակներում, ինչպիսին այսօր ՀՀ-ում տիրող զարգացումներն են, դա պետք է գործի: Հետևաբար, այս օրերին, Կարսում ընթացող զորավարժություններին զուգահեռ, 102-րդ ռազմաբազայի ակտիվացումը ոչ միայն օրինաչափ, այլ, նույնիսկ, անհրաժեշտ իրողություն է»,- ասում է Դավիթ Ջամալյանը:

Հարցին՝ արդյո՞ք Կարսում անցկացվելիք թուրք – ադրբեջանական զորավարժություններին կարո՞ղ է հաջորդել նոր պատերազմ, այս անգամ՝ Թուրքիայի մասնակցությամբ Հայաստանի Հանրապետության և մասնավորապես՝ Սյունիքի նկատմամբ ոտնձգություններով՝ ռազմական փորձագետը պատասխանում է՝ պատերազմ սպասվում է, թիրախում հենց Սյունիքն է, նախահարձակ կողմն այս անգամ կարող է բացահայտ կերպով հանդես գալ Հայաստանի արևմտյան սահմանակից հարևան Թուրքիան, իսկ որ դա կարող է տեղի ունենալ զորավարժություններից անմիջապես հետո, ոչ հերքում, ոչ էլ հաստատում է.

«Ամեն պարագայում, ռուսական կողմը ռազմական մեծ ընդգրկվածությամբ, արդեն իսկ ռեգիոնում է, նա իր հատու խոսքը նույնպես արդեն ասել է և, ըստ էության, հանդես է գալիս որպես խաղաղության միակ գործող երաշխիք: Ամեն դեպքում, ռազմական ոտնձգությունների պետք է սպասել, միաժամանակ ամեն րոպե պատրաստվելով նոր պատերազմի, որը կարող է պայթել մեզ համար ցանկացած անսպասելի պահին», -ասում է Դավիթ Ջամալյանը:

Անդրադառնալով երեկ հայրենիք վերադարձած թվով հինգը ռազմագերիների թեմային և այս ֆոնին ՀՀ-ում վարչապետ աշխատող անձի Մոսկվա կատարելիք առաջիկա ուղևորությանը, որ, ըստ մամուլում շրջանառվող լուրերի, պետք է տեղի ունենա արդեն այսօր, որի ընթացքում Նիկոլ Փաշինյանը պատրաստվում է նոր զիջումների գնալ, Դավիթ Ջամալյանը նկատում է՝ քանի դեռ Հայաստանում իշխանության չի եկել պետականակենտրոն նոր ուժ, որը ձեռք - ձեռքի տված կփոխի ռազմաքաղաքական վեկտորի ուղղությունը, օրվա իշխանությունները երկիրը շարունակելու են տանել պատերազմի և անհեթեթ զիջումների կործանարար ճանապարհով. «Ինչ վերաբերում է այսօր կամ վաղը Մոսկվայում նոր նվաստացուցիչ փաստաթուղթ ստորագրելու վերաբերյալ շրջանառվող լուրերին, ապա Նիկոլ Փաշինյան կոչվածի պարագայում ցանկացած անհավանական թվացող վարկած իրականություն է:

Սա ասում եմ ցավով և մեծ մտավախությամբ, մանավանդ, որ արդեն իսկ պարզ է՝ չգրված օրինաչափության համաձայն, նա դա անում է բոլորից գաղտնի, ստոր կերպով, ամեն անգամ փաստի առաջ կանգնեցնելով թե´ երկիրը, թե´ այնտեղ ապրող մարդկանց և նույնիսկ շատ հաճախ նաև՝ ռազմական դաշնակիցներին, որովհետև նորից եմ կրկնում, այս մարդը ոչ թե Հայաստանի անվտանգ ներկայով և ապագայով մտահոգ երկրի ղեկավարի է, այլ թուրք -ադրբեջանական տանդեմի ամենահավատարիմ և իսկական գործընկերը, ինչի արդյունքում մենք ունենա այն, ինչ ունենք»,- ամփոփելով զրույցն, ասում է ռազմական փորձագետ Դավիթ Ջամալյանը:

Հեղինակ՝ Նվարդ Մանվելյան

Աղբյուր` Փաստինֆո