Փաստ ինֆո

Ինչու՞ եք կանգ առել այն համոզման վրա, որ բուհերի՝ 9-հոգանոց կառավարման խորհուրդները, որտեղ գերակշռելու են լիազոր մարմնի և կառավարության ներկայացուցիչները, կարող են ապահովել բուհի ինքնավար, անկաշկանդ կառավարումը։ Այս մասին ԱԺ-ում ասաց «Լուսավոր Հայաստան» խմբակցության պատգամավոր Անի Սամսոնյանը՝ դիմելով ԿԳՄՍ նախարար Վահրամ Դումանյանին։

Նշենք, որ նոր նախագծով առաջարկվում է բուհերի կառավարման խորհուրդները ձևավորել 9 հոգանոց կազմով, որից 5-ը կլինեն կառավարության և լիազոր մարմնի կողմից, 4-ը կլինեն դասախոսներ և ուսանողներ։ Ընդդիմությունը, սակայն, կարծում է, որ անդամների այս բաշխվածությունը կոտնահարի բուհերի ինքնավարության սահմանադրական իրավունքը։

ԿԳՄՍ նախարարը, անդրադառնալով ընդդիմադիր պատգամավորի այս դիտարկմանը, նշեց՝ իր համոզմամբ անդամների հարաբերակցությունը պետք է լիներ ոչ թե 5-4, այլ 9-0․ «Եթե բուհի հիմնադիրը պետությունն է, ապա պետությունը պետք է կրի 100 տոկոս պատասխանատվություն բուհի գործունեության համար, դրա համար պետք է ունենա համապատասխան իրավունքներ»,-նշեց նախարարը։

Անի Սամսոնյանը հակադարձեց՝ ՀՀ Սահմանադրությամբ բուհերին տրված է իրավունք՝ ունենալ ինքնավարություն, սակայն 9-հոգանոց կառավարման խորհրդով, որտեղ ակադեմիական շրջանակին և ուսանողական շրջանակին տրված է շատ սահմանափակ տեղ, ոտնահարվում է բուհերի ինքնավարության սահմանադրական իրավունքը․ «Վտանգվում է բուհի ինքնավարության իրավունքը»,-ընդգծեց պատգամավորը։

Աղբյուր` Փաստինֆո