Փաստ ինֆո

Ռազմական դրության իրավական ռեժիմը չպետք է ծառայեցվի որևէ անձի կամ քաղաքական ուժի նպատակներին։ Այս մասին «Փաստինֆո»-ի հարցին ի պատասխան ասել է ՀՀ նախագահ Արմեն Սարգսյանը։

«Փաստինֆո»-ն պաշտոնական հարցման միջոցով հետաքրքրվել էր՝ ինչպես է նախագահը վերաբերում ստեղծված իրավիճակին, երբ պատերազմից 3 ամիս անց Հայաստանի Հանրապետությունում դեռ պահպանվում է ռազմական դրությունը։

«Ռազմական դրությունը հայտարարվում է կառավարության կողմից, իսկ ռազմական դրության իրավական ռեժիմը սահմանվում է օրենքով։ Նախագահը համարում է, որ ցանկացած որոշում կամ իրավական կարգավորում պետք է բխի պետության ու ժողովրդի շահերից և չպետք է ծառայեցվի որևէ անձի կամ քաղաքական ուժի նպատակներին»,- Նախագահի դիրքորոշումը փոխանցել է ՀՀ նախագահի աշխատակազմի հասարակայնության հետ կապերի վարչությունից հայտնում են․ ։

ՀՀ նախագահը դեռեւս 2020 թվականի նոյեմբերի 16-ին հայտարարել էր Ազգային համաձայնության կառավարություն ձեւավորելու անհրաժեշտության մասին, որին պետք է հանձնվի երկրի կառավարումը մինչեւ արտահերթ խորհրդարանական ընտրությունների անցկացումը, սակայն ձախողած ու երկիրը լրջագույն մարտահրավերների առաջ կանգնեցրած գործադիր իշխանության ղեկավարը հրաժարական տալ չի պատրաստվում։ «Փաստինֆո»-ն հետաքրքրվել էր Նախագահից, թե արդյոք պատրաստվում է իր սահմանադրական լիազորությունների շրջանակում հետևողական լինել վարչապետի հրաժարականի իր պահանջին, սակայն Նախագահն այս հարցին խուսափել է պատասխանել՝ նշելով, որ երկրում ստեղծված իրավիճակի ու հանգուցալուծումների վերաբերյալ նախագահն իր կարծիքն արտահայտել է բազմաթիվ հանդիպումների, ելույթների, հարցազրույցների ընթացքում։

Հիշեցնենք, որ նոյեմբերի 9-ի եռակողմ հայտարարությունից օրեր անց՝ նոյեմբերի 16-ին ՀՀ նախագահ Արմեն Սարգսյանը հայտարարել էր՝ երկիրը ցնցումներից զերծ պահելու համար անխուսափելի են ԱԺ արտահերթ ընտրություններ․ «Իմ կարծիքով միակ պատասխանատու մոտեցումը կարող է լինել կառավարության և իշխող քաղաքական ուժի կողմից սեփական ներուժի օբյեկտիվ գնահատելը և սեղմ ժամկետում ճանապարհային քարտեզ ներկայացնելը, որով կնախատեսվեն համապատասխան սահմանադրական գործընթացների նախաձեռնման ժամկետները, որոնց արդյունքում հնարավոր կդառնա իրականացնել ԱԺ արտահերթ ընտրություններ, իսկ մինչ այդ կառավարումը կհանձնվի բարձր որակավորում ունեցող Ազգային համաձայնության կառավարությանը»,-նշել էր նախագահը։

Աղբյուր` Փաստինֆո