Փաստ ինֆո

Ադրբեջանցիների կողմից գերեվարված և այժմ գերության մեջ գտնվող զինծառայողների ծնողներին չեն գոհացնում իրենց զավակներին վերադարձնելու ուղղությամբ կառավարության ձեռնարկած քայլերը՝ պահանջելով ավելի գործնական միջոցներ ձեռնարկել։ Այսօր զինվորների ծնողները փակել էին Գյումրի-Երևան ավտոճանապարհը։ Շիրակի մարզի Սարապատ համայնքի ղեկավար Արտուշ Մանուկյանը «Փաստինֆո»-ի հետ զրույցում ասաց, որ ծնողներին հետաքրքրում է գերիների վերադարձի գործընթացը, թե ինչ աշխատանքներ են տարվում։

«Որ կառույցին դիմել են՝ առայժմ անարդյունավետ է։ Միայն ռուս խաղաղապահների միջոցով է հնարավոր եղել վերադարձնել գերիներից երկուսին։ Նախորդ անգամ վերադարձված հինգ գերիներից երկուսը մեզ մոտից են եղել։ Արդյունքը կլինի այն, երբ մարդը տեսնի, որ իր երեխան տանն է։ ՊՆ նախարարի մոտ էլ են եղել, վարչապետի հետ էլ են հանդիպել, ամեն օր մարզպետի և ԱԱԾ ղեկավարի հետ են հանդիպում։ Եթե արդյունք չկա, երեխան տուն չի հասել, բնական է՝ մարդիկ բավարարված չեն լինի։ Եթե որևէ ժամկետ նշվի կամ հստակ գործողությունների հերթականություն տեսնի մարդը, կհամոզվի, կսպասի հինգ օր, տասը օր, բայց երբ անորոշություն է՝ մարդիկ արդեն ակցիաներ են անում»,- նշեց նա՝ հավելելով, որ ակցիաներն իրականացվում են՝ գերիների վերադարձման գործընթացն արագացնելու համար ։

«Մանավանդ, երբ մի խումբ գալիս է, բոլորն ակնկալում են, որ այդ խմբում իրենց երեխաներից մեկը կա և երբ տեսնում են, որ իրենց երեխաները չկան, մարդկանց մոտ հիասթափություն է առաջանում»,- նշեց նա՝ հավելելով, որ այսօր ակցիան դադարեցրել են, բայց ակցիաները կլինեն շարունակական և առաջիկայում ծնողները կհանդիպեն նաև վարչապետին։

Նշենք, որ հաջորդ շաբաթվա ընթացքում նախատեսվում է Նիկոլ Փաշինյանի այցը Գյումրի։

Աղբյուր` Փաստինֆո