Փաստ ինֆո

Երևանի ընդհանուր իրավասության դատարանը՝ դատավոր Աննա Դանիբեկյանի նախագահությամբ, թույլատրեց ՀՀ երկրորդ նախագահ Ռոբերտ Քոչարյանի կալանադրված գույքի հետ կնքել ցանկացած գործարք, որը չի կարող հանգեցնել նշված գույքի օտարմանը։

Նշենք, որ դատական նիստում նման միջնորդությամբ հանդես էր եկել պաշտպան Հովհաննես Խուդոյանը։ Նա պարզաբանեց, որ խոսքը գնում է կոմունալ ծառայությունների և գույքի անհատույց օգտագործման հանձնելու վերաբերյալ պայմանագրերին՝ նշելով, որ անշարժ գույքի օտարումը ռիսկի տակ չի դրվում։ Մեղադրող կողմը չառարկեց՝ նշելով, որ, եթե խոսքը գնում է Ռոբերտ Քոչարյանին պետության կողմից տրամադրված տան և հարակից տարածքի մասին, ապա դրա հետ կապված առարկություն չունեն։ Նախագահող դատավորը որևէ խոչընդոտ չի տեսավ եւ որոշեց թույլ տալ գույքի օտարում չհանդիսացող և օտարմանը չհանգեցնող գործարքների կնքումը՝ կալանադրված անշարժ գույքի նկատմամբ։

Այժմ դատարանը դռնփակ կարգով քննում է պաշտպան Հայկ Ալումյանի միջնորդությունը՝ «Մարտի 1»-ի մայր գործով տուժող Արթուր Ավագյանի վերաբերյալ։

Վերջինս տարբեր աստիճանի մարմնական վնասվածքներով 2008 թ. մարտի 1-ին՝ ժամը 22:15-ին, շտապ օգնության մեքենայով տեղափոխվել է «Արմենիա» բժշկական կենտրոն, մի քանի օր մնացել վերակենդանացման բաժանմունքում: Հիվանդանոցում արձանագրվել էին ծայրահեղ ծանր վիճակում գտնվող Արթուր Ավագյանի վնասվածքները. «Պարանոցի եւ դեմքի հրազենային վնասվածք, տրավմատիկ շոկ, ձախ ենթածնոտային շրջանի պատռվածք վերք (հրազենային վերքի մուտք), աջ թշային շրջանի, վերին շրթունքի, բերանի աջ անկյան պատառոտված, ջնջխված վերք, հյուսվածքների արատ (հրազենային վերքի ելք):

Հիշեցնենք՝ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու համար, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար։

Հեղինակ՝ Իզաբել Սահակյան

Աղբյուր` Փաստինֆո