Փաստ ինֆո

Առաջարկել ենք պարիտետային քննիչ հանձնաժողով ստեղծել։ Նախագիծը ձեր մոտ է, դուք էլի դեմ եք դրան։ Մարդիկ ուզում են իմանալ, թե պատերազմի ժամանակ ինչպես է տապալվել օրինակ զորահավաքային համակարգը։ Այս մասին խորհրդարանում ասաց ԱԺ «Լուսավոր Հայաստան» խմբակցության ղեկավար Էդմոն Մարուքյանը՝ դիմելով իշխանական պատգամավորներին։

«Հիմա ստեղծու՞մ ենք այդ հանձնաժողովը, թե ոչ։ Հիմա էլ դա եք ցրու՞մ օրակարգից։ Մենք պատրաստ ենք, եկեք քննարկենք։ Մեր գործընկերն ասաց՝ կառուցողական չեք, եթե քաղաքական դաշտում խոշորացույցով ման գաք, մեզանից կառուցողական ուժ կգտնե՞ք։ Մենք կառուցողական չե՞նք։ Մեկն ասում է՝ պետք է ձեզ գնդակահարել, դուք ասում եք՝ կալանավորել։ Մյուսներն ասում են՝ եկեք օրակարգում հարց քննարկենք, ասում եք՝ դուք կառուցողական չեք։ Ծայրահեղությունների մեջ եք, դուք պրոբլեմներ ունեք»,-ասաց պատգամավորը։

ԱԺ «Իմ քայլը» խմբակցության ղեկավար Լիլիթ Մակունցն ասաց, որ Էդմոն Մարուքյանի հետ քննարկել են այդ առաջարկը․ «Մենք առաջարկել ենք նոր հեծանիվներ չհորինենք և շարժվենք գործող կարգավորումներով։ Մենք կողմ ենք արտահայտվել քննիչ հանձնաժողով ստեղծելուն և պատրաստ ենք այդ ուղղությամբ ցանկացած կերպ օժանդակել, ընդառաջել, բայց միևնույն ժամանակ ուզում եմ ձեզ հիշեցնել, որ պատերազմի հետ կապված արդեն հարուցված են քրեական գործեր, որոնք այս պահին ձեր առաջարկած տարբերակով անհնար են դարձնում այդ պրոցեսը սկսելը»,-նշեց Լիլիթ Մակունցը։

Աղբյուր` Փաստինֆո