Փաստ ինֆո

Քրեական հեղինակություն համարվող Արտյոմ Կանևսկոյը՝ Արտյոմ Հարությունովը, դատարանում վերջին խոսքով հանդես կգա մարտի 4-ին, որից հետո դատարանը կհեռանա խորհրդակցական սենյակ՝ դատավճիռ կայացնելու։

Հիշեցնենք, որ քրեական հեղինակությունը մեղադրվում է ապօրինի զենք պահելու մեջ։ Ըստ մեղադրանքի՝ Կանեւսկոյը իր կողմից օգտագործվող «Տոյոտա» մակնիշի ավտոմեքենայի մեջ ապօրինի պահել է Մյասնիկ Մատինյանի անվամբ հաշվառված, կրակելու համար պիտանի ակոսափող հրազեն հանդիսացող որսորդական ինքնաձիգ՝ իր պահեստատուփով, գործարանային արտադրության փամփուշտներ։

Նրա նկատմամբ որպես խափանման միջոց է ընտրվել չհեռանալու մասին ստորագրությունը:

Քրեական գործով դատաքննությունն արդեն ավարտվել է։ Մեղադրող դատախազ Հայկ Խաչատրյանը հիմնավորված է համարել առաջադրված մեղադրանքը և դատարանին միջնորդել Հարությունովին դատարապարտել ազատազրկման՝ 1 տարի 6 ամիս ժամկետով։ Երևանի ընդհանուր իրավասության դատարանում՝ դատավոր Մնացական Մարտիրոսյանի նախագահությամբ, երեկ կայացած դատական նիստի ընթացքում պաշտպանական ճառով է հանդես եկել Հարությունովի պաշտպան Հովսեփ Սարգսյանը՝ միջնորդելով արդարացնել նրան։

Փաստաբանի գնահատմամբ՝ իր պաշտպանյալի արարքում բացակայում է հանցակազմը։ Փաստաբան Հովսեփ Սարգսյանը «Փաստինֆո»-ի հետ զրույցում ասաց, որ Հարությունովի մեքենայում հայտնաբերված զենքը նրան չի պատկանում, ունի կոնկրետ սեփականատեր, որը ցուցմունք տվել է թե նախաքննության, թե դատաքննության ընթացքում, իսկ վարույթն իրականացնող մարմինները որևէ հակափաստարկ չեն ներկայացրել։

«Ոստիկանության ծառայողներն ակնհայտ ապօրինի՝ ասֆալտին փռելով, մեքենան ոստիկանների կողմից վարելով, ձեռնաշղթաներ հագցնելով բերել են հասցրել են ոստիկանության շենք, հետո՝ Նալբանդյան 130 հասցեում գտնվող ոստիկանության շենքի բակում իրավասություն չունեցող ոստիկանության աշխատող խուզարկություն է կատարել՝ առանց դատարանի որոշման և, իբրև, հայտնաբերվել են այդ զենքերը։ Զենքերն էլ ընդամենը մեկ ժամ առաջ մեքենայի մեջ է դրած եղել կոնկրետ սեփականատերը՝ Մյասնիկ Մատինյանը, որն այդ պահին այդտեղ չի գտնվել»,- նշեց փաստաբանը՝ հավելելով, որ ավտոմեքենան հավասարեցված է բնակարանին և չի կարող խուզարկվել առանց դատարանի որոշման, մինչդեռ՝ որևէ դատարանի որոշում, հանձնարարություն չի եղել, առանց իրավական փաստաթղթի միաժամանակ երկու մեքենա խուզարկվել է։

«Ոստիկանության գործելաոճն է։ Դատարանները նախկինում արդարացրել են։ Հույս ունեմ՝ դատարանը ողջամիտ կգտնվի ապացույցների գնահատման հարցում։ Ես խնդրել եմ դատարանին՝ դուրս գալ «ասֆալտին փռելու, պատերին ծեփելու» հանձնարարության տրամաբանությունից և արդարադատություն իրականացնել»,- նշեց փաստաբանը։

«Նախկինում քննված քրեական գործով և այլ «ասֆալտին փռելու» օպերացիաների շրջանակներում Արտյոմ Հարությունովի տունը խուզարկել են մի քանի անգամ, որսորդական զենքեր էին հայտնաբերել, դրանք ստուգել էին։ Կան փորձաքննության եզրակացությունները, ոստիկանությունում էլ տեղեկացված են։ Ամենայն հավանականությամբ, գործի նյութերը նայելով, ոստիկանները տեսել են, որ Մատինյանը զենք է դրել մեքենայի մեջ, հետևից եկել են և կանգնեցրել։ Անմիջապես մարզասրահի տարածքից շարժվել են, փակել են մեքենաների դեմը, ֆիզիակական ուժի գործադրմամբ քաշել են դուրս են հանել բոլորին, պառկեցրել են բոլորին, տեսանկարահանել են, հետո իրենց այլ մեքենաներով են տարել ոստիկանություն»,- նշեց նա։

Հավելենք, որ ՀՀ քրեական օրենսգրքի 235-րդ հոդվածի 1-ին մասով նախատեսված արարքը պատժվում է ազատազրկմամբ՝ առավելագույնը երեք տարի ժամկետով:

Հեղինակ՝ Իզաբել Սահակյան

Աղբյուր` Փաստինֆո