Փաստ ինֆո

Ցավոք չգիտեմ՝ այժմ Արցախն ինչ կարգավիճակ ունի և ով է պատասխանատու Արցախի անվտանգության համար։ Այս մասին «Փաստինֆո»-ի հետ զրույցում ասաց ՀՀ ՊՆ ռազմական վերահսկողական ծառայության նախկին պետ, ՀՀ ԶՈւ գլխավոր շտաբի նախկին պետ Մովսես Հակոբյանը։

Նշենք, որ Նիկոլ Փաշինյանի կողմից նոյեմբերի 9-ին կապիտուլյացիոն ակտի ստորագրմամբ՝ Արցախի զգալի մասն Ադրբեջանին հանձնելուց հետո շարունակվում է զինաթափման գործընթացը՝ արդեն Արցախի՝ Ադրբեջանի վերահսկողության տակ չանցած տարածքներում։ Նախ՝ հայտարարվեց Պաշտպանության բանակի հնարավոր կազմալուծման մասին, իսկ այսօր արդեն մամուլում տեղեկություններ շրջանառվեցին առ այն, որ զորակոչի ենթակա ՀՀ քաղաքացիները ծառայելու են միայն ՀՀ տարածքում և այլևս Արցախ չեն մեկնի՝ ծառայության։ Պարզվում է՝ ավանդական վիճակահանության ժամանակ Արցախի զորամասերը նշված չեն տարբերակների մեջ։ Ընդ որում՝ սա այն դեպքում, երբ Ադրբեջանն ունի 3 զորամիավորում՝ բուն բանակը, Նախիջևանի առանձին համազորային բանակը, Պետական սահմանապահ ծառայությունը։ Հատկանշական է, որ նշված երեք զորամիավորումները կարող են ինքնուրույն գործել։ Այլ խոսքով՝ ՊԲ-ն կազմալուծելով՝ ՀՀ իշխանություններն անպաշտպան են թողնում Արցախից մնացած վերջին փշրանքները եւ սա այն դեպքում, երբ Հայաստանը համարվում է Արցախի անվտանգության երաշխավորը։

ՀՀ ՊՆ ռազմական վերահսկողական ծառայության նախկին պետ, ՀՀ ԶՈւ գլխավոր շտաբի նախկին պետ Մովսես Հակոբյանը «Փաստինֆո»-ի հետ զրույցում ասաց, որ ցավոք չգիտի՝ Արցախն ինչ կարգավիճակ ունի և ով է պատասխանատու Արցախի անվտանգության համար, ուստի դժվարանում է մեկնաբանել։

Հարցին՝ արդյո՞ք պայմանագրային հիմունքներով հնարավոր կլինի ունենալ այնպիսի զորամիավորում, որն ինչ-որ չափով համեմատելի կլինի ՊԲ-ի հետ, Հակոբյանը պատասխանեց. «Չգիտեմ՝ բանակն ումից պետք է պաշտպանի և ինչ պետք է պաշտպանի։ Միանշանակ կարող եմ նշել, որ, ինչպես բոլորս ականատես ենք եղել, 44 օրյա պատերազմում հիմնականում պայքարել են պարտադիր զորակոչի զինծառայողները և այն, որ ավելի մեծ կորուստներ չունեցանք, դա միայն և միայն մեր կանոնավոր բանակի շնորհիվ է։ Մեկնաբանությունները Ձեզ եմ թողնում»։

Իսկ թե այդ պարագայում կլինեն ներքին կամ սահմանապահ զորքեր՝ Հակոբյանն ասել չի կարող. «Եթե մենք Արցախի կարգավիճակի հարցը հստակեցնենք, արդեն բոլոր հարցերի պատասխանները կարելի է կռահել կամ ենթադրել»։

Ինչ վերաբերում է պատերազմից հետո ժամկետային զինծառայողների ծնողների կողմից պարբերաբար իրականացվող ակցիաներին, որոնցով վերջիններս պահանջում էին Արցախից վերադարձնել այն ժամկետային զինծառայողներին, որոնք ՀՀ քաղաքացիներ են՝ պատճառաբանելով, թե կապիտուլյացիոն ակտի համաձայն՝ ՀՀ քաղաքացիները չպետք է ծառայեն Արցախում, Հակոբյանը նշեց, որ իր համար դա շատ ցավալի է։

«Ինձ համար շատ ցավալի է, թե ինչու այդպես դարձավ, որ մեր հայրենակիցների մի մասը հրաժարվեցին մեր հայրենիքի մի մասի պաշտպանությունից»,- նշեց Հակոբյանը։
Իսկ թե արդյո՞ք դա ի սկզբանե ուղղորդված էր իշխանությունների կողմից՝ հետագայում նման որոշում կայացնելու համար, Հակոբյանը նշեց, որ գուշակություններով չի զբաղվում և իր ձեռքի տակ չկան նման փաստաթղթեր։

Հեղինակ՝ Իզաբել Սահակյան

Աղբյուր` Փաստինֆո