Փաստ ինֆո

Ազգային ժողովը հերթական նիստերն է գումարել: Օրակարգում ընդգրկված է 16 հարց, որոնց թվում է նաև Վճռաբեկ դատարանի նախագահի ընտրության, «Պետական սահմանի մասին» օրենքում լրացումներ կատարելու մասին, «Տեղական ինքնակառավարման մասին» Հայաստանի Հանրապետության օրենքում լրացում կատարելու մասին հարցերը։

Օրակարգի հարցերը ներկայացրեց ԱԺ նախագահ Արարատ Միրզոյանը:

«Լուսավոր Հայաստան» խմբակցության պատգամավոր Տարոն Սիմոնյանը նկատեց՝ 4 տարի 8 ամիս անց Ադրբեջանի նախագահը կարող է եռակողմ համաձայնագրի հիման վրա պահանջել ռուսական խաղաղապահ ուժերի դուրսբերում Արցախից, իսկ այս ժամանակահատվածում Հայաստանը պետք է պատրաստվի նման հավանական սցենարի, այնուհետև ԱԺ նախագահից հետաքրքրվեց՝ արդյո՞ք օգտագործվող ժամանակահատվածն արդյունավետ է օգտագործվում.

«Օրակարգում 16 հարց է, ուզում եմ գտնել գեթ մեկ հարց, որն ադեկվատ է մեր առջև կանգնած մարտահրավերներին՝ այս ժամանակային համատեքստում: Ուզում եմ հասկանալ՝ օրակարգը հաստատելուց ի՞նչ տրամաբանությամբ ենք առաջնորդվում և արդյոք համաչափ են այսօրվա մեր քննարկած հարցերը այն մարտահրավերին , որ մեր առջև կանգնած են»,-ասաց Տարոն Սիմոնյանը:

Արձագանքելով պատգամավորին՝ Արարատ Միրզոյանն ասաց, որ պատերազմից հետո շատ մարտահրավերներ կան, որոնց պետք է ադեկվատ արձագանքել և դրանով զբաղվում են ՀՀ տարբեր ինստիտուտները:

«Այո՛, ԱԺ-ն զանազան գործընթացներում իր դերակատարումը ևս ունի, բայց ԱԺ-ի այլ՝ առօրյա պարտականությունները ոչ ոք անվավեր չի ճանաչել և չի էլ կարող։ Մենք ունենք նաև բազմազան այլ խնդիրներ մեր առջև կանգնած, մենք չենք կարող զբաղվել միայն մեկ հարցով»,-ասաց Արարատ Միրզոյանը։

Աղբյուր` Փաստինֆո