Փաստ ինֆո

«Ալիևը վախենում է ՀՀ-ից հնչող ռևանշի կոչերից։ Նա օդ ու ջրի պես ուզում է, որ Փաշինյանը մնա»,- այս մասին լրագրողների հետ հանդիպմանն ասաց ադրբեջանագետ Անժելա Էլիբեգովան՝ անդրադառնալով ադրբեջանական տրամադրություններին։

«Իրենք հաղթանակին 26 տարի գալիս էին, ռևանշի գաղափարով ապրում էին սերունդներ, դաստիարակում էին և վերջապես ոչ լիարժեք, բայց ինչ-որ բան ստացան։ Իրենք համարում են, որ այնուամենայնիվ ամբողջ Արցախը չստացան և վերջնականապես այդ հարցը իրենց համար չլուծեցին, դրա համար Ալիևը չափազանց վախենում է ռևանշի գաղափարից»,- ասաց Էլիբեգովան, հավելելով, որ Ադրբեջանի նախագահը այս մասին տարբեր հայտարարություններով արդեն խոսել է։ Ասել՝, թե հուսով են, որ ներկա իշխանությունները հնարավորինս երկար կմնան Հայաստանում, որպեսզի այդ գաղափարները հայաստանյան հանրության մոտ վերջնականապես սպանեն, համակերպվեն նրա հետ, որ պարտվել են, իսկ մեր հանրությունը դիմադրում է և չի ուզում համակերպվել։

«Ալիևին օդ ու ջրի պես անհրաժեշտ է, որ ներկա իշխանությունները մնան, որովհետև փաստացի կատարվում են Ալիևի բոլոր պահանջները և դրանք հայկական կողմը կատարում է պունկտուալ ու հետևողականորեն»։

Էլիբեգովան հավելեց, որ Ադրբեջանում ռեպրեսիա մեկ տարի հետո կլինի, երբ սոցիալական խնդիրները մնան չլուծված և մարդիկ հասկանան, որ այն հողերը, որոնք Ադրբեջանը ժամանակավորապես օկուպացրեց՝ ադրբեջանցիների գրպանից է գնալու։

«Հիմա, քանի որ Ադրբեջանը չունի մեծ քանակությամբ գումարներ՝ ներդնելու համար, փորձում է դրսից մասնավոր կամ պետական ներդրումներ բերել, բայց ամեն ինչի համար Ալիևը պետք է տա երաշխիքներ, իսկ ռազմական գոտում տալ երաշխիքներ ներդրողներին, բավականին բարձր են լինելու»,- ասաց Էլիբեգովան։

Ադրբեջանագետը նշեց, որ անգամ արդեն պատրաստի ենթակառուցվածքներ ու բերրի հողեր ստանալով, Ադրբեջանը չի կարողանալու դրանք մոտ ժամանակում օգտագործել։ Նայելով տարբեր շրջանների զարգացման ծրագրերին, Էլիբեգովան նկատել է, որ Հադրութի մասին գրեթե խոսք չի գնում, բավականին զգուշավոր են վերաբերվում, հասկանում են, որ դա իրենց տարածքը չէ ու դա խնդրահարույց է ու այդտեղ ներդրում անելը կարող է իրեն չարդարացնել։

«Բացի այդ, երբ որ դու ստանում ես ենթակառուցվածք, որը մեծամասամբ պատերամի ընթացքում վնասվել է, պետք է վերակառուցվի, պետք է կարողանալ դա ինտեգրել տնտեսական համակարգի մեջ։ Հետ վերցրեցին Աղդամը, որը զրոյից պետք է կառուցել, որպեսզի վերաբնակեցնեն, իսկ դա ենթադրում է, որ սկսած հեռախոսակապից, ջրից, էլեկտրաէներգիայից՝ ստեղծել ամենը, ինչի գումարն այսօր Ադրբեջանը չունի»։

Իրենք հողը նվեր ստացան, բայց գումար չունեն, որպեսզի այդ հողը արագ կարողանան վերականգնել։

«Կա երկու տարբերակ՝ կամ Ադրբեջանը կիսատ-պռատ կառուցելու է ինչ-որ ժամանակավոր ավաններ՝ գյուղեր, որտեղ ստիպողաբար բերելու է լցնի մարդկանց, որոնք ինչ-որ ժամանակ հետո այդտեղից կգնան, որովհետև շուրջը ոչինչ չկա, կամ դա երկարաժամկետ կլինի՝ տասը տարի հետո կկարողանա վերաբնակեցնի, ինչը էլի հարց է։ Բաքվի՝ ինչ որ չափ ինտեգրված կյանքից հետո վերադառնալ ինչ-որ անհասկանալի տեղ՝ ռազմական գոտում վտանգի մեջ ապրելով, չեմ կարծում, որ շատերը դա կուզեն։

Հիմա նրանց Ադրբեջանում սկսում են սպառնալ»։

Էլիբեգովան եզրափակեց՝ խնդիրը հետևյալն է՝ նրանք, ովքեր կհրաժարվեն վերադառնալ, բոլոր արտոնություններից կզրկվեն։

Աղբյուր` Փաստինֆո