Փաստ ինֆո

«Եթե հաշվի առնենք այս իշխանությունների բնույթը և նրանց ձգտումը՝ ամեն գնով պահելու իշխանությունը, ապա անկեղծ վերլուծության արդյունքում պետք է փաստենք, որ տրամաբանական է՝ նրանք չէին ցանական գնալ ընտրությունների: Ասեմ ավելին՝ եթե նրանց հնարավորություն ընձեռվեր, ուրախությամբ կչեղարկեին նաև 2023 թվականին նախատեսված հերթական ընտրությունները: Պատճառը պարզ է՝ այս իշխանությունը չափազանց վախենում է կորցնել աթոռը, որովհետև հստակ գիտակցում է, որ դրան անմիջապես հաջորդելու է քրեաիրավական ոլորտում պատասխանատվության ենթարկվելու իրողությունը, - «Փաստինֆո»-ի հետ զրույցում ասել է «Պոլիտէկոնոմիա» հետազոտական ինստիտուտի քաղաքագետ Բենիամին Մաթևոսյանը՝ վերլուծելով արտահերթ ընտրություններից հրաժարվելու վերաբերյալ «Իմ քայլի» հայտարարությունը։ 

Ըստ նրա՝ ակնհայտ իրողություն է, որ դեկտեմբեր ամսից ի վեր չկա փողոցային ակտիվ պայքար, չկա նաև իշխանության նկատմամբ կուլիսային ճնշում, հետևաբար, տրամաբանական է, իշխանությունը չի ցանկանա դուրս գալ կոմֆորտի այն զոնայից, որում գտնվում է: Իրավիճակին նպաստեց այն հանգամանքը, որ հավաքական ընդդիմությանը չհաջողվեց հստակ օրակարգ ձևավորել, որի շուրջ կմիավորեր փողոցային պայքարի դուրս ելած և իշխանություններից դժգոհող զանգվածներին: Անկեղծ լինենք և ասենք, որ ընդդիմությունը չկարողացավ փողոց դուրս եկած զանգվածներին արդյունավետ կերպով ցույց տալ երկրում առկա ճգնաժամից դուրս գալու ուղիները, նրան չհաջողվեց պոզիտիվ օրակարգ ձևավորել, ինչի արդյունքում փողոցային պայքարը փակուղի մտավ: Ի վերջո, միայն «Նիկոլ դավաճան» կարգախոսով լուրջ արդյունքներ չես գրանցի: Մյուս հանգամանքը, որով պայմանավորված, իշխանությունները ամեն կերպ կխուսափեն ընտրություններից, ՀՀ երկրորդ նախագահ Ռոբերտ Քոչարյանի՝ մեծ քաղաքականություն վերադառնալու վերաբերյալ հայտարարությունն էր: Նրանք հասկացան, որ գնալով արտահերթ ընտրությունների, կձևավորեն երկու բևեռների պայքար, որտեղ իրենց վերարտադրվելու շանսերը կարող են նվազագույնի հասնել: Հետևաբար, քանի դեռ չկա իշխանությանը հեռացնելու պահանջով փողոցային ակտիվ պայքար կամ կուլիսային ճնշում, Նիկոլ Փաշինյանը շատ հանգիստ է և կարծում է, որ կարող է ղեկավարել մինչև 2023 թվականը»,- ասում է Բենիամին Մաթևոսյանը:

Վերջինս նկատում է՝ եթե խնդրին նայենք արտաքին հարաբերությունների տեսանկյունից, ապա ակնհայտ է, որ Ռուսաստանը նույնպես այս պահին Հայաստանում նոր ընտրություններ չէր ցանկանա, գոնե մինչև Պետդումայում նախատեսված առաջիկա ընտրությունների ավարտը, հայաստանյան արտահերթ ընտրություններ նրան պետք չէ: Հարցով խիստ շահագրգիռ միակ կողմը, ըստ քաղաքագետի, թերևս պրոթուրքական ուժերն են, ովքեր կցանկանային արտահերթ ընտրություններ տեսնել Հայաստանում: Վերջիններն, իհարկե, կցանկանային Հայաստանում վերահաստատել օրվա իշխանությունների դիրքերը, որպեսզի կարողանան հաջողությամբ ավարտին հասցնել իրենց սկսած, սակայն դեռևս կիսատ թողած պլանները:

Խոսելով գարնանը սպասվելիք փողոցային ակտիվ պայքարի և քաղաքական վերադասավորումների մասին՝ Բենիամին Մաթևոսյանը նկատում է՝ եթե քննարկում ենք օրվա իշխանությանը հեռացնելու և նոր կառավարություն կազմելու տեսլականը, ապա միաօբյեկտիվ մեկնաբանությամբ պետք է փաստենք, որ դա պետք է տեղի ունենար դեռևս նոյեմբերի 10-ին: Միաժամանակ, քաղաքագետն առաջարկում է շրջանցել հեղափոխությունների վերաբերյալ խիստ հայկական բնորոշումներն ու մոտեցումները՝ թեժ գարուն, անսպասելի աշուն և այլն.

«Իրատես լինենք և ասենք, որ անցյալ տարվա նոյեմբերի 11-ին Հայաստանում այլևս նոր կառավարություն պետք է լիներ, բայց չեղավ:

Ակնհայտ է, որ հասարակության ներսում իշխանությունների նկատմամբ ահռելի դժգոհություն և պարպված զայրույթ կա: Մենք բոլորս էլ ապրում ենք Հայաստանում և առերեսվում ենք իշխանությունների վարած ապաշնորհ քաղաքականության հետ: Մարդիկ շատ լավ են գիտակցում, թե ինչ ստարտային պայմաններով Նիկոլ Փաշինյանը վերցրեց իշխանության ղեկը և ինչի վերածեց նա երկիրը՝ իր կառավարման ընդամենը 2.5 տարիների ընթացքում: Այսպիսով, ընդամենը 2.5 տարի առաջ կար Կարեն Կարապետյանի գրանցած տնտեսական վերելքի իներցիան, որ, եթե չեմ սխալվում, 7.7 տոկոս տնտեսական աճ էր գրանցել, չկար հասարակության ներսում առկա այս բևեռացումն ու ատելության մթնոլորտը, կար Արցախը, չկար կորոնավիրուս, տնտեսությունը քայքայված չէր:

Հետևաբար, տեսնելով և վերլուծելով այս ամենը, բնական է, որ հասարակության ճնշող մեծամասնությունը պետք է պահանջի օրվա իշխանության հեռացումը, սակայն քննարկել՝ կլինի դա գարնա՞նը, թե՞ աշնանը, կարծում եմ սխալ է: Դա կլինի այն ժամանակ, երբ ընդդիմությունը պոզիտիվ և արդյունավետ օրակարգ կձևավորի, որի շուրջ կկարողանա հաջողությամբ համախմբել հասարակության լայն զանգվածներին, որի ճնշման արդյունքում էլ իշխանություններին այլ ճանապարհ չի մնա, քան հեռանալը: Նորից եմ կրկնում, օրվա իշխանությունը հստակ գիտակցում է՝ գնալով ընտրությունների ճանապարհով, կլինի դա արտահերթ, թե հերթական, նա խայտառակ պարտություն է կրելու»,- ընդգծում է քաղաքագետ Բենիամին Մաթևոսյանը:

Հեղինակ՝ Նվարդ Մանվելյան

Աղբյուր` Փաստինֆո