Փաստ ինֆո

ՀՀ երկրորդ նախագահ Ռոբերտ Քոչարյանի և մյուսների գործով որպես վկա դատակոչված ՀՀ ոստիկանության զորքերի նախկին ծառայող Բաբկեն Մկրտչյանը, որը մարտի 1-ի իրադարձությունների ժամանակ ստացել է ծանր մարմնական վնասվածքներ, պահանջում է իրեն տուժող ճանաչել։

«Փաստինֆո»-ի հաղորդմամբ՝ Երևանի ընդհանուր իրավասության դատարանում՝ դատավոր Աննա Դանիբեկյանի նախագահությամբ, քննարկվում է Բաբկեն Մկրտչյանին որպես տուժող ներգրավելու մասին միջնորդությունը։ Մկրտչյանի ներկայացուցիչ, փաստաբան Զորայր Հարությունյանը պարզաբանեց, որ, թեև Մկրտչյանը սույն գործով դատակոչված է վկայի կարգավիճակով, բայց ՀՔԾ-ում դեռևս նախաքննության փուլում գտնվող «Մարտի 1»-ի մայր գործով ունի տուժողի կարգավիճակ։ Դեռևս 2019թ ապրիլի 9-ին Մկրտչյանը դիմում է ներկայացրել ՀՔԾ ՀԿԳ քննիչ Մուշեղյանին՝ խնդրելով հաստատել տուժողի իր կարգավիճակը և տրամադրել քրեական գործի նյութերի պատճենները՝ հաշվի առնելով, որ արդեն հայտարարված էր քրեական գործի նախաքննության ավարտ և գործի նյութերին ծանոթանալու համար ժամկետ էր սահմանված։ Մինչդեռ, փաստաբանի դիտարկմամբ, ներկայացված դիմումի կապակցությամբ նախաքննական մարմնի կողմից դրսևորվել է անգործություն, ինչի կապակցությամբ դատավարական հսկողություն իրականացնող դատախազին հասցեագրված բողոքին ի պատասխան ստացվել է գործի նյութերը և մեղադրական եզրակացությունը։

Հարությունյանը հատկանշական համարեց, որ դատախազն արձանագրել է, որ մայր գործով Մկրտչյանն ունի տուժողի կարգավիճակ, իսկ անջատված մասով՝ վկայի, սակայն մայր գործով տուժողի դատավարական կարգավիճակ ունենալով պայմանավորված՝ անջատված գործի շրջանակներում Մկրտչյանն օգտվում է տուժողի դատավարական կարգավիճակից բխող դատավարական իրավունքներից։ Զորայր Հարությունյանի խոսքով՝ Բաբկեն Մկրտչյանին՝ տուժողի դատավարական կարգավիճակից զրկելը չի կարող դիտարկվել այլ կերպ, քան՝ անընդունելի՝ նկատի ունենալով այն հանգամանքը, որ Բաբկեն Մկրտչյանը մարտի 1-ի իրադարձություններից տուժած անձ լինելուց բացի, առավել շատ առողջական վնաս ստացած և ողջ մնացած ՀՀ ոստիկանության զորքերի ծառայող է, որը հիշյալ իրադարձությունների ընթացքում ստացված վնասվածքների հետևանքով ճանաչվել է երրորդ կարգի հաշմանդամ։

Փաստաբանի խոսքով՝ անհասկանալի, պատճառաբանությունից զուրկ և անընդունելի տարբերակումը մայր գործով տուժողների հանդեպ կարող է խաթարել սույն գործով արդարադատության իրականացումը և կարող է հանգեցնել անձանց իրավունքների խախտումը։

Հիշեցնենք՝ սույն գործով մեղադրյալի կարգավիճակում են ՀՀ երկրորդ նախագահ Ռոբերտ Քոչարյանը, ՀՀ ԶՈՒ նախկին գլխավոր շտաբի պետ, ՀԱՊԿ նախկին գլխավոր քարտուղար Յուրի Խաչատուրովը, ՀՀ պաշտպանության նախկին նախարար Սեյրան Օհանյանը և ՀՀ նախկին փոխվարչապետ Արմեն Գևորգյանը։

Յուրի Խաչատուրովը և Սեյրան Օհանյանը մեղադրվում են սահմանադրական կարգը տապալելու համար, Ռոբերտ Քոչարյանը՝ ՀՀ սահմանադրական կարգը տապալելու և առանձնապես խոշոր չափերով կաշառք ստանալու, իսկ Արմեն Գևորգյանը՝ ՀՀ սահմանադրական կարգը տապալելուն օժանդակելու, առանձնապես խոշոր չափերով կաշառք ստանալու և հանցավոր ճանապարհով ստացված գույքն օրինականացնելու համար։

Հեղինակ՝ Իզաբել Սահակյան

Աղբյուր` Փաստինֆո