Փաստ ինֆո

Նիկոլ Փաշինյանը հաշվարկել էր, որ կարող է վերարտադրել իշխանությունը և դրանով վերականգնել իր կորսված լեգիտիմությունը, սակայն եկել է այն եզրակացությանը, որ դա հնարավոր չէ ու արտահերթ ընտրություններից հրաժարվելով որոշ ժամանակ ևս կերկարաձգի իշխանության մնալը: «Փաստինֆո»-ի հետ զրույցում նման տեսակետ է հայտնել քաղաքագետ Ստեփան Դանիելյանը:

Հիշեցնենք, որ երեկ Նիկոլ Փաշինյանի հետ հանդիպումից հետո «Իմ քայլը» խմբակցությունը հայտարարություն տարածեց՝ տեղեկացնելով, որ հրաժարվում է արտահերթ ընտրությունների գաղափարից:

«Հանդիպման արդյունքում արձանագրվել է, որ արտահերթ խորհրդարանական ընտրություններ անցկացնելու մասին վարչապետի առաջարկը դրական արձագանք չի ստացել խորհրդարանական ընդդիմության կողմից, հասարակության լայն շերտերի շրջանում չկա արտահերթ ընտրությունների պահանջ»,-ասվում է խմբակցության հայտարարության մեջ:

Քաղաքագետ Ստեփան Դանիելյանը նկատում է, որ այս որոշման հիմքում մեկ անձի փրկության խնդիր է.

«Նորություն չէ, որ իշխանությունը անձնավորված է, մնացածները նրա կցորդներն են ու որոշումները մեկ անձ է ներկայացնում: Այդ մեկ անձը ետդարձի ճանապարհ չունի: Գուցե հաշվարկել էր, որ կարող է վերարտադրել իշխանությունը և դրանով վերականգնել իր կորսված լեգիտիմությունը, սակայն եկել է այն եզրակացությանը, որ դա հնարավոր չէ ու արտահերթ ընտրություններից հրաժարվելով որոշ ժամանակ ևս կերկարաձգի իշխանության մնալը, ինչը նույն է, որ այդ մեկ անձն այդ ընթացքում կմնա ազատության մեջ: Այստեղ քաղաքականություն կամ երկրի շահ պետք չէ փնտրել, դա ընդամենը մեկ անձի փրկության խնդիր է»,-ասաց քաղաքագետը:

Հարցին՝ իշխանության այս դիրքորոշումը արդյո՞ք պայմանավորված է Ռոբերտ Քոչարյանի՝ արտահերթ ընտրություններին մասնակցելու մասին հայտարարության հետ, Ստեփան Դանիելյանն արձագանքեց.

«Կարծում եմ, որ ի դեմս Ռոբերտ Քոչարյանի իշխանությունը տեսավ ընդդիմությունը կոնսոլիդացնելու ունակ անձ, ով վճռական է տրամադրված, նաև ով կարող է վերահսկել ուժային կառույցներին ու ունի Ռուսաստանի աջակցությունը, որի դերը տարածաշրջանում մեծացել է:Սա է ընտրություններից հրաժարվելու հիմնական պատճառը»,-ընդգծեց քաղաքագետը:

Քաղաքագետը նաև նկատում է անվտանգային առկա պայմաններում գործող իշխանության պաշտոնավարման դեպքում վտանգները մեծ են` « Անորոշության ուժգնացում, համընդհանուր դեպրեսիա, տնտեսության շարունակական գահավիժում, տարածքային նոր կորուստներ, հնարավոր է, որ իմ երևակայությունը չի բավականացնում ավելի վատ սցենարների համար, ինչը հնարավոր է»:

Աղբյուր` Փաստինֆո