Փաստ ինֆո

Արդեն տևական ժամանակ է, մենք հետևում ենք Աբովյան քաղաքի թիվ 1 ավագ դպրոցում կատարվող գործընթացներին։ Նախորդ իշխանությունների ժամանակ նման դեպքում կոկորդ պատռող ներկա՝ իրեն թավշյա հորջորջող իշխանության բավական կոպիտ միջամտության հետևանքով դպրոցում խաթարվել է դասապրոցեսը, աշակերտները դասադուլ են անում, իսկ ուսուցիչները՝ գործադուլ․․․

Տեսեք, ունենք նախկին տնօրեն, որն այդ նույն դպրոցում շուրջ 17 տարի մանկավարժական գործունեություն է իրականացնում՝ դասավանդելով պատմություն , կրթելով և դաստիարակելով հայրենանվեր սերունդ, որոնք հերոսության օրինակներ են տալիս հանուն հայրենիքի պայքարում։ Նույն կողմում ունենք ուսուցչական համակազմ և աշակերտներ, որոնք բողոքի ալիք են բարձրացրել, քանի որ գտնում են, թե նախարարությունը և մարզպետարանը հանիրավի իրենց զրկում են համընդհանուր սեր և հարգանք վայելող տնօրենից, ով լավ մասնագետ է, նախաձեռնող, նվիրված և որպես տնօրեն իր պաշտոնավարած հինգ տարիների ընթացքում դպրոցը շահեկանորեն աչքի է ընկել մարզում և հանրապետությունում։

Հարց է առաջանում՝ եթե ամեն բան այսքան լավ է, ապա ինչու՞ են այսօրինակ տհաճ գործընթացներ տեղի ունենում դպրոցի սիրված տնօրենի շուրջ։

Ահա այստեղ է, որ առանց որևէ մանրամասնության մեջ խորանալու կարելի է ուղղակի այս ամենի թիվ 1 պատասխանատուն և թիվ 1 մեղավորը համարել նույն անձին՝ նրան, ով այսօր զբաղեցնում է ՀՀ վարչապետի աթոռը։ Ինչու՞ կհարցնեք, չէ՞ որ կան ոլորտը համակարգող կոնկրետ պաշտոնյաներ։

Բանն այն է, որ դպրոցում բոլորի հարգանքը վայելող տնօրենը նախկին է դարձել՝ ըստ ներկա իշխանության թիվ 1 պաշտոնյայի՝ հասարակությունը սևերի և սպիտակների, հների և նորերի բաժանման պատճառով։ Այս տրամաբանությամբ՝ նախկինների ժամանակ ընտրված տնօրենը «հին է» համարվել և նրան նորով փոխարինելու խնդիր է դրվել։ Ի դեպ, նորն էլ հայերենի մասնագետ է և տարիքային տարբերություն նրանց միջև գրեթե չկա։ Բայց խնդիրը բնավ էլ լավ կամ վատ մասնագետ, ավելի երիտասարդ լինել-չլինելը չէ։

Խնդիրը բոլորովին այլ է։ Եվ խնդրի պոչը բռնելով մենք պիտի հայտնաբերենք, որ դպրոցի տնօրենից գոհ պիտի լինեն ո՛չ թե աշակերտները, ո՛չ թե մանկավարժական համակազմը, որի հետ վերջինս աշխատում է, այլ՝ ԿԳՄՍ-ն, այլ՝ մարզպետն ու բանից պարզվում է՝ նախկին մարզպետը, մարզպետարանի համապատասխան բաժինը, ի վերջո, գուցե նաև՝ քպական ողջ վերնախավը և անձամբ՝ քպականների լիդերը։ Այսինքն, մի դպրոցի տնօրեն պիտի կարողանա բավարարել այս ողջ կոհորտայի պահանջնե՞րը։

Իսկ մենք՝ այս պատմության մեջ արդարության համար մտահոգներս՝ միամտաբար մտածում էինք, թե՝ ԿԳՄՍ հիմնական մոտիվացիան պիտի լիներ կրթական գործընթացի հավուր պատշաճի ապահովումը, աշակերտների համար առնվազն կրթագիտական միջավայրի ապահովումը, այլ ոչ թե՝ դպրոցը ոստիկանական ուժերով լցնելը և աշակերտներին նրանց ծնողներին և դպրոցի ուսուցչական կազմին ուժ ցուցադրելը։

Ցավալի է, որ ԿԳՄՍ-ն չի հասկանում, որ հավասար միավորների դեպքում, նախընտրելի պիտի լինի այն թեկնածուն, որն արդեն տվյալ կոլեկտիվում աշխատել է, նրանից գոհ են եղել, ի վերջո, իրենց կադրն է․․․

Հիմա, բնավ չցանկանալով բացասական լույսի ներքո ներկայացնել նոր տնօրենին, որին Աբովյանի իր դասավանդած դպրոցում դրական են ներկայացնում, այնուհանդերձ, պիտի ասենք, որ թիվ 1 դպրոցում նա ոստիկանությամբ է այսօր դպրոց մտնում և փակվում իր կաբինետում։ Ծնողների խոսքով էլ՝ իրենց չի ընդունում, երբ ցանկանում են ստեղծված իրավիճակի վերաբերյալ հարցեր ուղղել իրեն։

Ակնհայտ է, որ այս օրերին իշխանությունը կրթօջախներում ծրագրային փոխատեղություններ է կատարում, ինչն, ըստ ամենայնի, չի բխում աշակերտների, գիտելիքի և կրթության շահերից:

Օրեցօր նվազող հանրային վստահության լուրջ խնդիր ունեցող պարտված իշխանությունը պատերազմի ժամանակ զինվորի համար մի խրամատի հարց չէր կարողանում լուծել, իսկ հիմա բոլոր կողմերից է ուզում ամրացնել իր դիրքերը։

Ի դեպ, արդեն իսկ այս դպրոցի շուրջ ստեղծված իրավիճակին իր պաշտոնական կայքում անդրադարձել է ՀՀ ՄԻՊ-ը։ «Դիտարկման արդյունքները վկայում են, որ խոսքը վերաբերում է տնօրենի ոչ իրավաչափ կամ ոչ արդարացի սկզբունքով ընտրվելու մասին պնդումներին: Դրանից բացի, ստացվել է այնպես, որ դպրոցում խաթարված է դասերի բնականոն ընթացքը: Ավելին, դիտարկվել է նաև ոստիկանների ուղեկցությամբ տնօրենի դպրոց գալու դեպքերը: Հաշվի առնելով փաստական իրավիճակը, Մարդու իրավունքների պաշտպանի որոշմամբ նախաձեռնվել է վարույթ և պարզաբանումներ են պահանջվել ԿԳՄՍ նախարարությունից և ոստիկանությունից»։

Ահա այսպիսի արձանագրում:

Աղբյուր` Փաստինֆո