Փաստ ինֆո

Իշխող թիմում ես չեմ տեսնում արտահերթ ընտրությունների գնալու տրամադրություն և անկեղծ ասած այսպիսի տրամադրություններ չկան նաև ընդդիմադիր բևեռի մոտ, ովքեր փողոցում փորձում էին իրավիճակը վերահսկել և փողոցում ընկած իշխանությունը չկարողացան վերցնել: Այս մասին «Փաստինֆո»-ի հետ զրույցում ասել է ԱԺ անկախ պատգամավոր Թագուհի Թովմասյանը՝ արձանագրելով, որ մենք ունենք անկարող ընդդիմություն և անկարող իշխանություն:

Հիշեցնենք, որ երեկ Նիկոլ Փաշինյանի հետ հանդիպումից հետո «Իմ քայլը» խմբակցությունը հայտարարեց, որ հրաժարվում է արտահերթ ընտրությունների գաղափարից:

«Հանդիպման արդյունքում արձանագրվել է, որ արտահերթ խորհրդարանական ընտրություններ անցկացնելու մասին վարչապետի առաջարկը դրական արձագանք չի ստացել խորհրդարանական ընդդիմության կողմից, հասարակության լայն շերտերի շրջանում չկա արտահերթ ընտրությունների պահանջ»,-ասվում է խմբակցության հայտարարության մեջ:

Թագուհի Թովմասյանը, հակադարձելով «Իմ քայլին», նշեց, որ մարդիկ այլևս չեն վստահում գործող իշխանությանը և արտահերթ ընտրությունների պահանջարկ կա.

«Հասարակության ներկայացուցիչների հետ ես ամենօրյա շփումների մեջ եմ, ես անընդհատ լինում իմ մարզում, շփվում եմ քաղաքացիների հետ, մայրաքաղաքում եմ շփվում մարդկանց հետ և պնդում եմ, որ մարդկանց մոտ կա համոզմունք, որ պետք է լինեն արտահերթ խորհրդարանական ընտրություններ, որովհետև մարդիկ այլևս չեն վստահում գործող իշխանությանը և այն վստահության ռեսուրսը, որ նրանք ունեին վախուց սպառել են»,-ասաց Թագուհի Թովմասյանը:

Վերջինս ընդգծեց, որ պետք է չմոռանանք մի շատ կարևոր իրողություն՝ անկախ իրավիճակից և պատճառներից, մենք ունեցել ենք պարտություն և պարտված իշխանությունը պետք է հեռանա, իսկ եթե ուզում են նորից վերադառնալ իշխանության, ապա պետք է գնան, լրացուցիչ քննություն հանձնեն, եթե այդ քննությունը կստանան՝ դրական արդյունքով, նոր կգան իշխանության, եթե չի ստանա, ուրեմն պետք է պարտության խարանը ամբողջ կյանքում կրի.

«Լսում ենք տարբեր հրապարակումներ, թե ինչքան սխալ է վարվել պատերազմի ողջ գործընթացը: Այսինքն` այս մարդիկ ուզում են իրենց սխալների համար պատասխան չտա ՞լ, չի կարող նման բան լինել, և դրա լավագույն լուծումը սահմանադրական ճանապարհն է նոր ընտրությունների»,-ասաց Թագուհի Թովմասյանը:

Պատգամավորը նկատում է, որ արտահերթ ընտրությունների անցկացում հրաժարվելով՝ իշխանությունը իրավիճակը մտցնում է փակուղի և, ըստ էության, դրդում հակասահամանդրական գործողությունների.

«Եթե փակում ես սահմանադրական եղանակով իշխանություն ձևավորելու ճանապարհը, մնում է արդեն հակասահմանադրական ճանապարհը, արդեն դու պետք է հետևություն անես՝ գնում ես դրան, թե՝ ոչ: Պետք է նաև պատասխանատու լինես քո քայլերի համար, եթե ասում ես, ընտրություն չեմ անում, բա ի ՞նչ ես անում, ուզում ես շարունակե ՞լ, ո՛չ, դու չես կարող որպես իշխանություն չես կարող շարունակել քո գործունեությունը, որովհետև դու մեզ տարել ես պարտության և պետք է հեռանաս»,-ասաց Թագուհի Թովմասյանը:

Պատգամավորը կարծում է, որ իշխանության մտավախությունը իշխանության կորուստն է.

«Երևի իրենք տարբեր չափման գործիքներով չափել են և հասկացել են, որ իրենք այլևս չեն կարող ունենալ իշխանություն, դրա համար չեն ցանկանում այսօր ունեցած իշխանությունը կորցնել, բայց ես կարծում եմ այսօր իշխանություն պահողները և կյանքի գնով իշխանության ձգտողները հավասարապես պատասխանատու են մեր երկրի այսօրվա իրավիճակի համար»,-ասաց պատգամավորը:

Զրուցակիցը արձանագրում է՝ պատերազմից անցել է երեք ամիս, բայց մենք չունենք որևէ դրական տեղաշարժ երկրի ցանկացած ոլորտում

«Մեր բանակը փաստացի չկա, ջախջախված վիճակում է , անվտանգությունը խարխլված վիճակում է , տնտեսություն ողբալի վիճակում է ժողովրդագրական վիճակը գնում է անկման, իսկ այս ընթացքում մենք քննարկում ենք՝ արտահերթ ընտրություն անում ենք, չենք անում, իշխանություն տալիս ենք չենք տալիս: Մենք երկիր ենք կորցնում, սրա մասին պետք է մտածի թե՛ ընդդիմությունը, թե՛ իշխանությունը , որովհետև ընդդիմություն էլ ցուցաբերեց անկարողություն, երբ փողոցում ընկած իշխանությունը չկարողացավ վերցնել»,-մեզ հետ զրույցում ասաց Թագուհի Թովմասյանը:

Պատգամավորը նկատում է՝ եթե իշխանությունը շարունակում է պաշտոնավարել ունենում ենք այսօրվա վիճակը՝ արտաքին պարտքի ավելացում, անվտանգության չգոյություն, բանակի՝ սիրողական մակարդակի գոյություն, և տնտեսական անկումներ:

«Մեր աչքի առաջ ունենք հետևյալ իրողությունը՝ պատերազմը սկսվեց, որին նախորդեցին Ադրբեջանում մեծ զորավարժություններ և զորավարժությունների անվան տակ մեծ տեխնիկա կուտակվեց առաջնագծում, հիմա էլ գիտենք , որ Կարսում ընթանում են թուրք-ադրբեջանական զորավարժություններ և չգիտենք այդ զորավարժություններին ինչ են հետևելու»,-ասաց Թովմասյան:

Պատգամավորը ընտրություններն այս պահին անցկացնելու դեպքում ապակայունացման վտանգ է տեսնում.

«Բայց դա Հայաստանի ուժային կառույցները գոնե մի անգամ ցույց տան իրենց անվանը վայել կեցվածք, ուժային գործողություններով զսպեն ցանկացած ապակայունացնող իրավիճակ և ապահովեն արդար և թափանցիկ ընտրություններ»,-մեզ հետ զրույցում ասաց Թագուհի Թովմասյանը:

Աղբյուր` Փաստինֆո