Փաստ ինֆո

Արտահերթ ընտրությունների անցկացման հանրային պահանջի ձևակերպման մեխանիզմներից ամենաառաջնայինը ընդդիմության և ընդհանրապես քաղաքական ուժերի կողմից ներկայացվելու տեսքով է, իսկ խորհրդարանական ընդդիմությունը և արտախորհրդարանական ընդդիմության մեծամասնությունը արտահերթ ընտրությունների անցկացման պահանջ չի ձևակերպել: Այս մասին ԱԺ-ում ճեպազրույցի ժամանակ ասաց «Իմ քայլը» խմբակցության ղեկավար Լիլիթ Մակունցը:

Պատգամավորը նշեց, որ արտահերթ ընտրությունների անցկացման համար անհրաժեշտ գործողությունները քննարկելու առաջարկը ներկայացվել է ընդդիմությանը, սակայն դրական արձագանք չի ստացել.

«Մենք արդեն նշել ենք, որ ընդդիմության կողմից իշխանափոխության պահանջը մեզ համար հնարավոր է իրականցնել բացառապես ընտրությունների միջոցով, դրանով է պայմանավորված, որ մենք ասել ենք՝ եկեք քննարկենք արտահերթ ընտրություններ անցկացնելու տարբերակը և չենք առարկել: Մենք շարունակելու ենք ճանապարհային քարտեզի իրագործման աշխատանքները և այն ամփոփելիս նոր կանդրադառնանք արտահերթ ընտրությունների անհրաժեշտությանը»,-ասաց Մակունցը:

Հարցին՝ հանրության շրջանում արտահերթ ընտրությունների պահանջարկն ինչպես են չափում, Մակունցն արձագանքեց.
«Այդ պահանջը ներկայացնողն է նաև ընդդիմությունը, այդ պահանջը նաև քաղաքացիների հետ առնչվելով է սահմանվում: Եթե ընդդիմությունը չի տեսնում հանրային պահանջ, որպեսզի հիմա գա և քննարկում ունենա արտահերթ ընտրությունների անցկացման շուրջ, դա նշանակում է, որ նրանք այդ ազդակը չեն ստանում: Մեր շփումները քաղաքացիների հետ չեն հաղորդում արտահերթ ընտրությունների անցկացման ազդակներ, դա, իհարկե, չի նշանակում, որ մենք չենք անդրադառնալու արտահերթ ընտրությունների անհրաժեշտությանը ճանապարհային քարտեզը ամփոփելիս»,-ասաց Մակունցը:

Լրագրողի դիտարկմանը՝ թե արտահերթ ընտրություններին մասնակցելու վերաբերյալ Ռոբերտ Քոչարյանի հայտարարությունը որևէ ազդեցություն ունեցել է «Իմ քայլի» որոշման վրա, Մակունցն ասաց.

«Մեր որոշումները որևէ կերպ վախենալու կոնտեքստում չեն կարող լինել, որովհետև հենց մեր կողմից է հնչեցվել արտահերթ ընտրություններ անցկացնելու առաջարկը, եթե կան ուժեր որոնք ընկրկում են արտահերթ ընտրություններին, ապա այդ հարցը իրենց պետք է ուղղել»,-ասաց պատգամավորը:

Լիլիթ Մակունցը նաև ընգծեց, որ եթե ընդդիմությունը մտափոխվի և որոշի կրկին անդրադառնալ արտահերթ ընտրություններին, ապա իրենք կրկին կքննարկեն այդ հարցը։ 

Աղբյուր` Փաստինֆո