Փաստ ինֆո

Իշխանությունների՝ արտահերթ խորհրդարանական ընտրություններ անցկացնելու գաղափարից հրաժարվելը պայմանավորված է ՀՀ երկրորդ նախագահ Ռոբերտ Քոչարյանի վարկանիշի աճով և գործող վարչապետի վարկանիշի էական անկմամբ։ «Փաստինֆո»-ի հետ զրույցում այս մասին ասաց քաղտեխնոլոգ Արմեն Բադալյանը։

Անդրադառնալով «Իմ քայլ»-ի հայտարարությանը՝ քաղտեխնոլոգը նշեց, որ երկու մանիպուլյացիա կա այնտեղ․ «Առաջինն այն է, որ խորհրդարանական ընդդիմությունը դեմ է արտահերթ խորհրդարանական ընտրություններին, մինչդեռ խորհրդարանական ընդդիմությունը կողմ է արտահերթ ընտրություններին, եթե այն չանցկացվի գործող վարչապետի կողմից։ Երկրորդ մանիպուլյացիան էլ այն է, որ հասարակության լայն շրջանակներ չեն ողջունում արտահերթ խորհրդարանական ընտրությունները։ Նրանք սոցիոլոգիական հարցումների արդյունքներ չունեն առ այն, որ որոշեն՝ հասարակության լայն զանգվածը կողմ է արտահերթ խորհրդարանական ընտրություններին, թե՞ դեմ է»,-նշեց քաղտեխնոլոգը։

Արմեն Բադալյանը նկատեց՝ վարչապետն առաջարկեց արտահերթ խորհրդարանական ընտրություններ անցկացնել այն ժամանակ, երբ ՀՀ երկրորդ նախագահը դեռ չէր հայտարարել ընտրություններին մասնակցելու իր մտադրության մասին․ «Քաղաքական մյուս ուժերն ասում էին, որ իրենք չեն մասնակցի, քանի դեռ վարչապետը հրաժարական չի տվել, իսկ վարչապետը չէր պատրաստվում հրաժարական տալ։ Միայն երկրորդ նախագահը հայտարարեց, որ կմասնակցի ընտրություններին։ Այստեղ տեղի ունեցավ մի բան, որը պատմության մեջ օբյեկտիվ հանգամանք է հանդիսանում․ հասարակության մեջ ուժեղացել է անվտանգության երաշխիքների ձգտելու պահանջը, իսկ երկրորդ նախագահն ասոցացվում է անվտանգության երաշխիքների հետ՝ ի տարբերություն գործող վարչապետի։ Պատահական չէ, որ երկրորդ նախագահի վարկանիշը բարձրացել է, թե ինչքան չեմ կարող ասել, բայց փակ հարցումների համաձայն՝ բավականաչափ բարձրացել է։ Դա նշանակում է, որ արտահերթ խորհրդարանական ընտրությունների դեպքում երկրորդ նախագահի կողմից ղեկավարվող քաղաքական ուժերի դաշինքը մեծ հավանականությամբ խորհրդարանում կունենար մեծամասնություն, և երկրորդ նախագահը հնարավոր է՝ դառնար վարչապետ։ Դա ստիպեց գործող վարչապետին հրաժարվել արտահերթ խորհրդարանական ընտրություն անցկացնելու իր ծրագրից»,-նշեց քաղտեխնոլոգը։

Արմեն Բադալյանի խոսքով ոչ միայն երկրորդ նախագահի վարկանիշն է բարձրացել, այլև գործող վարչապետի վարկանիշն է էականորեն նվազել։ Քաղտեխնոլոգի կարծիքով վարչապետը հասկանում է, որ ընտրություններում պարտվելուց հետո բանտարկվելու է և հավանաբար ցմահ ազատազրկման դատապարտվելու։

Ընդ որում քաղտեխնոլոգը կարծում է, որ իշխանությունների՝ արտահերթ ընտրություններ անցկացնելու գաղափարից հրաժարվելը չի նշանակում, որ ընտրություններ չեն լինելու, քանի որ արտահերթ խորհրդարանական ընտրությունների չեղարկումը լինում է այն ժամանակ, երբ քաղաքական ուժերը համակերպվում են այդ գաղափարին, իսկ եթե այդ ուժերը համաձայն չեն, ապա կարող են իշխանություններին ստիպել՝ գնալ արտահերթ ընտրությունների։

Ինչ վերաբերում է այն կարծիքներին, որ գործող վարչապետը վարչական ռեսուրսների միջոցով կկեղծի ընտրությունները, քաղտեխնոլոգը վստահեցնում է՝ վարչական ռեսուրսով ընտրությունները լայնամասշտաբ հնարավոր չէ կեղծել․ «Նման բան հայտարարողներն ընդհանրապես չեն հասկանում ընտրությունների կեղծիքի ողջ փիլիսոփայությունը։ Կեղծելու համար վարչական ռեսուրսը շատ քիչ է, համարյա ոչինչ։ Գործող վարչապետը առավելագույնը 5 տոկոսով կարող էր ընտրությունները կեղծել, որովհետև կեղծիքն իր նրբություններն ունի և վարչական ռեսուրսով չես կարող ամբողջովին ընտրությունները կեղծել ու քաղաքական մեծամասնություն մնալ։ Դա անհնար է»,-ասաց Արմեն Բադալյանը։

Հարցին՝ ի վերջո տեղի կունենա՞ն արտահերթ ընտրություններ, թե ոչ, քաղտեխնոլոգը նշեց, որ դա կախված է նրանից՝ արդյոք երկրորդ նախագահը պատրաստ է իշխանություններին պարտադրել արտահերթ խորհրդարանական ընտրություններին, թե ոչ․ «Եթե պատրաստ է, ուրեմն տեղի կունենան արտահերթ ընտրություններ, եթե պատրաստ չէ, որևիցե բան չի փոխվի։ Հաջորդ քայլը երկրորդ նախագահինն է»,-ասաց Արմեն Բադալյանը։

Աղբյուր` Փաստինֆո