Փաստ ինֆո

Երկրաշարժի հետևանքով վիրավորներ ու տուժածներ չունենք, այս պահին անասնագլխաքանակի կորուստ էլ չունենք, կան մասնակի փլուզումներ։ «Փաստինֆո»-ի հետ զրույցում այս մասին ասաց Գեղարքունիքի մարզի Շողակաթ համայնքի ղեկավար Սուլիկո Շուշանյանը։ 

Համայնքապետը նշեց, որ մարզպետարանի, համայնքապետարանի և ԱԻՆ-ի աշխատակիցներից ստեղծվել է օպերատիվ հանձնաժողով, որն այս պահին աշխատում է և նկարահանումներ է իրականացնում համայնքի տարածքում։

«Մինչ այդ աշխատանքների մեկնարկը՝ մենք արդեն մեկ անգամ պտտվել ենք համայնքում։ Արտաքին տեսքից մեծ, գլոբալ փլուզումներ չկան, բայց միջնապատերը շարժվել են, ճաքեր են առաջացել ու մասնակի փլուզումներ կան։ Բոլոր գյուղերում էլ՝ Դրախտիկում, Շորժայում, հին կառույցներում՝ մասնավորապես  գոմերում,  փլուզումներ կան, բայց որ ասենք ամբողջական, հիմնովին տուն է փլուզվել, այս պահին նման տեղեկություն չկա»,-նշեց Սուլիկո Շուշանյանը։

Հիշեցնենք, որ փետրվարի 5-ին երկու անգամ Հայաստանի տարածքում երկրաշարժ է գրանցվել։ Տեղական ժամանակով ժամը 19:36-ին Գեղարքունիքի մարզի Շորժա գյուղից 5 կմ դեպի հյուսիս-արևելք, օջախի 10 կմ խորությամբ, 4.7 մագնիտուդով երկրաշարժ է գրանցվել: Երկրաշարժը զգացվել է Գեղարքունիքի մարզում 5-6 բալ ուժգնությամբ, Կոտայքի, Տավուշի, Լոռու և Արարատի մարզերի բազմաթիվ բնակավայրերում՝ 4-6 բալ, իսկ Երևան քաղաքում՝ 3-4 բալ ուժգնությամբ:

Փետրվարի 6-ին, ժամը 00:06-ին Գեղարքունիքի մարզի Շորժա գյուղից 5 կմ դեպի հյուսիս-արևելք, օջախի 10 կմ խորությամբ, 3.7 մագնիտուդով երկրաշարժ: Էպիկենտրոնային գոտում ստորգետնյա ցնցման ուժգնությունը կազմել է 5 բալ:

ԱԻՆ-ից հայտնում են, որ ըստ Գեղարքունիքի մարզի Արտանիշ համայնքի ղեկավարից ստացված տեղեկատվության, փլուզվել է չգործող, կիսաքանդ դպրոցի պատը։ Ինչպես նաև, Աղբերք և Շորժա համայնքների ղեկավարներից ստացված տեղեկության համաձայն՝ տվյալ համայնքներում փլուզվել են մեկական հին հողապատ գոմերի միջնապատեր։ Ժամը 23:30-ի դրությամբ ՀՀ տարածքում այլ ավերածությունների, տուժածների վերաբերյալ ահազանգեր չեն գրանցվել։

Աղբյուր` Փաստինֆո