Փաստ ինֆո

ԱՀ ԱԺ նախկին պատգամավոր, ազատամարտիկ Վահան Բադասյանին անձնական երաշխավորությամբ ազատ արձակելու մասին միջնորդություն է ներկայացվել դատախազություն։ Այս մասին «Փաստինֆո»-ի հետ զրույցում ասաց պաշտպան Արայիկ Պապիկյանը։

Բադասյանի համար երաշխավորություն են ներկայացրել ՀՀ ժողովրդական արտիստ Հասմիկ Պապյանը և նկարչուհի, հասարակական գործիչ Զարուհի Մուրադյանը։ ։ Նրա փոխանցմամբ՝ այլ հասարակական-քաղաքական, մշակութային գործիչներ, իրավապաշտպաններ ևս պատրաստակամություն են հայտնել՝ Բադասյանի համար երաշխավորելու, եւ այդ հարցը դեռևս քննարկման փուլում է։

Փաստաբանի փոխանցմամբ՝ Բադասյանի նկատմամբ անձնական երաշխավորություն ընտրելու միջնորդությունը դատախազություն ներկայացվել է փետրվարի 5-ի երեկոյան՝ էլեկտրոնային եղանակով, իսկ այսօր ևս մեկ միջնորդություն ներկայացրել է վարույթ իրականացնող մարմին՝ Բադասյանի նկատմամբ ընտրված խափանման միջոց կալանավորումն անազատության հետ կապ չունեցող որևէ խափանման միջոցով փոխելու մասին։

«Իրավական առումով որոշում կայացնողը դատախազն է, բայց ամեն դեպքում, նորից օգտվելով օրենքով նախատեսված հնարավորությունից, ևս մեկ միջնորդություն ներկայացրի։ Դրանց լուծումը հավանաբար երկուշաբթի օրը կլինի»,- նշեց փաստաբանը՝ հավելելով, որ միջնորդությունը ներկայացվել է նոր ի հայտ եկած հանգամանքների հիման վրա։

Փաստաբանը չմանրամասնեց, թե ինչ նոր ի հայտ եկած հանգամանքների մասին է խոսքը՝ նախաքննական գաղտնիքից ելնելով, սակայն նշեց, որ կատարվել են մի շարք գործողություններ, որոնցով ակնհայտորեն հերքվել են բոլոր այն ենթադրյալ ռիսկերը, որոնք տեսել էին կալանավորման որոշում կայացնելիս։

«Թեև դրանք նախկինում էլ չկային, բայց որոշ քննչական գործողություններ կատարվեցին և վերացվեց գոյություն չունեցող ռիսկերը՝ թաքնվելու կամ ինչ որ բան թաքցնելու առումով»,- նշեց նա՝ հավելելով, որ ինչ-որ բան չեն հորինել, միջնորդությունները ներկայացվել են գործի նյութերի հիման վրա, որոնց տիրապետում են նաև քննիչն ու դատախազը։

Ինչպես ավելի վաղ տեղեկացրել ենք՝ Երևանի ընդհանուր իրավասության դատարանը՝ դատավոր Մանվել Շահվերդյանի նախագահությամբ, հունվարի 29-ին բավարարել է Վահան Բադասյանի նկատմամբ կալանավորումը որպես խափանման միջոց ընտրելու մասին ԱԱԾ քննիչի միջնորդությունը, որի դեմ պաշտպանը վերաքննիչ բողոք է ներկայացրել։

Փաստաբանը մեզ հետ զրույցում նշեց, որ բողոքը չի մակագրվել, որովհետև Վերաքննիչ քրեական դատարանն Առաջին ատյանի դատարանից դեռևս նյութերը չի ստացել։ Պապիկյանի խոսքով՝ ֆորմալ առումով իրենք պատճառներ ունեն, բայց ողջամտությունը հուշում է, որ որոշակիորեն փորձում են ձգձգել։

«Երևի չերեզ Մոսկվա են ուղարկել նյութերը, Մասիվի դատարանից դեռ չի հասել Վերաքննիչ։ Ամեն ինչ անում են, որ ամեն օր վատ իմաստով հիշենք դատարաններին»,- նշեց Պապիկյանը եւ ավելացրել. «Համոզված եմ՝ պարոն Բադասյանի դեպքում միտումնավոր ուշացնում են ուղարկելը, ուշացումով նյութերը կհասնեն դատարան, այդտեղ էլ չգիտենք, թե ում կմակագրվի բողոքը և եթե «բախտներս չբերի», նիստը կնշանակվի 20 օր հետո և մարդը կսպասի՝ մինչև բարեհաճեն դատական նիստ հրավիրել»։

Փաստաբանը տեղեկացրեց, որ այսօր հանդիպել է Բադասյանի հետ, վերջինս բուժզննում է անցել և նշել, որ որևէ գանգատ չունի, սակայն նշանակված դեղամիջոցներից մեկն արդեն վերջացել էր։ Փաստաբանը պարզաբանեց, որ կան նշանակված մի շարք դեղամիջոցներ, որոնք Բադասյանի ընտանիքի կողմից ապահովվում են, սակայն այսօր հնարավոր չի եղել փոխանցե, քանի որ ոչ աշխատանքային օրերին հանձնուք փոխանցելն արգելված է։ ՔԿԾ-ից փաստաբանին խոստացել են, որ ՔԿԾ-ն կապահովի անհրաժեշտ դեղորայքը։

Բացի դա՝ փաստաբանը նաև դիմել է ՄԻՊ-ին, որը որոշում է կայացրել՝ բողոքը քննության առնելու մասին, սակայն դեռևս առկա չէ տեղեկություն առ այն, թե արդյոք ՄԻՊ-ը դիմել է որևէ մարմնի, թե ոչ։

Հիշեցնենք, որ հունվարի 28-ին ԱԱԾ-ն բերման է ենթարկել, ապա՝ ձերբակալել Վահան Բադասյանին՝ Եռաբլուր զինվորական պանթեոնում իր կողմից արված հայտարարությունների համար։ Վերջինս հայտարարել է, որ Նիկոլ Փաշինյանը կործանել է բանակը և նրան պետք է հեռացնեն ոչ միայն որպես պարտության խորհրդանիշ, այլև թշնամի․

«Հեռացնելու տարբեր ճանապարհներ կան ընդհուպ ֆիզիկապես հեռացնելը։ Դա ենթադրում է, որ թշնամուն պետք է վերացնենք, թեկուզ զենքի ուժով։ Այո, ես գիտակցաբար սպառնալիքի կոչեր եմ անում, թող ԱԱԾ-ն ձերբակալի ինձ։ Ցանկացած մեկը պետք է ցանկանա թշնամուն ոչնչացնել։ Դա անհատները պետք է անեն։ Ես ինքս պատրաստ եմ դրան»,-ասել է Վահան Բադասյանը։

Բադասյանի հայտարարությունների հիման վրա հարուցվել է քրեական գործ, որի շրջանակներում նրան մեղադրանք է առաջադրվել ՀՀ քրեական օրենսգրքի 301-րդ հոդվածի հատկանիշներով՝ իշխանությունը զավթելուն, տարածքային ամբողջականությունը խախտելուն կամ սահմանադրական կարգը բռնի տապալելուն ուղղված հրապարակային կոչերի համար։ Բադասյանն առաջադրված մեղադրանքը չի ընդունել։

Հեղինակ՝ Իզաբել Սահակյան

Աղբյուր` Փաստինֆո