Փաստ ինֆո

Ցանկացած երկիր որպես դեսպան պետք է ուղարկենք մեր ունեցած լավագույն կադրին։ «Փաստինֆո»-ի հետ զրույցում ասաց միջազգայնագետ Սուրեն Սարգսյանը՝ անդրադառնալով արտերկրում ՀՀ դեսպանների փոփոխություններին։

Միջազգայնագետը տեղյակ չէ՝ որքանով են իրականությանը համապատասխանում Մեծ Բրիտանիայում «Իմ քայլ»-ական պատգամավոր Անուշ Բեղլոյանի, իսկ Չեխիայում Երևանի քաղաքապետ Հայկ Մարությանի դեսպան նշանակվելու վերաբերյալ լուրերը։ Նրա խոսքով այս պահին գիտենք միայն ԱՄՆ-ում մեր դեսպանի նշանակման մասին, քանի որ հենց ինքն է խոսել այդ մասին․ «Դա, իհարկե, կարող է լինել քաղաքական նշանակում, բայց կարծում եմ՝ անգամ այդ դեպքում չպետք է անձնական ցանկություններով առաջնորդվենք։ Պետք է առաջնորդվենք մասնագիտական հմտություններով, կարողություններով և պրոֆեսիոնալիզմով։ Ցանկալի կլինի, որ ցանկացած երկիր ուղարկենք փորձառու, բանիմաց մասնագետի, դիվանագետի։ Ցանկացած պետություն ունենում է քաղաքական նշանակումներ, բայց դրանք լինում են բալանսավորված և կոնկրետ երկրներ ուղարկվում են լավագույն մասնագետները»,-նշեց միջազգայնագետը՝ ընդգծելով, որ կարևոր երկրներում դեսպանների պաշտոնում պետք է նշանակվեն մարդիկ, որոնք կա՛մ փորձ ունեն, կա՛մ աշխատել են տվյալ երկրում, լուրջ կապեր ու հնարավորություններ ունեն։

Սուրեն Սարգսյանը նկատեց՝ Լիլիթ Մակունցն ինքն է խոստովանել, որ դիվանագիտական աշխատանքի փորձ չունի․ «Չգիտեմ՝ ինչու է Լիլիթ Մակունցը խնդրել, որ իրեն նշանակեն դեսպան՝ իմանալով, որ ո՛չ փորձ ունի, ո՛չ էլ աշխատել է այդ ուղղությամբ։ Որքանով ինձ հայտնի է այդ նախաձեռնությունն իրենն է։ Ընդամենը երկու տարի եղել է հայ-ամերիկյան բարեկամական խմբի նախագահ ԱԺ-ում, այն էլ այդ երկու տարիներն առանձնապես երկկողմ հարաբերություններով և աշխատանքով չեն փայլել»,-նշեց միջազգայնագետը։

Նշենք, որ մամուլում շրջանառվող տեղեկությունների համաձայն՝ «Իմ քայլը» խմբակցության պատգամավոր Անուշ Բեղլոյանին պատրաստվում են նշանակել Մեծ Բրիտանիայում ՀՀ դեսպան, իսկ Երևանի քաղաքապետ Հայկ Մարությանին՝ Չեխիայում ՀՀ դեսպան։ «Փաստինֆո»-ի հետ զրույցում քաղաքապետի մամուլի խոսնակ Հակոբ Կարապետյանն այդ լուրերը բամբասանք էր անվանել՝ նշելով, որ չի պատրաստվում մեկնաբանել դրանք։ Ինչ վերաբերում է Անուշ Բեղլոյանի նշանակմանը, ապա «Փաստինֆո»-ի խորհրդարանական աղբյուրները հաստատել են տեղեկությունը՝ նշելով, որ առաջիկայում հայտնի կլինի Անուշ Բեղլոյանի մանդատը վայր դնելու մասին։

Աղբյուր` Փաստինֆո