Փաստ ինֆո

Բերձորից տեղահանված Հասմիկ Կիրակոսյանի ընտանիքը կանգնած է դրսում մնալու վտանգի առջև։

«Փաստինֆո»-ի հետ զրույցում Հասմիկ Կիրակոսյանն ասաց, որ Երևանում ժամանակավոր մեկ սենյականոց կացարան են տվել, որտեղ ընտանիքի վեց անդամների հետ են բնակվում, սակայն մինչև այս ամսվա վերջ պետք է լքեն այդ կացարանը, իսկ բնակվելու այլ վայր չունեն։

«Եթե իմ տղաները, թոռները պետք է ծառայեն հայրենիքին ու հայրենիքն իրենց ոչ մի բանով տեր չլինի, ապա ու՞մ ենք ծառայում, ո՞ւմ երկիրն է սա»,-նշեց Հասմիկ Կիրակոսյանը։

Բերձորի բնակիչը նշեց, որ 1992թ․-ին Երևանում կորցրել է իր անշարժ գույքը և փոխհատուցում չի ստացել։ Քաշաթաղում ամեն ինչ զրոյից են սկսել, ոտքի են կանգնել, սակայն պատերազմը կրկին խլել է նրանց բնակության վայրը․ «Զրոյից տուն-տեղ էինք դրել։ Ունեմ բոլոր փաստաթղթերը, առաջին իսկ պահանջի դեպքում կներկայացնեմ դրանք։ 2․5 հազ քմ հողատարածք ունեմ այնտեղ, բայց այսօր ոչ մի փոխհատուցում չեն տվել։ Իմ մեղքը ո՞րն է, որ տունը ստեղծել եմ սեփական ուժերով, իսկ հիմա ամեն ինչ կորցնում եմ։ Փոխհատուցումն ո՞վ է տալու»,-ասաց Հասմիկ Կիրակոսյանը։

Վերջինս դիմել է քաղաքապետարան, առաջարկել անշարժ գույքի փաստաթղթերը հանձնել և փոխարենը փոխհատուցում ստանալ, սակայն քաղաքապետարանից պատասխանել են, որ առայժմ բնակարանային ոչ մի ծրագիր չկա․ «Ո՞նց կլինի, պատերազմի ժամանակ առաջին հերթին մարդկանց կացարանի հարցն է լուծվում։ Բոլորը գիտեն, որ կացարանները մեզ ժամանակավոր են տրվում, որից հետո մի տեղից մյուսն ենք գնում»,-նշեց Հասմիկ Կիրակոսյանը։

Մանրամասները՝ տեսանյութում

Աղբյուր` Փաստինֆո