Փաստ ինֆո

Այս խորհրդարանը որևէ կապ չունի ՀՀ-ի առջև այսօր ծառացած մարտահրավերների հետ, այն մի ֆունկցիա պետք է ունենար՝ կազմակերպել արտահերթ խորհրդարանական ընտրություններ։ Այս մասին «Փաստինֆո»-ի եթերում ասել է քաղաքական վերլուծաբան Արմեն Բաղդասարյանը։

Ըստ նրա՝ Փաշինյանի ամենամեծ սխալն այն էր, որ Արցախը համարում էր պատանդ է, որի պատճառով Հայաստանը չի զարգանում։

«Կարծում էր, որ այդ պատանդին սպանեն՝ մեր ձեռքերը կազատվեն և մենք կզարգանանք, և ինքը, ըստ երևույթին, համարում է թե այս ինչ վատ ելք եղավ, որովհետև պատանդը չսպանվեց, վիրավոր է բայց էլի մնում է պատանդ»,- հայտարարել է Ա.Բաղդասարյանը։

Բանախոսի արձանագրմամբ՝ Ալիևն այսօր մեզ ստիպում է, որ Արցախը բանակ չունենա, ու ամեն ինչ գնում է նրան, որ Արցախը մտնի Ադրբեջանի կազմի մեջ։ «Վախենամ դրա դեմը այս իշխանություններով չկարողանանք առնել»,- նշել է վերլուծաբանը։

Խոսելով ներքաղաքական իրավիճակի մասին՝ Արմեն Բաղդասարյանը նշել է, որ Փաշինյանի թիմը շանս չունի, Ռոբերտ Քոչարյանն ամեն օր ավելացնում է իր համախոհների թիվը, իսկ Սերժ Սարգսյանը դեռ խաղի մեջ չէ՝ չնայած նախապատրաստական աշխատանքներ են տարվում։ Նրա դիտարկմամբ՝ լիդերության պայքարն արդեն սկսված է։

Մանրամասները՝ տեսանյութում։

Աղբյուր` Փաստինֆո