Փաստ ինֆո

Ի պատիվ դատական իշխանության՝ կան դատավորներ, որոնք գործում են ոչ թե ինչ- որ անձի քմահաճույքները բավարարելու նպատակով, այլ՝ Սահմանադրությամբ և օրենքներով սահմանված իրենց պարտականությունների, գործառույթների և լիազորությունների շրջանակներում՝ օրենքի ոգուն համապատասխան և համահունչ։ Այս մասին հրավիրված մամուլի ասուլիսին ասաց սահմանադրական իրավունքի մասնագետ Գոհար Մելոյանը՝ պատահական չհամարելով, որ այս պահին է շրջանառության մեջ դրվում մի նախագիծ, որով մինչդատական վարույթի քննության նպատակով դատարաններ ստեղծում։

Սահմանադրագետն արձանագրեց, որ հետպատերազմյան շրջանում մի շարք անձանց նկատմամբ, որոնք հայրենասեր են, նոր են վերադարձել առաջնագծից, տարաբնույթ քրեական հետապնդումներ մեկնարկեցին իշխող ուժի կողմից և ակնհայտ է, որ դրանք այդքան էլ իրավաչափ չէին, կալանքի միջնորդություններ են ներկայացվել՝ նրանց լռեցնելու և մեկուսացնելու նպատակով, սակայն դատական իշխանությունը, բարեբախտաբար, դրսևորեց անկախություն և գործեց օրենքի տառին համահունչ՝ հիմնականում չբավարարելով քաղաքական նպատակ հետապնդող միջնորդությունները։

Բացի դա՝ սահմանադրագետը նկատեց, որ ԲԴԽ երկու իշխանահաճո անդամներ են ընտրվել իշխանությունների կողմից և վերջիններս էլ պետք է ընտրեն այդ դատավորներին։

Ինչ վերաբերում է ՀՔԾ պետի և ԲԴԽ նորանշանակ անդամի բարեկամական կապին, Մելոյանը նշեց, որ ապրում ենք երկակի ստանդարտների կնքահայր իշխանության օրոք, քանի որ իրենց չափ խծբ՝ խնամի, ծանոթ, բարեկամ հարաբերությունները քննադատած ուժ չկա և իրենց չափ խնամի, ծանոթ բարեկամ նշանակված պաշտոնատար անձինք որևէ իշխանության օրոք չեն եղել։
Նշենք, որ առաջարկվող փոփոխությունների համաձայն՝ մարզերում նշանակվելու են 9 դատավոր և 8 դատավոր՝ Երևան քաղաքում։ Այսինքն՝ ութ մասնագիտացված, հատուկ ընտրված դատավորներ են այսուհետ քննելու մինչդատական վարույթի քրեական գործերի հետ կապված միջնորդությունները, որոնցից սահմանադրագետը կարեւորեց հատկապես կալանքի միջնորդությունները՝ հաշվի առնելով, որ հենց դրանք են գտնվում թիրախում։

«Այսօրվա դրությամբ՝ միայն Երևան քաղաքում շուրջ 25 դատավորներ են քննում այդ գործերը։ Հիմա որն է ավելի թափանցիկ, որն է ավելի արդար և որն ավելի օբյեկտիվ կլինի։ 25 դատավորին ավելի դժվար է կառավարել, քան հատուկ այդ նպատակով նշանակված ութ դատավորներին։ Ակնհայտ է, որ փոփոխությունները ներդրված են դատավորներին վերահսկելի դարձնելու և իրենց համար հաճո, կամակատար դատավորներ նշանակելու համար»,- նշեց նա՝ նկատելով, որ մինիմալի է հասցվել նաև վերաքննության կարգով այդ որոշումները բեկանելու հնարավորությունը՝ Վերաքննիչ դատարանում առանձնացնելով վեց դատավորների։

Մելոյանն ընդգծեց, որ սա հետընթաց քայլ է, որը վտանգում է արդար դատաքննության իրավունքը։

Աղբյուր` Փաստինֆո