Փաստ ինֆո

Բացարձակ թվով կառավարության պարտքը կմոտենա 8․5 միլիարդին, իսկ պետկական պարտքը կմոտենա 8․9 մլրդ դոլարին։ Այս մասին լրագրողների հետ զրույցի ժամանակ ասաց ՀՀ ֆինանսների նախարար Ատոմ Ջանջուղազյանը՝ նշելով, որ մոտ 66 տոկոս կառավարության պարտքն է, մինչև 70 տոկոս ընդհանուր պարտքն է։ 

Հարցին՝ որքանո՞վ է Հայաստանը պարտքի ռիսկային շեմը հատել, Ատոմ Ջանջուղազյանը նկատեց՝ յուրաքանչյուր շեմն ունի իր ռիսկերը․ «Սահմանված հարկաբյուջետային կանոններ ունենք, որի համար առաջին շեմ է համարվում կառավարության պարտք-ՀՆԱ-ի 40 տոկոսը։ Օրինակ հաջորդ շեմը 50 տոկոսն է սահմանվում և այսպես շարունակ։ Կան երկրներ, որտեղ 90, 100 և ավելի տոկոսներ կան, բայց որպես կանոն զարգացող երկրների համար 70-ից բարձր պարտք-ՀՆԱ հարաբերակցությունն այն դեպքում, երբ հստակ չէ, թե ինչպես է կառավարությունը նախատեսում պարտքը վերադարձնել կառավարելի միջակայք, համարվում է բարձր ռիսկայնություն ունեցող։ Մենք պետք է դիտարկենք այն սցենարները, որոնք թույլ կտան պարտքը վերադարձնել կառավարելի միջակայք»,-նշեց Ատոմ Ջանջուղազյանը՝ հավելելով, որ ոչ թե պետք է մտածենք պարտքը բացարձակ թվով նվազեցնելու մասին, այլ պետք է մտածենք ՀՆԱ-ի ավելի արագ աճ ապահովելու մասին։

Աղբյուր` Փաստինֆո